លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា ក្រោមការយកចិត្តទុកដាក់របស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បាននាំប្រទេសកម្ពុជា ចាកចេញពីភាពក្រីក្រ និងកំណត់គោលដៅជាប្រទេសដែលមានចំណូលមធ្យមកំរិតខ្ពស់នៅឆ្នាំ២០៣០ខាងមុខនេះ ហើយការកំណត់បែបនេះមិនមែនជាការចៃដន្យនោះទេ ប៉ុន្តែវាស្តែងចេញពីសកម្មភាពពិត និងការចូលរួមពីគ្រប់ភាគី ជាពិសេសការចូលរួមពីយុវជន ហើយការចាប់យកជំនាញយ៉ាងតិចមួយ សម្រាប់យុវជនម្នាក់ គឺជាកម្លាំងចលករយ៉ាងសំខាន់នៅក្នុងការជំរុញកំណើនសេដ្ឋកិច្ចកម្ពុជា ឲ្យសម្រេចបាននូវគោលដៅក្លាយជាប្រទេសអភិវឌ្ឍន៍នៅឆ្នាំ២០៥០។
លោក នាក់ ណេរ៉ុន មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីក្នុងពិធីអបអរសាទរទិវាជាតិអប់រំបណ្តុះបណ្តាលបច្ចេកទេសវិជ្ជាជីវៈ លើកទី៥ ឆ្នាំ២០២២ ក្រោមប្រធានបទ”TVETបង្កើនផលិតភាពការងារ និងភាពប្រកួតប្រជែងខ្ពស់” នៅវិទ្យាស្ថានជាតិពហុបច្ចេកទេសអង្គរ កាលពីព្រឹកថ្ងៃទី១៥ ខែមិថុនា ឆ្នាំ២០២២នេះ ។
លោក នាក់ ណេរ៉ុន បន្តថា ឆ្នាំនេះ យើងអាចរៀបចំប្រារព្ធទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៥ នេះបាន ស្របពេលដែលសភាពការណ៍ប្រទេសជាតិយើង បានសម្រេចជោគជ័យដ៏ធំធេងក្នុងការ ប្រយុទ្ធប្រឆាំងនឹងជំងឺកូវីដ-១៩ ដែលយើងអាចគ្រប់គ្រងបានយ៉ាងល្អប្រសើរ ធ្វើឱ្យលែងមានអ្នកឆ្លងជំងឺ កូវីដ-១៩ គ្មានអ្នកស្លាប់ ពិសេស នៅក្នុងកាលៈទេសៈដែលប្រទេសកម្ពុជា មានសុខសន្តិភាព រាជរដ្ឋាភិបាលបានយកចិត្តទុកដាក់យ៉ាងខ្លាំងនៅក្នុងការកសាងធនធានមនុស្ស ជាក់ស្តែងការបង្កើតឱកាសឲ្យយុវជន អាចរៀនជំនាញវិជ្ជាជីវៈបាននៅគ្រប់ទិសទីទូទាំងប្រទេស និងអាចមានសមត្ថភាពប្រកួតប្រជែងការងារនៅក្រៅប្រទេសតាមបរិបទបដិវត្តឧស្សាហកម្ម៤.០ ដូច្នេះដើម្បីសម្រេចគោលដៅរបស់រាជរដ្ឋាភិបាលក្នុងការក្លាយខ្លួនជាប្រទេសមានចំណូលមធ្យមកំរិតខ្ពស់នៅឆ្នាំ២០៣០នោះ ចាំបាច់ណាស់ដែលយុវជនកម្ពុជាម្នាក់ត្រូវចេះជំនាញមួយយ៉ាងតិច ។
លោកអភិបាលរងខេត្ត មានប្រសាសន៍បន្តថា រាជរដ្ឋាភិបាលកម្ពុជា បានចាត់ទុកការអភិវឌ្ឍប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ ជាអាទិភាពខ្ពស់បំផុតក្នុងគ្រប់ក្របខណ្ឌគោលនយោបាយជាតិ ហើយបានធ្វើការវិនិយោគយ៉ាងសន្ធឹកសន្ធាប់ លើវិស័យនេះ ដើម្បីខិតខំរត់តាមឱ្យទាន់មហិច្ឆតាក្នុងការអភិវឌ្ឍសេដ្ឋកិច្ចសង្គម និងការប្រែប្រួលយ៉ាង ឆាប់រហ័សនៃបច្ចេកវិទ្យា និងទីផ្សារការងារ ព្រមទាំងក្តីរំពឹងកាន់តែខ្ពស់របស់ប្រជាពលរដ្ឋក្នុងការមានការងារ ធ្វើល្អ និងកម្រិតជីវភាពកាន់តែប្រសើរឡើង ដោយធានាថា “យុវជនម្នាក់មានជំនាញមួយយ៉ាងតិចប្រចាំជីវិត។
លោកបន្តថា ដើម្បីផ្ដល់លទ្ធភាពទទួលបានការ បណ្ដុះបណ្តាលប្រកបដោយសមធម៌ រាជរដ្ឋាភិបាលបានពង្រីកការផ្តល់អាហារូបករណ៍កាន់តែច្រើនឡើង សម្រាប់យុវជនដែលបានបោះបង់ការសិក្សា ប្រជាពលរដ្ឋក្រីក្រ ស្ត្រី ជនពិការ កុមារកំព្រា ជនជាតិដើមភាគតិច ជនងាយរងគ្រោះ និងកម្មករនិយោជិតជាលទ្ធផលរយៈពេល ៥ឆ្នាំ ចុងក្រោយនេះ មានសិក្ខាកាម សិស្ស និស្សិត និងកម្មករនិយោជិតជាង ២០ម៉ឺននាក់ បានទទួលការបណ្តុះបណ្ដាល និងបញ្ចប់ការសិក្សាដោយ ជោគជ័យ ក្នុងការទទួលបានជំនាញថ្មី និងលើកកម្ពស់ជំនាញរបស់ខ្លួន ដោយបានចាប់យកឱកាសការងារល្អៗ ក៏ដូចជាការបង្កើតមុខរបរដោយខ្លួនឯង ក្នុងការបង្កើនប្រាក់ចំណូលក្នុងគ្រួសារ និងជួយលើកស្ទួយ សេដ្ឋកិច្ចជាតិបានយ៉ាងច្រើន៕
អត្ថបទ និងរូបភាព ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
