សាខាកាកបាទក្រហមកម្ពុជាខេត្តសៀមរាប សហការជាមួយមន្ទីរអប់រំ យុវជន និងកីឡាខេត្ត បានរៀបចំបើកវគ្គ ផ្សព្វផ្សាយ ស្តីពីការទប់ស្កាត់ការកេងប្រវ័ញ្ចផ្លូវភេទ និងឥរិយាបថអវិជ្ជមានរបស់សង្គមលើកុមារមានពិការភាពដល់ប្អូនៗ យុវជនកាកបាទក្រហមកម្ពុជា និងយុវសិស្សនៅវិទ្យាល័យអង្គរ នាព្រឹកថ្ងៃទី១៥ ខែមិថុនា ឆ្នាំ២០២២ ក្រោម កិច្ចសហការ គាំទ្រពីអង្គការ People’s Action for Inclusive Development (PAfID) និងអង្គការសកម្មភាពប្រជាជនដើម្បីការអភិវឌ្ឍន៍បរិយាបន្ន)។
មានប្រសាសន៍បើកវគ្គផ្សព្វផ្សាយនាពេលនោះដែរ លោក ស៊ិន កុសល ប្រធានការិយាល័យយុវជន នៃមន្ទីរអប់រំ យុវជន និងកីឡាខេត្តសៀមរាបបានលើកឡើងថា គោលបំណង នៃការបើកវគ្គផ្សព្វផ្សាយ ស្តីពីការទប់ស្កាត់ការកេងប្រវ័ញ្ចផ្លូវភេទ និងឥរិយាបថអវិជ្ជមានរបស់សង្គមលើកុមារមានពិការភាពដល់ប្អូនៗសិស្សានុសិស្ស នាពេលនេះ គឺ ដើម្បីចែករំលែកឲ្យប្អូនៗសិស្សានុសិស្សបានយល់ដឹង និងយកចិត្តទុកដាក់ប្រុងប្រយ័ត្នការពារខ្លួនក្នុងសម័យកាលរីកចម្រើនផ្នែកបច្ចេកវិទ្យាទំនើបយ៉ាងទូលំទូលាយ ដែលអាចឲ្យប្អូនៗងាយជឿតាមការអូសទាញ ការលួងលោម ចាញ់បោកគេធ្លាក់ចូលក្នុងការរំលោភបំពានផ្លូវភេទ និងការជួញដូរ ការកេងប្រវ័ញ្ចផ្លូវភេទ និងបង្កើនការយល់ដឹងពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ។ ការបានដឹងពីប្រព័ន្ធរាយការណ៍ដែលមានស្រាប់ ការស្វះស្វែងរកជំនួយគាំទ្រ និងការប្រើប្រាស់បច្ចេកវិទ្យាឌីជីថលប្រកបដោយភាពវិជ្ជមាន និងមានសុវត្ថិភាពផងដែរ ។
លោក ស៊ិន កុសល បានបន្តថា ក្នុងរយ:ពេលនៃការផ្ទុះជំងឺរាតត្បាតនៃជំងឺកូវីដ-១៩ ទូទាំងទាំងពិភពលោក គឺអំពើកេងប្រវ័ញ្ចផ្លូវភេទលើកុមារតាមប្រព័ន្ធអនឡាញត្រូវបានរកឃើញថា បានកើនឡើងជាលំដាប់ ហើយអំពើជួញដូររូបអាសអាភាសរបស់កុមារលើប្រព័ន្ធអុីនធឺណិតត្រូវបានកើតឡើងក្នុងបរិបទជាសកលស្របពេលកម្ពុជាក៏មានសន្ទុះកើនឡើងនៃការប្រើប្រាស់ប្រព័ន្ធអនឡាញរបស់កុមារក្នុងពេលបច្ចុប្បន្នផងដែរ ។
លោកស្រី សំ សាវ៉ាង មន្រ្តីការងារយុវជន សាខាកាកបាទក្រហមកម្ពុជាខេត្តសៀមរាប បានមានប្រសាសន៍ថា ក្នុងវគ្គផ្សព្វផ្សាយនាពេលនេះគឺប្រធានបទ ដែលលើកយកមកបង្ហាត់បង្ហាញដល់ប្អូនៗសិស្សានុសិស្សរួមមាន៖ -១.ការទប់ស្កាត់ការកេងប្រវ័ញ្ចផ្លូវភេទលើកុមារតាមអនឡាញ, ២.ការលើកកម្ពស់កុមារមានពិការភាពក្នុងការចូលរួមការងារសង្គម, ៣.បញ្រ្ជាបពីតួនាទី និងគោលការណ៍គ្រឹះទាំង៧ កាកបាទក្រហមកម្ពុជា ការងារយុវជនកាកបាទក្រហមកម្ពុជា និងសុវត្ថិភាពចរណ៍។
លោកស្រី សំសាវ៉ាង ក៏បានមានប្រសាសន៍បញ្ជាក់ថា៖ ដើម្បីបង្ការពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញនេះ សូមក្មួយៗមានការប្រុងប្រយ័ត្នការពារខ្លួនដូចខាងក្រោម៖ -គួរយល់ដឹងអំពីកម្មវិធីសុវត្ថិភាពថ្មីៗតាមអនឡាញ និងហានិភ័យនៃការប្រើប្រាស់អុីនធឺណិត -ប្រសិនបើមានការទទួលធ្វើមិត្តមើលទៅគួរឲ្យសង្ស័យសូមកុំទទួល -ត្រូវកំណត់ឯកជនភាពរបស់អ្នកថា មានតែមនុស្សត្រឹមត្រូវដែលអាចឃើញអ្វីអ្នកបានបង្ហោះ -ត្រូវចាត់ទុកថា ការធ្វើសកម្មភាពតាមអនឡាញប្រៀបបានដូចការធ្វើសកម្មភាពជាសាធារណ:ដែរ -សូមជៀសវាងផ្ញើរូបភាព ឫវីដេអូរបស់អ្នកទៅកាន់ជនមិនស្គាល់ -សូមមានការប្រុងប្រយ័ត្នពេលមានគេឲ្យកាដូតាមអនឡាញ -ត្រូវមានការប្រុងប្រយ័ត្នជានិច្ច ប្រសិនអ្នកសំរេចចិត្តជួបនរណាដោយផ្ទាល់ -ដាច់ខាតមិនត្រូវផ្ញើរូបអាក្រាតកាយទៅកាន់នរណាក៏ដោយ ទោះបីអ្នកនោះជាសាច់ញាតិ ឬជាមិត្តភក្តិជិតស្និតផងដែរ៕
អត្ថបទ និងរូបភាព: លោកទ្រា ពន្លឺកែសម្រួលដោយ លីវ សុខុន!!!
