ពិព័រណ៍ផលិតផលខ្មែរ បន្លែ និងផ្លែឈើ លើកទី១៥ និងយុទ្ធនាការទិញផលិតផលខ្មែរ ដែលមានរយៈពេល៤ថ្ងៃចាប់ពី រសៀលថ្ងៃទី១៦ដល់ថ្ងៃទី១៩ខែមិថុនាឆ្នាំ២០២២ បានចាប់បើកដំណើរការជាផ្លូវការហើយនៅក្បែរសួនព្រះរាជដំណាក់ក្រុងសៀមរាប ដែលរៀបចំដោយក្រសួងពាណិជ្ជកម្ម ក្នុងគោលបំណងជំរុញសកម្មភាពពាណិជ្ជកម្មក្នុងស្រុកឱ្យមានភាពរស់រវើក ការទទួលស្គាល់ និងគាំទ្រផលិតផលខ្មែរឱ្យកាន់តែប្រសើរឡើង ស្របតាមយុទ្ធសាស្ត្រសមាហរណកម្មពាណិជ្ជកម្មរបស់រាជរដ្ឋាភិបាលកម្ពុជា ក្នុងការជំរុញលើកកម្ពស់វិស័យពាណិជ្ជកម្ម និងការអភិវឌ្ឍន៍វិស័យឯកជន។
ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្ម បានលើកឡើងថា ពិព័រណ៍ពាណិជ្ជកម្មផលិតផលខ្មែរនេះ ក៏នឹងបង្កើនសកម្មភាពពាណិជ្ជកម្មនៅមូលដ្ឋាន ឱ្យមានភាពប្រទាក់ក្រឡាពីកសិដ្ឋានមកទីផ្សារ ជាវេទិកាផ្គូរផ្គងរវាងអ្នកផលិត និងអ្នកត្រូវការផលិតផលយកទៅចែកចាយបន្ត។
ឯកឧត្តមរដ្ឋលេខាធិការ បន្ថែមថា ក្នុងនោះយុទ្ធនាការទិញផលិតផលខ្មែរ ក៏នឹងរួមចំណែកពង្រឹងចង្វាក់ផលិតកម្មក្នុងស្រុក បង្កើតឱកាសការងារកាន់តែច្រើននៅ តាមមូលដ្ឋាន ដោយបានផ្តល់ចំណេះដឹង ចំណេះធ្វើ និងបទពិសោធន៍ល្អៗ ដល់ផលិតករកម្ពុជា សំដៅធ្វើយ៉ាងណាជំរុញពួកគាត់ផលិតនូវទំនិញ និងសេវា ដែលមានគុណភាព មានសុវត្ថិភាព មានអនាម័យល្អ មានតម្លៃសមរម្យ ដើម្បីបំផុសស្មារតីអ្នកប្រើប្រាស់ទូទៅ ឱ្យចូលរួមគាំទ្រ និងប្រើប្រាស់ផលិតផលក្នុងស្រុក ក្នុងការប្រកួតប្រជែងជាមួយទំនិញនាំចូលពីបរទេស ខណៈដែលកម្ពុជាកំពុងអនុវត្តន៍នូវរបបទីផ្សារសេរី។
ឯកឧត្តម ក៏បានអំពាវនាវដល់ជនរួមជាតិ សូមចូលរួមប្រើប្រាស់ទំនិញក្នុងស្រុកឱ្យបានច្រើនជាអតិបរមា ដើម្បីរួមចំណែកក្នុងការកសាងសេដ្ឋកិច្ចកម្ពុជាឱ្យកាន់តែរីកចម្រើន ជាពិសេសធ្វើឱ្យវិស័យពាណិជ្ជកម្មនៅតែបន្តរីកលូតលាស់ទទួលបានជោគជ័យប្រកបដោយចិរភាព។
អញ្ជើញក្នុងពិធីនោះ លោក នាក់ ណេរ៉ុន អភិបាលរងខេត្តសៀមរាប បានឡើងថា បច្ចុប្បន្ននេះ ខេត្តសៀមរាប មានមានផលិតផលសំខាន់ៗជាច្រើនដូចជា ស្រូវ ដំឡូងមី សណ្តែកបាយ កៅស៊ូ ក្រពើសិប្បកម្ម ផលិតផលកែច្នៃមានប្រហុក សាច់ក្រកជាដើម។ ក្រៅពីផលិតផលកសិ-ឧស្សាហកម្ម ខេត្តសៀមរាប ក៏មានដំណាំរួមផ្សំដូចជា បន្លែ និងផ្លែឈើ ហើយបច្ចុប្បន្ន ក្នុងចំណោមផលិតផលទាំងនោះ មានផលិតផលមួយចំនួន ត្រូវបានផលិតប្រកបដោយគុណភាព សោភ័ណ្ឌភាព សុវត្ថិភាព និងបានធ្វើការផ្គត់ផ្គង់មកកាន់ទីផ្សារ ដោយឡែកបន្លែ និងផ្លែឈើសុវត្ថិភាព បរិមាណផ្គត់ផ្គង់សម្រាប់ទីផ្សារនៅមិនទាន់គ្រប់គ្រាន់នៅឡើយ។
លោកអភិបាលរងខេត្តសង្ឃឹមថា ពិព័រណ៌ផលិតផលខ្មែរ បន្លែនិងផ្លែឈើកលើកទី១៥នាពេលនេះ នឹងផ្តល់អត្ថប្រយោជន៍ច្រើនដល់អ្នកផលិត និងអ្នកប្រើប្រាស់ទាំងសងខាង។ សកម្មភាពនេះ នឹងធ្វើឱ្យប្រសើឡើងនូវដំណើរការអាជីវកម្ម និងសមត្ថភាពប្រកួតប្រជែងរបស់ខ្លួន ក៏ដូចជាចូលរួមជំរុញឱ្យសេដ្ឋកិច្ចខេត្តសៀមរាប មានភាពល្អប្រសើរឡើងវិញក្រោយជួបវិបត្តិកូវិដ១៩៕
អត្ថបទ និងរូបភាព ៖ លោក ឃុត សៅ
កែសម្រួលអត្ថបទ ៖ លោក សេង ផល្លី
