មន្ត្រីជាន់ខ្ពស់ក្រសួងអប់រំ៖ បើចង់កសាងនិងអភិវឌ្ឍប្រទេស ចាំបាច់ត្រូវមានធនធានមនុស្ស និងបែបផែនផលិតកម្មទំនើបតាមកាល:ទេស: និងការរីកចម្រើន នៃពិភពលោក។ នៅព្រឹកថ្ងៃទី១២ ខែមិថុនា ឆ្នាំ២០២២នេះ បានបើកការប្រលងជ្រើសរើសសិស្សពូកែ ផ្នែកអក្សរសិល្ប៍ គណិតវិទ្យា និងរូបវិទ្យា សម្រាប់ថ្នាក់ទី៩ និងថ្នាក់ទី១២ ទូទាំងប្រទេសលើកទី២៦ នៅខេត្តសៀមរាប។ ការប្រលងនេះ ធ្វើឡើង មានរយ:ពេល ៣ថ្ងៃ ចាប់ពីថ្ងៃទី១៣ ដល់ថ្ងៃទី១៥ ខែមិថុនា ឆ្នាំ២០២២ នៅវិទ្យាល័យ១០ មករា១៩៧៩ នាក្រុងសៀមរាប។ ក្រោមអធិបតីភាពដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ណាត ប៊ុនរឿន រដ្ឋលេខាធិការ ក្រសួងអប់រំ យុវជន និងកីឡា និងលោក អុឹង គឹមលាង អភិបាលរងខេត្ដសៀមរាប ។
ឯកឧត្ដមបណ្ឌិតសភាចារ្យ ណាត ប៊ុនរឿន រដ្ឋលេខាធិការ ក្រសួងអប់រំ យុវជន និងកីឡា មានប្រសាសន៍ថា ការប្រលងជ្រើសរើសយកជ័យលាភីសិស្សពូកែនេះ មានថ្នាក់ទី៩ និង ថ្នាក់ទី១២ ក្នុងនោះ មានចំនួន១០នាក់ ក្នុងមួយមុខវិជ្ជា និងមួយកម្រិតថ្នាក់ ដែលក្រសួងជ្រើសរើសបាន តែងមានគុណសម្បត្តិសក្តិសមទៅតាមគោលបំណងរបស់ក្រសួង ទាំងក្នុងការជ្រើសរើសឱ្យបន្តការសិក្សានៅថ្នាក់ឧត្តមសិក្សា ក៏ដូចជាការប្រកួតប្រជែងយកអាហារូបករណ៍ទៅបរទេសដែរ។ ឯកឧត្ដម បានបន្ដថា ស្របពេលបច្ចេកវិជ្ជា និងវិទ្យាសាស្ត្រទំនើបមានសន្ទុះរីកចម្រើនខ្លាំងក្លា ដែលជាហេតុនាំឱ្យនិន្នាការពិភពលោក និងប្រទេសក្នុងតំបន់កំពុងយកចិត្តទុកដាក់បណ្ដុះបណ្ដាលជួរអ្នកប្រាជ្ញជំនាន់ថ្មីវ័យក្មេង ឱ្យមានសមត្ថភាព តាមទាន់របត់នៃចំណេះដឹងវិទ្យាសាស្ត្រជឿនលឿន និងដើម្បីបម្រើសេចក្តីត្រូវការរបស់សង្គមជាតិនីមួយៗ។ ឯកឧត្ដមបន្ថែមថា ទោះបី ប្រទេសជាតិសម្បូរទៅដោយធនធានធម្មជាតិច្រើនយ៉ាងណាក៏ដោយ ប៉ុន្ដែបើខ្វះធនធានមនុស្សនោះ ធនធានធម្មជាតិ និងកំណប់ក្នុងដីទាំងឡាយក៏គ្មានប្រយោជន៍ដែរ ព្រោះថា “កំណប់ដែលជីក យកបានពីក្នុងខួរក្បាលមនុស្ស ប្រសើរជាងកំណប់ដែលជីកយកបានពីក្នុងដី”ដូច្នេះកម្ពុជាកំពុងត្រូវការចាំបាច់នូវធនធានមនុស្សជាអ្នកចេះដឹងសម្រាប់ អភិវឌ្ឍប្រទេសជាតិឱ្យដើរទាន់ប្រទេសក្នុងតំបន់ និងអរិយប្រទេសនៅលើពិភពលោក ទើបក្រសួងអប់រំ យុវជន និងកីឡា និងរាជរដ្ឋាភិបាលតែងយក ចិត្តទុកដាក់ ជាពិសេសចំពោះក្មួយៗយុវជន ដែលមានទេពកោសល្យខ្ពស់ ពូកែ ពីព្រោះពួកគាត់ជាសសរទ្រូងដ៏រឹងមាំរបស់ប្រទេសជាតិ នាពេលអនាគត។
