អាជ្ញាធរជាតិអប្សរា កាលពីថ្ងៃទី០៧ ខែមិថុនាម្សិលមិញនេះ បានសហការជាមួយក្រសួងទេសចរណ៍ រៀបចំបើកវគ្គវិក្រឹតការពិសេសមគ្គុទេ្ទសក៍ទេសចរណ៍ តំបន់សៀមរាប-អង្គរ ជូនដល់មគ្គុទ្ទេសក៍ទេសចរណ៍ ចំនួន ៦៥នាក់ ដែលពិធីនេះប្រព្រឹត្តិទៅក្រោមអធិបតីភាព ឯកឧត្ដម ប៉ាក់ សុខុម រដ្ឋលេខាធិការ ក្រសួងទេសចរណ៍ និងឯកឧត្ដមបណ្ឌិត ហង់ ពៅ អគ្គនាយកអាជ្ញាធរជាតិអប្សរា ដោយវគ្គវិក្រឹតការនេះមានរយៈពេល ១០ថ្ងៃ គឺចាប់ពីថ្ងៃទី០៧ ដល់ថ្ងៃទី១៦ ខែមិថុនា ឆ្នាំ២០២២។
ឯកឧត្ដមបណ្ឌិត ហង់ ពៅ មានប្រសាសន៍ថា វគ្គវិក្រិតការដែលរៀបចំឡើងនាឱកាសនេះ មានគោលបំណងចម្បងចំនួន២ គឺទី១.ចែករំលែកចំណេះដឹង និងណែនាំផលិតផលទេចរណ៍ថ្មី នៅតំបន់សៀមរាប-អង្គរ ទៅដល់អ្នកមគ្គុទ្ទេសក៍ទេសចរណ៍ ព្រោះថាអ្នកមគ្គុទ្ទេសក៍ទេសចរណ៍ អាចត្រូវចាត់ទុកជាទូតដែលមានឥទ្ធិពលខ្លាំងបំផុត ដើម្បីផ្សព្វផ្សាយពីរបកគំហើញថ្មីៗ នៃការស្រាវជ្រាវ និងសមិទ្ធផលការងារថ្មីៗ វប្បធម៌ខ្មែរក្នុងការបញ្ជាក់ពីតម្លៃពិតរបស់តំបន់រមណីយដ្ឋានអង្គរ និងទី២.ចង់ឱ្យអ្នកមគ្គុទ្ទេសក៍ទេសចរណ៍ សហការជាមួយភ្នាក់ងារទេសចរណ៍ នៃអាជ្ញាធរជាតិអប្សរា តាមរយៈការគ្រប់គ្រងភ្ញៀវទេសចរតាមបែបគន្លងថ្មី នៅតំបន់អង្គរក្រោយសម័យកូវីដ។
មានប្រសាសន៍ក្នុងឱកាសនោះដែរ ឯកឧត្តម ប៉ាក់ សុខុម បានបង្ហាញថា វគ្គវិក្រឹតការពិសេសមគ្គុទេសក៍ទេសចរណ៍ តំបន់សៀមរាប-អង្គរ នាពេលនេះគឺពិតជាមានសារសំខាន់ណាស់សម្រាប់ផ្តល់ចំណេះដឹងថ្មីៗបន្ថែមទៀត ដល់មគ្គុទេសក៍ទេសចរណ៍របស់យើងសម្រាប់ត្រៀមទទួលភ្ញៀវទេសចរជាថ្មី មកទស្សនាសៀមរាប-អង្គរ យើង បន្ទាប់ពីជំងឺកូវីដ-១៩ មានភាពស្ងប់ស្ងាត់។ ជាមួយគ្នានោះក្នុងរយៈពេលស្ថិតនៅក្នុងបរិបទការរីករាលដាលនៃជំងឺកូវីដ-១៩ អាជ្ញាធរជាតិអប្សរា ក៏នៅតែមានការយកចិត្តទុកខ្ពស់ក្នុងការកែលម្អសោភ័ណភាពនៅក្នុងតំបន់រមណីយដ្ឋានអង្គរ និងបរិវេណប្រាសាទសំខាន់ៗ ពិសេសពង្រីកការងារស្រាវជ្រាវលើវិស័យបេតិកភណ្ឌ ដែលជាចំណុចសំខាន់ដែលអាចផ្តល់ជាចំណេះដឹងបន្ថែមដល់មគ្គុទ្ទេសក៍ ដើម្បីឱ្យមគ្គុទ្ទេសក៍ដែលជាអ្នកនាំសារសំខាន់ក្នុងការផ្តល់ជូនភ្ញៀវទេសចរឱ្យយល់ពីតម្លៃអង្គរ និងវប្បធម៌ខ្មែរទទួលបានព័ត៌មានជាក់លាក់ពិតប្រាកដពីអង្គរ។ ឯកឧត្តមក៏បានណែនាំដល់សិក្ខាកាមដែលបានចូលរួមក្នុងវគ្គវិក្រឹតការទាំងអស់ ត្រូវយកចិត្តទុកដាក់ឲ្យបានខ្ពស់ និងខិតខំគ្រេបយកចំណេះដឹងថ្មីៗតាមរយៈវគ្គវិក្រិតការនេះផងដែរ៕
អត្ថបទ និងរូបភាព៖ អាជ្ញាធរជាតិអប្សរា
កែសម្រួល៖ លោក អ៊ុន ណារាជ្យ
