ថ្លែងក្នុងសិក្ខាសាលាពិគ្រោះយោបល់ថ្នាក់ជាតិ ស្ដីពីស្ដង់ដារអប្បបរមាសម្រាប់ការផ្ដល់អាជ្ញាប័ណ្ណដល់មូលដ្ឋានសុខាភិបាលនៅកម្ពុជា នៅខេត្ដសៀមរាប នាថ្ងៃទី៧ ខែមិថុនា ឆ្នាំ២០២២នេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានប្រកាសថាក្រសួងសុខាភិបាលនឹងបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី៥ ឬដូសជម្រុញ ដល់កងកម្លាំងប្រដាប់អាវុធ មន្ដ្រីរាជការជួរមុខ អ្នកសារព័ត៌មានជាតិ និងជនបរទេសដែលស្នាក់នៅក្នុងប្រទេសកម្ពុជា ចាប់ពីថ្ងៃទី០៩ ខែមិថុនា ឆ្នាំ២០២២នេះ ។
លោកជំទាវ ឱ វណ្ណឌីន មានប្រសាសន៍ថា ដោយមានការយកចិត្ដទុកដាក់ពីសម្ដេចតេជោ ហ៊ុន សែន នាយករដ្ឋមន្ដ្រី បានឱ្យបើកយុទ្ធនាការចាក់វ៉ាក់សាំងដូសទី៥ ឬដូសជម្រុញ ដល់ក្រុមកម្លាំងដែលកំពុងអនុវត្ដន៍ការងារនៅជួរមុខ ដោយចាប់អនុវត្ដន៍ពីថ្ងៃទី៩ ខែមិថុនា ខាងមុខនេះ។ ក្រុមជួរមុខដែលបានទទួលបានវ៉ាក់សាំងដូសទី៥ ឬដូសជម្រុញមុនគេនេះ រួមមានកងកម្លាំងប្រដាប់អាវុធយោធា ប៉ូលីស ក្រុមគ្រូពេទ្យទាំងរដ្ឋទាំងឯកជន អ្នកសារព័ត៌មាន សិល្បៈករ សិល្បៈការនី ក្រុមអ្នកមានប្រព័ន្ធការពារខ្សោយ ឬមនុស្សវ័យ ៦០ឆ្នាំផងដែរ។ បន្ថែមលើនោះ សម្ដេចតេជោក៍បានអនុញ្ញាតឱ្យជនបរទេស ដែលស្នាក់នៅប្រទេសកម្ពុជា ពិសេសបុគ្គលិកអង្គការជាតិអង្គការន្ដរជាតិ បុគ្គលិកស្ថានទូត និងដៃគូរជាច្រើនទៀតផងដែរ។
លោកជំទាវ ក៍បានបញ្ជាក់ថា មកដល់ពេលនេះ មានប្រជាពលរដ្ឋចំនួន ៩៤ភាគរយ នៃចំនួនប្រជាពលរដ្ឋសរុបទូទាំងប្រទេស ដែលបានទទួលការចាក់វ៉ាក់សាំងបង្ការជំងឺកូវីដ-១៩។ លោកជំទាវបន្ថែមថា រាជរដ្ឋាភិបាលកំពុងបន្ដដំណើរចាក់ដូសទី៣ ដូសទី៤ទៀត បន្ទាប់ពីសម្រាកបីថ្ងៃ ដើម្បីឱ្យក្រុមគ្រូពេទ្យ និងប្រជាពលរដ្ឋទៅចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់អាណត្ដិទី៥ ឆ្នាំ២០២២។ លោកជំទាវ ក៍បានអំពាវដល់ប្រជាពលរដ្ឋដែលមិនទាន់បានទទួលវ៉ាក់សាំងដូសទី៣ និងដូសទី៤ ត្រូវទៅទទួលវ៉ាក់សាំងបង្ការជំងឺកូវីដ-១៩ នេះឱ្យបានគ្រប់គ្នា៕
អត្ថបទ និង រូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
