នៅវេលាម៉ោង៧ព្រឹកថ្ងៃទី០៥ ខែមិថុនា ឆ្នាំ២០២២នេះ ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ បានប្រកាសបើកជាផ្លូវការ ហើយគ្រាន់តែការិយាល័យបោះឆ្នោតបើកទ្វារភ្លាម ទាំងថ្នាក់ដឹកនាំខេត្ត មន្ត្រីរាជការគ្រប់លំដាប់ថ្នាក់ តំណាងរាស្រ្តមណ្ឌលសៀមរាប និង ប្រជាពលរដ្ឋដែលមានឈ្មោះបោះឆ្នោត បានឈរតម្រង់ជួររួចជាស្រេចនៅមុខទ្វារការិយាល័យបោះឆ្នោត ដើម្បីរង់ចាំចូលទៅបោះឆ្នោត ក្រោមការជួយសម្របសម្រួលរបៀបរៀបរយពីមន្ត្រីការិយាល័យបោះឆ្នោត រួមទាំងការផ្តល់លេខរៀង និង ពិនិត្យឯកសារបោះឆ្នោត ជាពិសេសផ្តល់សិទ្ឋិអាទិភាពដល់ ព្រះសង្ឃ ចាស់ជរា ស្រ្តីមានផ្ទៃពោះ ស្ត្រីមានកូនតូច និង ជនពិការ ឲ្យចូលបោះឆ្នោតមុន។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ជាការបោះឆ្នោតជ្រើសរើសថ្នាក់ដឹកនាំនៅមូលដ្ឋាន និង ជាការបោះឆ្នោតសកល ដែលបានប្រព្រឹត្តទៅក្នុងរយៈពេល៥ឆ្នាំជាទៀងទាត់ និងតាមពេលវេលាដែលបានកំណត់ ហើយមកដល់ពេលនេះ បានដំណើរការចំនួន៥លើកហើយ ដែលកាលពីអាណត្តិទី១ គឺនៅឆ្នាំ២០០២ ។ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ គឺជាការបោះឆ្នោតដ៏មានសារៈសំខាន់ ដែលផ្តល់ឱកាសឱ្យប្រជាពលរដ្ឋបានជ្រើសរើសថ្នាក់ដឹកនាំឃុំ សង្កាត់ ដែលមានសមត្ថភាព មានការយកចិត្តទុកដាក់ក្នុងការបម្រើប្រជាពលរដ្ឋ និងកសាងឃុំ សង្កាត់ឱ្យកាន់តែប្រសើរ និង ជាដំណើរប្រជាធិបតេយ្យនៅកម្ពុជា ដែលប្រជាពលរដ្ឋទូទៅចង់ឃើញដំណើរប្រជាធិបតេយ្យនេះ ចាក់គ្រឹះកាន់តែរឹងមាំនៅក្នុងប្រទេសកម្ពុជា។
ប្រជាពលរដ្ឋដែលបានចូលរួមការបោះឆ្នោតនេះ បានថ្លែងកោតសរសើរចំពោះការរៀបចំរបស់គណៈកម្មការខេត្តរៀបចំការបោះឆ្នោត ដែលរៀបចំបានល្អ ហើយសន្តិសុខសណ្តាប់ក៏មានភាពល្អប្រសើរផងដែរ ធ្វើឲ្យការបោះឆ្នោតត្រូវបានធ្វើពួកគាត់ក៏បានបង្ហាញទំនុកចិត្តផងដែរថា ការបោះឆ្នោតនេះនឹងដំណើរការទៅប្រកបដោយយុត្តិធម៌ ហើដោយមិនបារម្ភរឿងសន្លឹកឆ្នោតរបស់ពួកគាត់ត្រូវគេលួច ឬបន្លំនោះឡើយ ព្រោះថាដោយសារតែនៅតាមការិយាល័យនីមួយៗមានតំណាងគណបក្សនយោបាយ និងអ្នកសង្កេតការណ៍មកពីស្ថាប័ននានា ធ្វើជាភ្នែកជាច្រមុះរបស់ពួកគាត់ឃ្លាំមើលលើការទុកដាក់ និងរាប់សន្លឹកឆ្នោត។
ប្រជាពលរដ្ឋបន្តថា ជាព្រឹត្ដិការណ៍ពិសេសក្នុងរយៈពេល៥ឆ្នាំម្ដង ពួកគាត់បានសិទ្ធិគ្រប់គ្រាន់ក្នុងការសម្រេចបោះឆ្នោតជ្រើសរើសតំណាងថ្នាក់ដឹកនាំរបស់ពួកគាត់ នៅមូលដ្ឋានដើម្បីធ្វើការអភិវឌ្ឍន៍ភូមិឃុំឱ្យមានការរីកចំរើនបន្ថែមទៀតពីលើអ្វីដែលបានអភិវឌ្ឍន៍កន្លងមក ហើយតាមរយៈការបោះឆ្នោតនេះ មិនមានការបង្ខិតបង្ខំនោះឡើយ ពោលគឺសម្រេចតាមឆន្ទៈដោយខ្លួនឯង ។
អត្ថបទ និង រូបថត ៖ លោក ជា ស្រស់ និង លោក ឈិត សាវី
កែសម្រួលអត្ថបទ ៖ លោក លីវ សាន្ត
