កាលពីព្រឹកថ្ងៃទី០៧ ខែមិថុនា ឆ្នាំ២០២២នេះ ក្រុមប្រឹក្សាខេត្តសៀមរាប អាណត្តិទី៣ បានបើកកិច្ចប្រជុំសាមញ្ញលើកទី៣៧ តាមរយៈប្រព័ន្ធ Zoom និងដោយផ្ទាល់ ក្រោមអធិបតីភាពរបស់ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាល នៃគណៈអភិបាលខេត្ត ដោយមានការអញ្ជើញចូលរួមពីសំណាក់ឯកឧត្តម លោកជំទាវ ជាសមាជិកសមាជិកាក្រុមប្រឹក្សាខេត្ត អភិបាលរងខេត្ត តំណាងអាជ្ញាធរជាតិអប្សរា លោក លោកស្រី ជានាយករដ្ឋបាលខេត្ត នាយកទីចាត់ការនៃរដ្ឋបាលខេត្ត ថ្នាក់ដឹកនាំមន្ទីរ អង្គភាពនានា និង អាជ្ញាធរក្រុងស្រុកទាំង១២ក្នុងខេត្ត ។
របៀបវារៈកិច្ចប្រជុំ រួមមាន ៖ ១.ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញ លើកទី៣៦ របស់ក្រុមប្រឹក្សាខេត្តសៀមរាប អាណត្តិទី៣ កាលពីថ្ងៃព្រហស្បតិ៍ ០៥កើត ខែពិសាខ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី០៥ ខែឧសភា ឆ្នាំ២០២២, ២.ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែឧសភា ឆ្នាំ២០២២ ស្តីពីការអនុវត្តការងាររបស់រដ្ឋបាលខេត្តសៀមរាប, ៣.ពិនិត្យ ពិភាក្សា និងអនុម័តសេចក្តីព្រាងលើប្រតិទិនកិច្ចប្រជុំសាមញ្ញរបស់ក្រុមប្រឹក្សា អាណត្តិទី៣ សម្រាប់រយៈពេល ១២ខែ (ខែកក្កដា ឆ្នាំ២០២២ ដល់ខែមិថុនា ឆ្នាំ២០២៣) និង ៤.បញ្ហាផ្សេងៗ ។
មានប្រសាសន៍បើកអង្គប្រជុំ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានធ្វើការវាយតម្លៃខ្ពស់ និងកោតសរសើរ ពីការខិតខំប្រឹងប្រែងរបស់រដ្ឋបាលខេត្ត រួមនឹងអង្គភាពស្ថាប័នពាក់ព័ន្ធ ក្នុងការចូលរួមថែរក្សាសន្តិសុខ សណ្តាប់ធ្នាប់សាធារណៈក្នុងខេត្ត ធានាបានសុវត្ថិភាពខ្ពស់ សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលបានប្រព្រឹត្តទៅដោយរលូន ប្រកបដោយ ភាពត្រឹមត្រូវ យុត្តិធម៌ និង តម្លាភាព ព្រមទាំងបានរំលឹកបន្ថែមដល់រដ្ឋបាលខេត្ត រដ្ឋបាលក្រុងស្រុកឃុំសង្កាត់ ត្រូវបន្តកិច្ចការរដ្ឋបាល ការបម្រើសេវាសាធារណៈ ការដោះស្រាយបញ្ហាជូនប្រជាពលរដ្ឋ និងការអភិវឌ្ឍមូលដ្ឋាន តាមគម្រោងនានាសម្រាប់ឆ្នាំ២០២២ ។
ក្នុងកិច្ចពិភាក្សាលើរបៀបវារៈទី២នៃកិច្ចប្រជុំនេះ ឯកឧត្តមសមាជិកក្រុមប្រឹក្សាខេត្ត បានលើកឡើងពីបញ្ហាមួយចំនួន និងសំណូមពរដល់អង្គភាពពាក់ព័ន្ធ ជួយដោះស្រាយឲ្យបានទាន់ពេលវេលា ដូចជា ៖ ការលក់ដូរតាមដងផ្លូវដែលធ្វើឲ្យប៉ះពាល់សណ្ដាប់ធ្នាប់សាធារណៈ, ការមិនគោរពភ្លើងសញ្ញាចរាចរណ៍ អាចនឹងធ្វើឲ្យមានគ្រោះថ្នាក់កើតឡើង និងការត្រួតពិនិត្យមើលដើមឈើ ឬមែកឈើ ដែលមានអាយុកាលយូរ ហើយងាប់ ឬពុកផុយ អាចនឹងធ្វើឲ្យគ្រោះថ្នាក់ដល់ទ្រព្យសម្បត្តិ និងអាយុជីវិតប្រជាពលរដ្ឋ។
ជាការឆ្លើយតប ឯកឧត្តម ទៀ សីហា អភិបាលខេត្ត បានទទួលយកនូវមតិយោបល់លើកឡើងរបស់ឯកឧត្តមសមាជិកក្រុមប្រឹក្សាខេត្ត និងគ្រោងបើកកិច្ចប្រជុំ ជាមួយមន្ទីរអង្គភាពពាក់ព័ន្ធ ធ្វើការពិភាក្សារួមគ្នាដើម្បីដោះស្រាយឲ្យបានទាន់ពេលវេលា។ ឯកឧត្តមបានថ្លែងអំណរគុណដល់អាជ្ញាធរមូលដ្ឋានគ្រប់ជាន់ថ្នាក់ និងកងកម្លាំងមានសមត្ថកិច្ច រួមទាំងអង្គភាពពាក់ព័ន្ធទាំងអស់ ដែលបានចូលរួមក្នុងការថែរក្សាការពារ សន្តិសុខ សុវត្ថិភាព សណ្តាប់ធ្នាប់សាធារណៈ សំខាន់សន្តិសុខ សុវត្ថិភាព សណ្តាប់ធ្នាប់ ក្នុងដំណើរការឃោសនាបោះឆ្នោត និងការបោះឆ្នោតដែលបានប្រព្រឹត្តទៅបានល្អប្រសើរ ប្រកបដោយភាពត្រឹមត្រូវ យុត្តិធម៌ និងតម្លាភាព។
ឯកឧត្តមអភិបាលខេត្ត បានសំណូមពរដល់ថ្នាក់ដឹកនាំមន្ទីរ អង្គភាព និង អាជ្ញាធរក្រុង ស្រុក ត្រូវបន្តអនុត្តនូវគោលនយោបាយរបស់រាជរដ្ឋាភិបាល និងទិសដៅរបស់រដ្ឋបាលខេត្ត សម្រេចឲ្យបានជោគជ័យ ពិសេសអនុវត្តបន្ទាន់តាមអនុសាសន៍របស់រាជរដ្ឋាភិបាល ក្នុងការកាត់ឆ្វៀលដីក្នុងតំបន់៣ ជាប់បឹងទន្លេសាប ជូនប្រជាពលរដ្ឋ ដែលអាស្រ័យផលយូរឆ្នាំមកហើយ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