យោងតាមរបាយការណ៍ប្រធានគណ:គ្រប់គ្រងនាយកដ្ឋានកិច្ចការប្រលង ស្ដីពីការរៀបចំប្រលងជ្រើសរើសសិស្សពូកែទូទាំងប្រទេសនៃក្រសួងអប់រំ យុវជននិងកីឡា បានបង្ហាញថា ការប្រលងជ្រើសរសើសិស្សពូកែទូទាំងប្រទេសនេះ គឺជាលើកទី២៦ហើយ ដែលមានបេក្ខជនមកពីបណ្តារាជធានី ខេត្តទាំង២៥ តាមមុខវិជ្ជា ត្រូវបានកំណត់យកតាមសមាមាត្រចំនួនសិស្ស ដែលកំពុងសិក្សាជាក់ស្តែង លើកលែងតែខេត្ដតូច ក្រសួងអនុញ្ញាតឱ្យបញ្ជូនបេក្ខជនម្នាក់ក្នុងមួយមុខវិជ្ជា និងក្នុងមួយកម្រិតថ្នាក់។របាយការណ៍បន្ដថា បេក្ខជនដែលត្រូវមកចូលរួមប្រឡងនៅពេលនេះ មានចំនួន ៤៨០នាក់ មកពី២៩៤សាលា លើចំនួនគ្រឹះស្ថានមធ្យមសិក្សាសរុប ១,៨១២កន្លែង នៅទូទាំងប្រទេស។ ក្នុងចំនួន ៤៨០នាក់នេះ បេក្ខជនថ្នាក់ទី៩ មានចំនួន ២៤០នាក់ ស្រី ១៤៩នាកើ។ បេក្ខជនថ្នាក់ទី១២ មានចំនួន២៤០ ស្រី ១២២នាក់។ បើគិតតាមមុខវិជ្ជា ដែលមានអត្រាបេក្ខនារីចូលរួមប្រឡងផ្នែកអក្សរសិល្ប៍ខ្មែរ ថ្នាក់ទី៩ ចំនួន៦៣ នាក់និងថ្នាក់ទី១២ ចំនួន ៦០នាក់។ ចំពោះមុខវិជ្ជាគណិតវិទ្យា ថ្នាក់ទី៩ចំនួន ៤០នាក់ និងថ្នាក់ទី១២ ចំនួន ៣១នាក់។ ចំណែកឯមុខវិជ្ជារូបវិទ្យាវិញ បេក្ខនារីចូលរួមថ្នាក់ទី៩ ចំនួន៤៦នាក់ និងថ្នាក់ទី១២ ចំនួន ៣១នាក់។ របាយការណ៍ដដែលបញ្ជាក់ថា បេក្ខនារីចូលរួមដណ្តើមជ័យលាភីសិស្សពូកែទូទាំងប្រទេសសម្រាប់ឆ្នាំ២០២២នេះ មានភាគរយខ្ពស់ជាងបុរស នៅលើមុខវិជ្ជាអក្សរសិល្ប៍ខ្មែរ សម្រាប់ថ្នាក់ទី៩ និងថ្នាក់ទី១២ និងមុខវិជ្ជារូបវិទ្យា ថ្នាក់ទី៩, ចំណែកមុខវិជ្ជាគណិតវិទ្យា ថ្នាក់ទី៩ មានភាគរយស្មើគ្នា ប៉ុន្តែបែរជាថយ ៩នាក់ សម្រាប់មុខវិជ្ជាគណិតវិទ្យា និងរូបវិទ្យា ថ្នាក់ទី១២។
សូមរំលឹកថា កាលពីឆ្នាំ១៩៩៣ ជ័យលាភីលេខ ១ ផ្នែកគណិតវិទ្យា ថ្នាក់ទី១២ បានប្រឡងជាប់ចូលរៀននៅបណ្ឌិតសភាយោធាសហរដ្ឋអាមេរិក ហើយចាប់តាំងពីឆ្នាំ២០០៤មក ក្រសួងបាននាំយកមេដាយ និងពានរង្វាន់នានាមកជូនជាតិមាតុភូមិជាបន្តបន្ទាប់ផងដែរ៕
អត្ថបទ និងរូបភាព: លោកបូ សាវី និងលោកយូ វង្ស កែសម្រួលដោយ លីវ សុខុន
