លោក ឡុង បូនី ដែលជាអតីតយុទ្ធជនដែលពិការភាពដោយសារសង្គ្រាម និងមានជំងឺប្រចាំកាយ ហើយបច្ចុប្បន្នកំពុងមានជីវភាពខ្វះខាត មានទីលំនៅក្នុងឃុំអំពិល ឃុំសំបួរ ស្រុកក្រឡាញ់ ខេត្តសៀមរាប បានទទួលអំណោយនូវរទេះរុញមួយគ្រឿង រួមនឹងគ្រឿងបរិភោគ និងថវិការមួយចំនួន ពីឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកក្រឡាញ់ ខេត្តសៀមរាប នៅព្រឹកថ្ងៃទី១១ ខែមិថុនា ឆ្នាំ២០២២នេះ តាមរយៈឯកឧត្តម ធឹម សំផូត ទីប្រឹក្សាក្រសួងព័ត៌មាន រួមជាមួយនឹងក្រុមការងារ ដោយមានការចូលរួមពីអាជ្ញាធរស្រុកផងដែរ។
ក្នុងឱកាសនោះ ឯកឧត្តម ធឹម សំផូត បានមានប្រសាសន៍ផ្ដាំផ្ញើ សួរសុខទុក្ខពីសំណាក់ឯកឧត្តម ជា ច័ន្ទបរិបូរណ៍ ជូនចំពោះបងប្អូនប្រជាពលរដ្ឋក្នុងមូលដ្ឋាន ដែលកន្លងមកឯកឧត្តម តែងតែយកចិត្តទុកដាក់អំពីសុខទុក្ខរបស់ប្រជាពលរដ្ឋក្នុងមូលដ្ឋានយើង។ ជាក់ស្ដែងក្នុងឱកាសនេះទោះឯកឧត្តម មិនបានអញ្ជើញមកជួបជាមួយបងប្អូនផ្ទាល់ តែឯកឧត្តមក៏បានចាត់ឲ្យក្រុមការងារនាំយកនូវអំណោយជារទេះរុញមួយគ្រឿង រួមនឹងគ្រឿងបរិភោគ និងថវិការមួយចំនួន ជូនដល់លោកពូ ឡុង បូនី ដែលជាអតីតយុទ្ធជនម្នាក់ដែលពិកាដោយសារសង្គ្រាម ហើយបច្ចុប្បន្នកំពុងមានជីវភាពខ្វះខាត។ ចំពោះរទេះរុញនេះដែរ ឯកឧត្តមជឿថា វានឹងអាចជួយសម្រួលដល់សកម្មភាពប្រចាំថ្ងៃរបស់លោកពូ សម្រាប់ការធ្វើដំណើរទៅកន្លែងផ្សេងៗ។
ឯកឧត្តម ធឹម សំផូត ក៏បានណែនាំឲ្យពលរដ្ឋយើងនៅពេលមានបញ្ហាសុខភាព ត្រូវប្រញាប់ទៅមន្ទីរពេទ្យដែលនៅជិតផ្ទះបំផុត ហើយប្រសិនបើមានការខ្វះខាត ឬបញ្ហាផ្សេងៗកើតឡើង ត្រូវផ្តល់ដំណឹងទៅអាជ្ញាធរ ភូមិ ឃុំ សង្កាត់ ដើម្បីឲ្យអាជ្ញាធរជួយដោះស្រាយឲ្យបានទាន់ពេលវេលា ដោយសារតែអាជ្ញាធរមូលដ្ឋាន ជាអ្នកនៅជិតបងប្អូនបំផុត ហើយអាចដឹងពីសុខទុក្ខរបស់បងប្អូនបានច្រើនទៀតផង។
ជាការអរគុណ លោក ឡុង បូនី បានបង្ហាញ់អារម្មណ៍រំភើបរីករាយ និងសូមអរគុណដល់ ឯកឧត្តម ជា ច័ន្ទបរិបូរណ៍ រួមជាមួយនឹងក្រុមការងារ និងអាជ្ញាធរមូលដ្ឋានគ្រប់ជាន់ថ្នាក់ ដែលតែងតែយកចិត្តទុក្ខខ្ពស់ ចំពោះសុខទុក្ខ និងជីវភាពរស់នៅប្រចាំថ្ងៃ របស់ប្រជាពលរដ្ឋក្នុងមូលដ្ឋាន។ ចំពោះអំណោយដែលទទួលបាននាពេលនេះដែរ វាពិតជាបានជួយសម្រួលច្រើនណាស់សម្រាប់ជីវភាពប្រចាំថ្ងៃរបស់លោក និងក្រុមគ្រួសារ។
នៅព្រឹកដដែលនេះដែរ ឯកឧត្តម ធឹម សំផូត និង លោក សុខ ណារ៉េត អភិបាលរងស្រុកក្រឡាញ់ រួមនឹងក្រុមការងារ បានបន្តចុះសួរសុខទុក្ខលោកយាយម្នាក់ ដែលជាជនចាស់ជរាមានជំងឺធ្ងន់ធ្ងង ហើយកំពុងសម្រាកព្យាបាលនៅផ្ទះ។ ជាមួយគ្នានោះដោយពិនិត្យមើលពីស្ថានភាពជំងឺរបស់លោកយាយមានសភាពធ្ងន់ធ្ងង ក្រុមការងារក៏បានទាក់ទងទៅកាន់មន្ទីរពេទ្យបង្អែកស្រុកក្រឡាញ់ ដើម្បីបញ្ជូនលោកយាយទៅកាន់មន្ទីរពេទ្យបង្អែកស្រុកព្យាបាលភ្លាមៗផងដែរ៕
អត្ថបទ និង រូបភាព៖ លោក អ៊ុន ណារាជ្យ
