នៅមណ្ឌលសុខភាព សង្កាត់គោកចក ក្រុងសៀមរាប ខេត្តសៀមរាប បានទទួលអំណោយពីសមាគមសម្ព័ន្ធប្រជាជន ដើម្បីសន្តិភាពប្រចាំខេត្តសៀមរាប កាលពីរសៀលថ្ងៃទី១៤ ខែមិថុនា ឆ្នាំ២០២២។ កម្មវិធីនេះ បានប្រព្រឹត្តិទៅដោយមានការអញ្ជើញចូលរួមពីសំណាក់
លោក ឈើន ប៊ុននិត ប្រធានប្រតិបត្តិស្រុកប្រាសាទបាគងសម្ព័ន្ធប្រជាជន ដើម្បីសន្តិភាពលោក អូន សំអាត នាយករងអាកាសយានដ្ឋានអន្តរជាតិខេត្តសៀមរាបលោក វ៉ាន់ វណ្ណរ៉ា ប្រធានសមាគមសម្ព័ន្ធប្រជាជន ដើម្បីសន្តិភាពប្រចាំខេត្តសៀមរាប និងជាទីប្រឹក្សាផ្ទាល់សម្តេចព្រះមហាសង្ឃរាជ ប៊ូ គ្រី គណ:ធម្មយុត្តនិកាយ នៃព្រះរាជាណាចក្រកម្ពុជាលោកស្រី ភាសម្បូ លីណា ប្រធានមណ្ឌលសុខភាពសង្កាត់គោកចក និងអាជ្ញាធរឃុំ ព្រមទាំងក្រុមការងារជាច្រើននាក់ផងដែរ។
លោក វ៉ាន់ វណ្ណរ៉ា ប្រធានសមាគមសម្ព័ន្ធប្រជាជនដើម្បីសន្តិភាពប្រចាំខេត្តសៀមរាប មានប្រសាសន៍ថា ដោយបច្ចុប្បន្ននេះ យើងមើលឃើញពីភាពលំបាក និងការខ្វះខាតមួយចំនួន នៅក្នុងមណ្ឌលសុខភាព ក៏ដូចជាការរស់នៅរបស់បងប្អូនប្រជាពលរដ្ឋ មិនថានៅប្រទេសកម្ពុជានោះទេ គឺនៅបណ្តាប្រទេសលើសកលលោក បាននឹងកំពុងជួបនូវវិបត្តិដោយសារការរាតត្បាតនៃជំងឺកូវីដ-១៩។ ដូច្នេះហើយ យើងត្រូវចូលរួមចំណែកជាមួយរាជរដ្ឋភិបាល ដើម្បីជួយសម្រាលទុក្ខលំបាករបស់បងប្អូនប្រជាពលរដ្ឋក្រីក្រ ដែលងាយរងគ្រោះបំផុតនៅកម្ពុជា និងការកាត់បន្ថយភាពក្រីក្រជាដើម។ លោក វ៉ាន់ វណ្ណរ៉ា បានបន្តថា បើទោះបី ប្រទេសកម្ពុជា មានអត្រាការឆ្លងមិនច្រើនដូចបណ្ដាប្រទេសនានាលើសកលលោកក៏ដោយ ក៏ប៉ុន្ដែយើងត្រូវតែបន្ដការប្រុងប្រយ័ត្នខ្ពស់ និងអនុវត្ដឱ្យបានខ្ជាប់ជានិច្ច តាមវិធានការទប់ស្កាត់របស់ក្រសួងសុខាភិបាល គឺត្រូវរក្សាគម្លាត អនាម័យដៃស្អាត លាងជាមួយសាប៊ូ អាកុល ជែលជាដើម។ កន្លងមកក្រុមការងារ «សមាគមសម្ព័ន្ធប្រជាជនដើម្បីសន្តិភាពប្រចាំខេត្តសៀមរាប» ក៏បាននាំយកនូវសម្ភារ:ខ្លះៗ សម្រាប់ប្រើប្រាស់ប្រយុទ្ធនឹងជំងឺកូវីដ-១៩ ដើម្បីជួយសម្រាលការលំបាកពីការប្រឈមរបស់បងប្អូនប្រជាពលរដ្ឋនៅតាមតំបន់ផ្សេងៗ ទៀតជាច្រើនផងដែរ។
លោកស្រី ភាសម្បូ លីណា ប្រធានមណ្ឌលសុខភាពសង្កាត់គោកចក បានថ្លែងអំណរគុណយ៉ាងជ្រាលជ្រៅចំពោះ សកម្មភាពមនុស្សធម៌របស់សមាគមសម្ព័ន្ធប្រជាជនដើម្បីសន្តិភាពប្រចាំខេត្តសៀមរាបនេះ ដែលបាននាំមកនូវអំណោយសម្ភារ: និងលះបង់ធនធានផ្ទាល់ខ្លួនជួយដល់ការងារសង្គម ក្នុងការកាត់បន្ថយនៅភាពក្រីក្រ ក៏ដូចជាការចូលរួមចំណែកអភិវឌ្ឍន៍ជាមួយរាជរដ្ឋាភិបាលផងដែរ។ អំណោយសប្បុរសជនជារួម៖ មានកៅអី៣០, កុំព្យូទ័រ ១គ្រឿង, ទឹកបរិសុទ្ធ ២០យួរ, អង្ករសុខភាព ១០កេស, សារ៉ុង ចំនួន ១០ និងកន្សែងរុំទារកចំនួន ១ឡូ ដើម្បីជួយដល់អ្នកម្តាយក្រីក្រ ដែលបានមកសំរាលទារកនៅក្នុងមណ្ឌលផងដែរ។
សូមបញ្ជាក់ថា បន្ទាប់ពីប្រគល់អំណោយសប្បុរសធម៌ជូនដល់មណ្ឌលសុខភាពគោកចករួចមក លោក វ៉ាន់ វណ្ណរ៉ា ប្រធានសមាគមសម្ព័ន្ធប្រជាជនដើម្បីសន្តិភាពប្រចាំខេត្តសៀមរាប ក៏បានដឹកនាំក្រុមការងារចុះទៅពិនិត្យមើលការជួសជុលផ្លូវក្រាលគ្រួសក្រហមមួយខ្សែប្រវែង ១,២០០ម៉ែត្រ ដែលក្រុមការងាររបស់លោកផ្តល់ជូនសហគមន៍ ស្ថិតនៅភូមិជ្រៃ ឃុំកណ្តែក ស្រុកប្រាសាទបាគងខេត្តសៀមរាប តាមសំណូមពរប្រជាពលរដ្ឋ។
អត្ថបទ និងរូបភាព: លោកស៊ាន សុផាត កែសម្រួលដោយ លីវ សុខុន!!!
