ក្នុងឱកាសព្រះរាជពិធីចម្រើនព្រះជន្មាយុ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា គម្រប់ខួប៨៦ យាងចូល៨៧ព្រះវស្សា ថ្នាក់ដឹកនាំសាខាកាកបាទក្រហមកម្ពុជាខេត្តសៀមរាប និងមន្ត្រីរាជការក្នុងខេត្តសៀមរាប នៅព្រឹកថ្ងៃទី១៧ ខែមិថុនា ឆ្នាំ២០២២ បានរៀបចំពិធីសូត្រមន្តចម្រើនព្រះបរិត្ត និងប្រគេនចង្ហាន់ ទេយ្យទានព្រះសង្ឃ ដែលប្រារព្ធឡើងនៅវត្តរាជបូណ៌ ក្រុងសៀមរាប។ ពិធីនេះ ដោយបាននិមន្តព្រះសង្ឃចំនួន៨៧អង្គ មកពី១៣វត្ត ដើម្បីប្រគេនចង្ហាន់ស្រាក់ និងប្រព្រឹត្តតាមគន្លងព្រះពុទ្ធសាសនាផងដែរ។
នៅក្នុងពីធីសូត្រមន្តថ្វាយព្រះពរសម្តេចម៉ែ ត្រូវបានរៀបចំឡើង ក្រោមអធិបតីភាព ឯកឧត្តម ទៀ សីហា ប្រធានគណ:កម្មាធិការសាខា និងឯកឧត្តមបណ្ឌិតអ្នកឧកញ៉ា សៀង ណាំ ប្រធានកិត្តិយសសាខាកាកបាទក្រហមកម្ពុជា ខេត្តសៀមរាប និងវត្តមានឯកឧត្តម លោកជំទាវ គណ:កិត្តិយស គណ:កម្មាធិការសាខា អនុសាខាក្រុងសៀមរាប ថ្នាក់ដឹកនាំមន្ទីរ អង្គភាព ដូនជី តាជី ជាច្រើនរូបទៀត ។ នៅក្នុងសារលិខិតរបស់ប្រធានគណ:កម្មាធិការសាខាខេត្តដោយសេចក្តីថា៖ ក្នុងឱកាសដ៏នក្ខត្តឫក្សឧត្តុង្គឧត្តម នៃព្រះរាជពិធីចម្រើនព្រះជន្មវស្សាគម្រប់៨៦ យាងចូល៨៧ ព្រះវស្សារបស់សម្តេចព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីសក្ការ:ដ៏ខ្ពង់ខ្ពស់បំផុត ទូលព្រះបង្គំ ខ្ញុំម្ចាស់ទាំងអស់គ្នាជាសមាជិក សមាជិកាគណ:កម្មាធិការសាខា អនុសាខា មន្ត្រីរាជការ បុគ្គលិក អ្នកស្ម័គ្រចិត្ត និងយុវជនកាកបាទក្រហមកម្ពុជា ទូទាំងខេត្តសៀមរាប ជាកូន ជាចៅ ចៅទួតរបស់ព្រះអង្គ សូមព្រះបរមរាជានុញ្ញាតក្រាបបង្គំទូលថ្វាយ ព្រះរាជសព្ទសាធុការពរ បវរសួស្តី វិបុលសុខ មហាប្រសើរ ដោយគារវភក្តីភាពដ៏ខ្ពង់ខ្ពស់បំផុត។ ព្រមទាំងបានបួងសួងថ្វាយព្រះពរជ័យមហាប្រសើរថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាអម្ចាស់ជីវិតលើត្បូង ជាទីសក្ការ:ដ៏ខ្ពង់ខ្ពស់បំផុត សូមព្រះអង្គរមានព្រះរាជសុខភាពល្អបរិបូរណ៌ ព្រះកាយពលមាំមួន ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់របស់ប្រជារាស្ត្រជាកូន ចៅ ចៅទួតរបស់ព្រះអង្គតរៀងទៅ។ នាឱកាសនេះដែរក៏បានប្រគេន និងជូន៖ វត្តរាជបូណ៌ ថវិកា ១លានរៀល និង១០០ដុល្លារ – ព្រះសង្ឃ៨៧អង្គ ៖ ចង្ហាន់១ស្រាក់ និងថវិកា ៥ម៉ឺនរៀល- ដូនជី តាជី ២០នាក់ មា្នក់ៗ ក្រណាត់ស១ដុំ និងថវិកា១ម៉ឺនរៀលផងដែរ៕
ព័ត៌មានជាតិ ថ្មីៗ
អត្ថបទ និងរូបភាព: លោកយូ វង្ស និងលោកទ្រា ពន្លឺ កែសម្រួលដោយ លីវ សុខុន!!!
