យុទ្ធនាការឃោសនារកសំឡេងឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នៅខេត្តសៀមរាប បានចាប់ផ្តើម នៅថ្ងៃទី២១ ខែឧសភា ឆ្នាំ២០២២ នេះ ដែលមានគណបក្សនយោបាយចំនួន២ ក្នុងចំណោមគណបក្សនយោបាយចំនួន១៣ ដែលបានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ នៅខេត្តសៀមរាប នាថ្ងៃទី០៥ ខែមិថុនា ឆ្នាំ២០២២នាពេលខាងមុខនេះ។
លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប បានឲ្យដឹងថា ការឃោសនារកសំឡេងឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ នេះ មានរយៈពេល ២សប្តាហ៍ ដោយចាប់ផ្តើមពីថ្ងៃទី២១ ខែឧសភា រហូតដល់ ថ្ងៃទី០៣ ខែមិថុនា ឆ្នាំ២០២២ ហើយសម្រាប់ថ្ងៃបើកយុទ្ធនាការឃោសនារកសំឡេងឆ្នោតដំបូងនេះ មានគណបក្សនយោបាយចំនួន២ ក្នុងចំណោមគណបក្សនយោបាយចំនួន១៣ ដែលបានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ រួមមានគណបក្សប្រជាជនកម្ពុជា , គណបក្សភ្លើងទៀន។
លោក នឹម វ៉ាន់សំ បន្តថា សម្រាប់ថ្ងៃដំបូងនេះ គណបក្សប្រជាជនកម្ពុជា បានដាក់ពាក្យសុំធ្វើសកម្មភាពបើកយុទ្ធនាការឃោសនារកសំឡេងឆ្នោតនេះ ក្នុងក្របខណ្ឌក្នុងទូទាំងខេត្ត ខណៈគណបក្សភ្លើងទៀន បើកយុទ្ធនាការឃោសនារកសំឡេងឆ្នោតនៅសង្កាត់ចំនួន៤ ក្នុងក្រុងសៀមរាប ហើយគណៈកម្មការឃុំសង្កាត់រៀបចំការបោះឆ្នោត កំពុងសហការជាមួយអាជ្ញាធរដែនដី ក្នុងការរៀបចំតម្រាយផ្លូវឱ្យគណបក្សនយោបាយ ព្រមទាំងមានការបែងចែកពេលវេលា ដើម្បីចៀសវាងកុំឱ្យមានការប្រឈម ការទល់មុខគ្នាក្នុងការដង្ហែក្បួនទាំងឡាយ ហើយចំនួនពិតប្រាកដ យ៉ាងណានោះ នៅទីណាប៉ុន្មាន គឺមានភាពលម្អិត តាមមូលដ្ឋាននីមួយៗ។
លោកប្រធានគណៈកម្មការរៀបចំការបោះឆ្នោតខេត្តសៀមរាប បានបន្តទៀតថា ក្នុងទូទាំងខេត្តសៀមរាប មានឃុំសង្កាត់ចំនួន១០០ មានការិយាល័យបោះឆ្នោត ចំនួន១.៥០៨ការិយាល័យ និង មានអ្នកមានឈ្មោះក្នុងបញ្ជីបោះឆ្នោតចំនួន ៥៨៨.៥៣៣នាក់ ហើយការបោះឆ្នោតនឹងធ្វើឡើងនៅថ្ងៃទី០៥ ខែមិថុនា ឆ្នាំ២០២២ ចាប់ពីម៉ោង ៧:០០ព្រឹក រហូតដល់ម៉ោង ៣:០០រសៀល ។
បើតាមមន្ត្រីរបស់គណបក្សប្រជាជនកម្ពុជាខេត្តសៀមរាប បានឱ្យដឹងថា ថ្ងៃដំបូងនៃការបើកយុទ្ធនាការឃោសនារក សម្លេងឆ្នោត សម្រាប់ការបោះឆ្នោត ក្រុមប្រឹក្សាឃុំសង្កាត់ មានសមាជិកសមាជិកាគណបក្សប្រជាជនកម្ពុជា ប្រមាណ ចន្លោះពី៤ទៅ៥ពាន់នាក់ ដង្ហែក្បួនឃោសនាបោះឆ្នោត តាមបណ្តក្រុងស្រុកក្នុងខេត្តសៀមរាប។ សម្រាប់ការជួបជុំគ្នាដង្ហែក្បួនឃោសនារកសម្លេងឆ្នោតនៅពេលនេះ គឺបានបង្ហាញអំពីការរួមនៃកម្លាំងសាមគ្គី ដែលកើតចេញពីសមាជិកសមាជិកា នៃគណបក្សប្រជាជនកម្ពុជា ហើយក៏ជាការបង្ហាញឲ្យឃើញនូវឧត្ដមភាព កិត្យានុភាពរបស់សមាជិកសមាជិកា ដើម្បីបង្ហាញដល់បងប្អូនប្រជាពលរដ្ឋ ក៏ដូចជាអ្នកពាក់ព័ន្ធនានា ឲ្យយល់ និងឃើញច្បាស់ អំពីកំលាំងសាមគ្គីដែលគណបក្សប្រជាជនកម្ពុជា បាននាំមកនូវភាពជោគជ័យ ដែលស្ដែងចេញពីមូលដ្ឋានរបស់យើងនៅក្នុងថ្ងៃនេះ ។ មន្ត្រីដដែលក៏បានផ្ដាំផ្ញើដល់សមាជិកសមាជិកាទាំងអស់ ដែលចូលរួមដង្ហែក្បួនចាំបាច់ត្រូវគោរព ឱ្យបានសមស្របទៅតាមលក្ខន្តិកៈ របស់គណៈកម្មការជាតិរៀបចំការបោះឆ្នោតដែលបានណែនាំ ជាពិសេសសូមរក្សានូវភាពថ្លៃថ្នូរ វិន័យ និងការគោរពទៅតាមច្បាប់ដែលបានកំណត់ ជៀសវាងការកើតនូវអំពើហិង្សាណាមួយ ដែលធ្វើឲ្យប៉ះពាល់កិត្តិយសដល់គណបក្សប្រជាជនកម្ពុជា ។
គួរបញ្ជាក់ថា នៅក្នុងខេត្តសៀមរាប មានគណបក្សនយោបាយចំនួន១៣ ចូលរួមប្រកួតប្រជែង ១. គណបក្សប្រជាជនកម្ពុជា , ២.គណបក្សភ្លើងទៀន ,៣. គណបក្សខ្មែររួបរួមជាតិ , ៤. គណបក្សហ៊្វុនស៊ិនប៉ិច ,៥. គណបក្សខ្មែរស្រឡាញ់ជាតិ , ៦. គណបក្សប្រជាធិបតេយ្យមូលដ្ឋាន, ៧. គណបក្សឆន្ទៈខ្មែរ ,៨. គណបក្សសំបុកឃ្មុំសង្គមប្រជាធិបតេយ្យ , ៩. គណបក្សកែទម្រង់កម្ពុជា ,១០. គណបក្សកម្ពុជានិយម ,១១. គណបក្សសញ្ជាតិកម្ពុជា , ១២. គណបក្សយុវជនកម្ពុជា និង១៣. គណបក្សរស្មីខេមរា និងមានបេក្ខជនសរុបចំនួន ៦,១១៣នាក់ ស្រី ២,០៥៩នាក់ ឈរឈ្មោះប្រកួតប្រជែង ៕
