កាលពីព្រឹកថ្ងៃទី០៧ ខែមិថុនា ឆ្នាំ២០២២នេះ នាយកដ្ឋានមន្ទីរពេទ្យ (DHS) នៃក្រសួងសុខាភិបាល សហការគាំទ្រពី អង្គការដៃគូអភិវឌ្ឍសុខាភិបាលដូចជា ទីភ្នាក់ងារសហរដ្ឋអាមេរិកសម្រាប់ការអភិវឌ្ឍ (USAID) ប្រចាំកម្ពុជា, ប្រធានគម្រោងលើកកម្ពស់គុណភាពសេវាថែទាំសុខភាពរបស់ទី ភ្នាក់ងារសហរដ្ឋអាមេរិកសម្រាប់ការអភិវឌ្ឍ (USAID-EQHA, FHI360) និង អ្នកគ្រប់គ្រងកម្មវិធីគាំពារសុខភាពសង្គម នៃអង្គការ Giz បានរៀបចំបើកសិក្ខាសាលាពិគ្រោះយោបល់ថា្នក់ជាតិ ស្ដីពីស្តង់ដារអប្បរមាសម្រាប់ការផ្តល់អាជ្ញាប័ណ្ណដល់មូលដ្ឋានសុខាភិបាលឯកជននៅកម្ពុជា ក្នុងគោលបំណងសំខាន់ ដើម្បីផ្តល់ឱ្យអ្នកចូលរួមនូវទិដ្ឋភាពទូទៅនៃការអភិវឌ្ឍន៍ស្តង់ដារអប្បបរមាសម្រាប់ការផ្តល់អាជ្ញាប័ណ្ណ ដល់មូលដ្ឋានសុខាភិបាលឯកជននៅកម្ពុជា និងដើម្បីប្រមូលមតិកែលម្អសម្រាប់ការបញ្ចប់ស្តង់ពេរអប្បបរមាសម្រាប់ការផ្តល់អាជ្ញាប័ណ្ណ។
សិក្ខាសាលានេះប្រារព្ធឡើងមានរយៈពេល១ថ្ងៃពេញ នៅសណ្ឋាគារ សោមាទេវីអង្គរ រីហ្សត និងស្ប៉ា ក្នុងក្រុងសៀមរាប ក្រោមអធិបតីភាព លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងមានការចូលរួមពីដៃគូអភិវឌ្ឍន៍សុខាភិបាល ថ្នាក់ដឹកនាំក្រសួងសុខាភិបាល , ក្រុមការងារបច្ចេកទេសសម្រាប់បង្កើតស្តង់ដាអាជ្ញាប័ណ្ណអប្បបរមា សម្រាប់គ្រឹះស្ថានថែទាំសុខភាពឯកជន និងមូលដ្ឋានសុខាភិបាលឯកជន មកពីខេត្តចំនួន១២ សរុបចំនួន១៣៦នាក់ ។
លោកស្រី Corrina Heineke អ្នកគ្រប់គ្រងកម្មវិធីគាំពារសុខភាពសង្គមនៃអង្គការGizលើកឡើងថា ៖ ប្រព័ន្ឋនៃការទទួលស្គាល់គុណភាពមូលដ្ឋានសុខាភិបាល និងការផ្តល់នូវអាជ្ញាប័ណ្ណស្តង់ដារអប្បរមាសម្រាប់មូលដ្ឋានសុខាភិបាលឯកជន វានឹងធានាដល់មូលដ្ឋានសុខាភិបាលឯកជន ទទួលបាននូវគុណភាព និងការគ្រប់គ្រងច្បាស់លាស់ ហើយGiz សង្ឃឹមថា ការធ្វើឱ្យប្រសើរឡើងក្នុងភាពជាដៃគូក្នុងវិស័យសុខាភិបាល នឹងបន្តការគាំទ្របន្ថែមទៀត ដើម្បីបញ្ចប់នៃការគម្រោងបង្កើតស្តង់ដារអប្បរមាសម្រាប់ការផ្តល់អាជ្ញាប័ណ្ណដល់មូលដ្ឋានសុខាភិបាលឯកជននៅកម្ពុជា ហេតុនេះសូមស្នើដល់ថ្នាក់ដឹកនាំក្រសួងសុខាភិបាល ជួយស្វែងរកមធ្យោបាយធ្វើយ៉ាងណាដើម្បីពន្លឿនឆាប់បានចេញនូវច្បាប់ស្តីពីការគ្រប់គ្រងសុខាភិបាល ។
ព័ត៌មានជាតិ ថ្មីៗ
