នៅវេលាម៉ោង៧ព្រឹកថ្ងៃទី០៥ ខែមិថុនា ឆ្នាំ២០២២នេះ ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ បានប្រកាសបើកជាផ្លូវការ ដែលខណៈពេលនោះ សង្កេតឃើញវត្តមានឯកឧត្តម ទៀ សីហា អភិបាលខេត្តសៀមរាប និង លោកជំទាវ ព្រមទាំងក្រុមគ្រួសារ បានអញ្ជើញទៅបោះឆ្នោតនៅមណ្ឌលសាលាបឋមសិក្សាមុខនាគសង្កាត់គោកចក , ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង លោកជំទាវ ព្រមទាំងក្រុមគ្រួសារ បានអញ្ជើញទៅបោះឆ្នោតនៅមណ្ឌលសាលាបឋមសិក្សាកេសរាម សង្កាត់ស្វាយដង្គំ ក្រុងសៀមរាប និង ឯកឧត្តម សៀង ណាំ តំណាងរាស្រ្តមណ្ឌលសៀមរាប និង លោកជំទាវ ព្រមទាំងក្រុមគ្រួសារ បានអញ្ជើញទៅបោះឆ្នោតនៅមណ្ឌលវិទ្យាល័យហ៊ុន សែន គ្រួស សង្កាត់ស្វាយដង្គំ ក្រុងសៀមរាប រួមជាមួយប្រជាពលរដ្ឋទូទៅគ្រប់និន្នាការទាំងអស់ បានអញ្ជើញទៅបំពេញកាតព្វកិច្ចក្នុងនាមជាពលរដ្ឋខ្មែរមួយរូប បោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ជាការបោះឆ្នោតជ្រើសរើសថ្នាក់ដឹកនាំនៅមូលដ្ឋាន និង ជាការបោះឆ្នោតសកល ដែលបានប្រព្រឹត្តទៅក្នុងរយៈពេល៥ឆ្នាំជាទៀងទាត់ និងតាមពេលវេលាដែលបានកំណត់ ហើយមកដល់ពេលនេះ បានដំណើរការចំនួន៥លើកហើយ ដែលកាលពីអាណត្តិទី១ គឺនៅឆ្នាំ២០០២ ។
ឯកឧត្តម ទៀ សីហា អភិបាលខេត្តសៀមរាប បានឲ្យដឹងថា គណៈបញ្ជាការឯកភាពរដ្ឋបាលខេត្ត សហការជាមួយគណៈកម្មការខេត្តរៀបចំការបោះឆ្នោត បានរៀបចំកម្លាំងការពារនៅគ្រប់ការិយាល័យបោះឆ្នោត ដើម្បីធានាសន្តិសុខ និង សុវត្ថិភាព ទាំងនៅការិយាល័យបោះឆ្នោត និង ទាំងអ្នកដែលបានទៅបោះឆ្នោត ដោយធ្វើយ៉ាងណា ឲ្យដំណើរការប្រព្រឹត្តទៅដោយរលូន។ ឯកឧត្តម បង្ហាញមានក្តីសប្បាយរីករាយ ដែលបានបំពេញកាតព្វកិច្ចរួចរាល់ក្នុងនាមជាពលរដ្ឋមួយរូប សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥នេះ និងបានអំពាវនាវឲ្យប្រជាពលរដ្ឋដែលមានឈ្មោះក្នុងបញ្ជីឈ្មោះបោះឆ្នោតទាំងអស់ សូមអញ្ជើញទៅបោះឆ្នោតទាំងអស់គ្នា ។
លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប បានឲ្យដឹងថា អ្វីៗបាននឹងកំពុងប្រព្រឹត្តិទៅដោយរលូនតាមប្រក្រតីទិន និងនិតិវិធី ដែលគណៈកម្មាធិការជាតិរៀបចំការបោះឆ្នោត បានកំណត់ គិតមកទល់ពេលនេះ ការបោះឆ្នោតបានប្រព្រឹត្តទៅដោយរលូន គ្មានបញ្ហាអ្វីកើតឡើងឡើយ ។
សូមបញ្ជាក់ថា ក្នុងទូទាំងខេត្តមានឃុំសង្កាត់ចំនួន១០០ មានការិយាល័យបោះឆ្នោតចំនួន១.៥០៨ការិយាល័យ និង មានអ្នកមានឈ្មោះក្នុងបញ្ជីបោះឆ្នោតចំនួន ៥៨៨.៥៣៣នាក់ មានគណបក្សនយោបាយចំនួន១៣ ចូលរួមប្រកួតប្រជែង ១.គណបក្សប្រជាជនកម្ពុជា ,២.គណបក្សភ្លើងទៀន ,៣. គណបក្សខ្មែររួបរួមជាតិ ,៤.គណបក្សហ៊្វុនស៊ិនប៉ិច ,៥.គណបក្សខ្មែរស្រឡាញ់ជាតិ , ៦. គណបក្សប្រជាធិបតេយ្យមូលដ្ឋាន, ៧. គណបក្សឆន្ទៈខ្មែរ ,៨.គណបក្សសំបុកឃ្មុំសង្គមប្រជាធិបតេយ្យ , ៩. គណបក្សកែទម្រង់កម្ពុជា ,១០. គណបក្សកម្ពុជានិយម ,១១.គណបក្សសញ្ជាតិកម្ពុជា , ១២.គណបក្សយុវជនកម្ពុជា និង១៣. គណបក្សរស្មីខេមរា និងមានបេក្ខជនឈរឈ្មោះសរុបចំនួន ៦.១១៣នាក់ ក្នុងនោះស្រីចំនួន ២.០៥៩នាក់៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
