ថ្លែងក្នុងពិធីបិទវគ្គបណ្តុះបណ្តាល “កម្រិតបឋមវិជ្ជាជីវៈនគរបាល” ជំនាន់ទី១៥ វគ្គទី១ ក្នុងក្របខណ្ឌមន្ត្រីនគរបាលជាតិ នាខេត្តសៀមរាប នៅព្រឹកថ្ងៃទី១៧ ខែមិថុនា ឆ្នាំ២០២២ ឯកឧត្តម សន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ បានលើកឡើងថា ការមានមន្ត្រីនគរបាលប៉ុស្តិ៍រដ្ឋបាលដែលខ្លាំង ទាំងចំណេះជំនាញ និងច្បាប់ខ្លាំង ទាំងការអនុវត្តតួនាទី ទាំងការគោរពនូវក្រមវិជ្ជាជីវៈ នោះមូលដ្ឋាននឹងមានសុខសុវត្ថិភាព ហើយដើម្បីបានមន្ត្រីនគរបាល ប៉ុស្តិ៍រដ្ឋបាលដែលខ្លាំង គឺត្រូវការបណ្តុះបណ្តាលជាចាំបាច់។
ឯកឧត្តមសន្តិបណ្ឌិត ចាន់ អ៊ាន បានបញ្ជាក់ថា ក្រសួងមហាផ្ទៃកម្ពុជា ដែលមានសម្តេចក្រឡាហោម ស ខេង ជារដ្ឋមន្ត្រី សម្តេចតែងតែយកចិត្តទុកដាក់ខ្លាំង នៅក្នុងការបណ្តុះបណ្តាល អប់រំ ដុសខាត់ សមត្ថភាពរបស់កងកម្លាំងនគរបាលជាតិ តាំងពីថ្នាក់ក្រោមរហូតដល់នាយឧត្តមសេនីយ៍ ក្នុងគោលបំណងលើកតម្លៃកិត្យានុភាពរបស់កងកម្លាំង រក្សាបាននូវសេចក្តីថ្លៃថ្នូ។
ក្នុងឱកាសនោះដែរឯកឧត្តមសន្តិបណ្ឌិត ក៏បានផ្ដល់អនុសាសន៍ដល់សិស្សនគរបាល ក្រោយបញ្ចប់វគ្គបណ្តុះបណ្តាលរយៈពេល ៤ខែ ត្រូវយកចំណេះដឹង និងជំនាញទៅប្រើប្រាស់ឱ្យមានប្រយោជន៍ដល់អង្គភាពការងារ និងមនុស្សទូទៅក្នុងសង្គម គោរពក្រមសីលធម៌វិជ្ជាជីវៈ មានស្មារតីទទួលខុស ត្រូវខ្ពស់លើការងារ គោរពប្រតិបត្តិច្បាប់ និងត្រូវមានអាកប្បកិរិយាល្អទាំងក្នុងការងារ និងការរស់នៅក្នុងសង្គម។ ឯកឧត្តម ក៏បានថ្លែងកោតសរសើរចំពោះកិច្ចខិតខំ ប្រឹងប្រែងបំពេញការងារដោយស្មារតីទទួលខុសត្រូវខ្ពស់ របស់បណ្ឌិត្យសភានគរបាលកម្ពុជា នាយកដ្ឋាន បុគ្គលិកសាលានគរបាលជាតិភូមិភាគ៤ និងអង្គភាពចំណុះពាក់ព័ន្ធទាំងអស់ ក្នុងការរៀបចំ និងចាត់ចែងឱ្យវគ្គបណ្តុះបណ្តាលនេះ ដំណើរការបានល្អ និងសម្រេចបានជោគជ័យ តាមផែនការដែលបានកំណត់។ ដើម្បីសម្រេចនូវគោលនយោបាយកំណែទម្រង់កងកម្លាំងប្រដាប់អាវុធរបស់រដ្ឋាភិបាល និងដោយយោងតាមស្ថានភាព នៃក្របខ័ណ្ឌមន្ត្រីនគរបាលជាតិមិនទាន់គ្រប់គ្រាន់ ក្រសួងមហាផ្ទៃបានដាក់ចេញនូវផែនការប្រចាំឆ្នាំ ក្នុងការជ្រើសរើសមន្ត្រីនគរបាលថ្មី ដើម្បីបំពេញបន្ថែម និងបន្តវេន និងធានាបាននូវនិរន្តរភាពនៃរដ្ឋបាលសាធារណៈក្នុងការក្សាសន្តិសុខ និងសណ្តាប់ធ្នាប់សាធារណៈជូនសង្គមជាតិ។
គួរឲ្យដឹងដែរថា តាមរបាយការណ៍របស់ លោកឧត្តមសេនីយ៍ទោ សាយ វិទ្ធិសក្ដិ នាយកសាលានគរបាលជាតិភូមិភាគ៤ ស្ថិតនៅភូមិក្រពើ ឃុំបល្ល័ង្គ ស្រុកប្រាសាទបាគង ខេត្តសៀមរាប បានបណ្តុះបណ្តាលសិស្ស នគរបាលជំនាន់ទី១៥ លើកទី១ មានសិស្សចំនួន ២០០នាក់ ជានារី ៣៤នាក់ ជាសិស្សនគរបាលមកពីស្នងការដ្ឋាននគរបាលខេត្តសៀមរាប ខេត្តឧត្តរមានជ័យ និងខេត្តបន្ទាយមានជ័យ ដែលបានប្រឡងជាប់ក្របខ័ណ្ឌក្នុងឆ្នាំ២០២០ កន្លងទៅនេះ។ វគ្គបណ្តុះបណ្តាលកម្រិតបឋមវិជ្ជាជីវៈនគរបាលនេះ មានរយៈពេល ៤ខែ ដែលបានចាប់ផ្តើមពីថ្ងៃទី១៧ ខែមករា និងបញ្ចប់នៅថ្ងៃទី១៦ ខែឧសភា ឆ្នាំ២០២២៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