លោកស្រី Lenna Neat Arango នាយិកាស្តីទីការិយាល័យសុខភាពសាធារណៈ និងអប់រំទីភ្នាក់ងារសហរដ្ឋអាមេរិកសម្រាប់ការអភិវឌ្ឍ (USAID) ប្រចាំកម្ពុជា ថ្លែងថា៖ស្តង់ដារអប្បបរមានេះ ជាឧបករណ៍ប្រើប្រាស់និងមានសារៈសំខាន់ណាស់ វានឹងជួយដល់ប្រព័ន្ឋមូលដ្ឋានសុខាភិបាលឯកជននៅកម្ពុជា សម្រាប់ធ្វើការវាស់ស្ទង់ ពិនិត្យនិងវាយតម្លៃទៅលើដំណើរការនៃការប្រតិបត្តិការងាររបស់វិស័យសុខាភិបាលឯកជននៅកម្ពុជា។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល មានប្រសាសន៍ថា ៖ការបង្កើតស្តង់ដាអប្បបរមានេះ មានការចូលរួមពីអ្នកឯកទេសជំនាញ តំណាងមូលដ្ឋានសុខាភិបាល ឯកជន និងដៃគូរអភិវឌ្ឍសុខាភិបាលព្រមទាំងក្រុមគ្រូពេទ្យជំនាញថ្នាក់ជាតិ និងបានធ្វើតេស្តសាកល្បង យកទៅវាយតម្លៃ ប្រភេទគ្លីនិក និងបានកែលម្អជាលំដាប់ រហូតដល់បានឯកភាពជាផ្លូវការទទួលស្គាល់ថា ស្តង់ដា នេះពិតប្រាកដ ដូចនេះក្នុងនាមក្រសួងសុខាភិបាល សូមថ្លែងអំណរគុណយ៉ាងជ្រាលជ្រៅចំពោះម្ចាស់ ឬប្រធានមូលដ្ឋានសុខាភិបាលឯកជនគ្រប់ប្រភេទទាំងអស់ ដែលមានឆន្ទៈចូលរួមពង្រឹងការ អនុវត្តនូវស្តង់ដាអប្បបរមា ជាពិសេសបានយកស្តង់ដាអប្បបរមានេះ ទៅធ្វើការវាយតម្លៃសេវារបស់ខ្លួនដោយ ផ្ទាល់ រួចត្រៀមខ្លួនចូលរួមការប្រគួតប្រជែងគ្នា និងប្រឡងប្រណាំងគ្នាយកស្នាដៃពីក្រសួងសុខាភិបាលក្នុងស្នើ សុំបើក និងបន្តរសុពលភាពដើម្បីឲ្យការអនុវត្តនូវស្តង់ដាអប្បបរមាទទួលបាននូវប្រសិទ្ធភាពខ្ពស់។
លោកជំទាវវេជ្ជបណ្ឌិតរដ្ឋលេខាធិការក្រសួងសុខាភិបាល បន្តថា មូលដ្ឋានសុខាភិបាលឯកជន ជាដៃគូរអភិវឌ្ឍជាមួយ សេវាសាធារណៈដែលមិនអាចខ្វះបាន និងជួយបំពេញបន្ថែមជំរុញលើកស្ទួយវិស័យសុខាភិបាល ដើម្បីធានាការលើកកម្ពស់គុណភាព និងសុវត្ថិភាពសេវាសុខាភិបាល និងឆ្ពោះទៅរកការគ្របដណ្តប់សុខភាពជាសកល នៅព្រះរាជាណាចក្រកម្ពុជា ខណៈក្រសួងសុខាភិបាល បានដាក់ឲ្យអនុវត្តស្តង់ដាអប្បបរមា នៅសុខាភិបាលឯកជននេះ ក្នុងគោលបំណងលើកកម្ពស់គុណភាព និងសុវត្ថិភាពសេវាសុខាភិបាលឯកជននៅព្រះរាជាណាចក្រកម្ពុជា ដើម្បី អភិវឌ្ឍធនធានមនុស្ស តាមរយៈការលើកកម្ពស់សុខភាពសិក្សា និងឆ្លើយតបទៅនឹងយុទ្ឋសាស្ត្ររបស់រាជរដ្ឋាភិបាលបានដាក់ចេញចក្ខុ វិស័យក្នុងការប្រែក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់ ក្នុងឆ្នាំ២០៣០ និងទៅជាប្រទេសដែលមានប្រាក់ចំណូលខ្ពស់ក្នុងឆ្នាំ២០៥០៕
អត្ថបទ និង រូបថត ៖ លោក យូ វង្ស លោក បូ សាវី
កែសម្រួលអត្ថបទ ៖ លោក លីវ សាន្ត
