អតីតសមាជិកគណបក្សសង្គ្រោះជាតិចំនួន ៦២នាក់ និងអតីតគណបក្សហ្វ៊ុនស៊ិនប៉ិចចំនួន ២៩នាក់ សរុបចំនួន ៩១នាក់ ត្រូវបានធ្វើពិធីប្រកាសទទួលស្គាល់ និងបញ្ចូលជាសមាជិកគណបក្សប្រជាជនកម្ពុជា ក្នុងស្រុកស្រីស្នំ ខេត្តសៀមរាប កាលពីព្រឹកថ្ងៃទី២០ ខែឧសភា ឆ្នាំ២០២២នេះ នៅស្នាក់ការគណបក្សស្រុកស្រីស្នំ។ ការប្រារព្ធពិធីបញ្ចូលសមាជិកគណបក្សថ្មីនេះ ក្រោមអធិបតីភាពឯកឧត្តម លន់ សុធី ប្រធានក្រុមការងារថ្នាក់កណ្តាលចុះជួយមូលដ្ឋានស្រុកស្រីស្នំ ឯកឧត្តម លីវ សុខុន អនុប្រធានក្រុមការងារចុះជួយមូលដ្ឋានស្រុកស្រីស្នំ និងលោក ហ៊ន់ ឬទ្ធិ ប្រធានគណបក្សស្រុក ព្រមទាំងសមាជិកសមាជិកាគណបក្សជាច្រើននាក់ បានចូលរួម។
ឯកឧត្តម លន់ សុធី ប្រធានក្រុមការងារចុះជួយមូលដ្ឋានស្រុកស្រីស្នំ មានប្រសាសន៍ថា សមាជិកថ្មី ដែលបានចូលមករូមរស់ជាមួយគណបក្សប្រជាជនកម្ពុជា ប្រមាណជា ៩១នាក់ ដែលបានសម្រេចចិត្តដ៏ត្រឹមត្រូវជាមួយគណបក្សប្រជាជនកម្ពុជា នេះគឺជាសកម្មភាពនយោបាយដ៏ត្រឹមត្រូវ ការជួបជុំនាពេលថ្ងៃនេះ ជាកម្លាំងថ្មីបន្ថែមទៀត ក្នុងការគាំទ្រគណបក្សប្រជាជនកម្ពុជា នៅស្រុកស្រីស្នំយើង ជាសកម្មភាពដ៏សំខាន់ ដើម្បីចូលរួមត្រៀមបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទិ៥ ឆ្នាំ២០២២នេះ។ ដែលបងប្អូនបានគាំទ្រដល់គណបក្សប្រជាជនកម្ពុជា បានដឹកនាំប្រទេសជាង ៤០ឆ្នាំ និងរំដោះប្រទេសពីរបបប្រល័យពូជសាសន៍ឲ្យរួចផុតពីការកាប់សម្លាប់ ព្រមទាំងមានការអភិវឌ្ឍឲ្យរីកចម្រើនរហូតមកដល់សព្វថ្ងៃនេះ។
ឯកឧត្តម បន្តថា គណបក្សនេះមានសមិទ្ធផលដែលទទួលបាននាពេលកន្លងមក គឺកត្តាសន្តិភាព ការអភិវឌ្ឍរីកចម្រើនលើគ្រប់វិស័យ ការទប់ស្កាត់ការឆ្លងរីករាលដាល នៃជំងឺកូវីដ-១៩ នាពេលកន្លងមក និងផែនការយុទ្ធនាការចាក់វ៉ាក់សាំងជូនប្រជាពលរដ្ឋ។ ភាពជោគជ័យរបស់សម្តេចតេជោ គឺយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋប្រកបដោយប្រសិទ្ធភាព ដោយឥតគិតថ្លៃ ហើយវ៉ាក់សាំងបង្ការជំងឺកូវីដ-១៩ ស្ទើរ១០០% នៅទូទាំងប្រទេស។ ឯកឧត្តម ក៏បានស្វាគមន៍ ចំពោះបងប្អូនទាំង ៩១នាក់ ដែលបានមកចូលរួមរស់ជាមួយគណបក្សប្រជាជនកម្ពុជា គឺស្របពេលកម្ពុជាបាននឹងកំពុងអនុវត្តរដ្ឋធម្មនុញ្ញ និងគោរពសិទ្ធិមនុស្ស ដោយមានការបោះឆ្នោតជាតិ បោះឆ្នោតសកល និងបោះឆ្នោតអសកល ដោយយើងអនុវត្តតាមគោលការណ៍ច្បាប់រយ:ពេល ៥ឆ្នាំម្តង។ ម្យ៉ាងទៀតការសម្រេចចិត្តរបស់បងប្អូន ដើម្បីចូលរួមគាំទ្រជាមហាគ្រួសារជាមួយគណបក្សប្រជាជនកម្ពុជា នឹងមានជីវភាពល្អប្រសើរ មិនមានការបែងចែកអ្នកថ្មី ឬអ្នកចាស់នោះទេ។ គឺយើងទទួលយកបងប្អូនមកពីគ្រប់គណបក្សនយោបាយដែលមានបំណងចូលរួមរស់ជាមួយគណបក្សប្រជាជនកម្ពុជា ដើម្បីធ្វើការអភិវឌ្ឍសង្គមជាតិ ប្រកបដោយសុខដុមបនីយកម្ម ក្រោមដំបូលសន្តិភាព៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក លីវ សុខុន
