នាយកដ្ឋានអភិវឌ្ឍទីផ្សារនៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្ម នៅព្រឹកថ្ងៃទី១៧ ខែមិថុនា ឆ្នាំ២០២២នេះ បានសហការជាមួយមន្ទីរពាណិជ្ជកម្ម និងរដ្ឋបាលខេត្តសៀមរាប រៀបចំសិក្ខាសាលាស្តីពី «ការលើកកម្ពស់ផលិតផលខ្មែរ» ក្នុងគោលបំណងលើកកម្ពស់ និងផ្សព្វផ្សាយជូនសាធារណជនបានស្គាល់ និងដើម្បីជំរុញផលិតផលទាំងនេះចូលទីផ្សារក្នុងប្រទេសកម្ពុជាឱ្យបានកាន់តែទូលំទូលាយ និងសំដៅជំរុញការនាំចេញទៅកាន់ទីផ្សារអន្តរជាតិ។
ពិធិនេះប្រព្រឹត្តិទៅក្រោមអធិបតីភាព ឯកឧត្តម កៅ កោសល អគ្គនាយក នៃអគ្គនាយកដ្ឋាន ជំរុញពាណិជ្ជកម្ម ក្រសួងពាណិជ្ជកម្ម, លោក នាក់ ណេរ៉ុន អភិបាលរងខេត្ត ដោយមានការចូលរួមពីសំណាក់ ឯកឧត្តម លោកជំទាវ ប្រតិភូចំណុះក្រសួង លោក លោកស្រី ថ្នាក់ដឹកនាំមន្ទីរ អង្គភាព និងអង្គការដៃគូពាក់ព័ន្ធព្រមទាំង ផលិតករ សិប្បករ ពាណិជ្ជករ សហគមន៍ សមាគម ក្រុមហ៊ុនជាច្រើនទៀត។
លោក នាក់ ណេរ៉ុន អភិបាលរងខេត្ត មានប្រសាសន៍ថា ខេត្តសៀមរាបមានផលិតផលកសិកម្ម និងឧស្សាហកម្ម សក្តានុពលចំនួន ៧មុខ មានឈ្មោះសិប្បកម្ម សហគ្រាស និងផលិតផលដូចជា៖ ១.សិប្បកម្មនំមង្គលខ្មែរមានផលិតផលជានំដង្កូវ នំថោងងួន, ២.សហគ្រាស លី ធាងសេងមានផលិតផលជាសាច់ក្រក, ៣.សិប្បកម្មប្រហិត សាច់ក្រក ប៉ាតតេ ត្រីងៀត, ៤.សហគ្រាស សំ អ៊នរចនា ផលិតផលជាគ្រឿងប្រាក់, ៥.សហគ្រាសហូលីគ្រីក Holly Creek Wisky, ៦.សិប្បកម្ម ស្វាយអង្គរ ផលិតផលជានំដុតឃុកឃី,គ្រាប់ស្វាយចន្ទី និង៧.សិប្បកម្មកែច្នៃគ្រឿងសម្អាង ពន្លៃធម្មជាតិ ផលិតផលជាស្ត្រាប់ពន្លៃធម្មជាតិ ស្ត្រាប់កាហ្វេធម្មជាតិ សាប៊ូពន្លៃនិងកាហ្វេធម្មជាតិ។ ចំពោះផលិតផលកសិកម្ម និងឧស្សាហកម្មទាំង៧ នេះដែល ត្រូវបានជ្រើសរើស វាយតម្លៃ និងទទួលស្គាល់ដោយគណៈកម្មាធិការជាតិជំរុញចលនាភូមិមួយផលិតផលមួយ កាលពីថ្ងៃទី ២៧ ខែកញ្ញា ឆ្នាំ២០២១ ព្រមទាំងផលិតផលមួយចំនួនទៀត ត្រូវបានកត់សម្គាល់ថាជាផលិតផលសក្តានុពលរបស់ខេត្តសៀមរាប។
លោកអភិបាលរងខេត្តបន្តថា ពាក់ព័ន្ធនឹងវិស័យសហគ្រាសធុនតូច និងមធ្យមខេត្តសៀមរាប គឺកំពុងមានការរីកចម្រើនជាបន្តបន្ទាប់ តែការផលិតរបស់យើងនៅមានកម្រិត និងពុំទាន់ធានាតម្រូវការប្រើប្រាស់នៅឡើយ។ ជាមួយគ្នានេះ ផលិតករក្នុងស្រុកក៏មានជួបប្រទះនូវការលំបាក ក្នុងការប្រកួតប្រជែងផលិតផលរបស់ខ្លួន ជាមួយផលិតផលនាំចូល។ ការប្រឈមទាំងនេះបណ្តាលមកពីកត្តាជាច្រើន ដូចជាបរិបទនៃការចូលរួមនៅក្នុងពាណិជ្ជកម្មពិភពលោក ការធ្វើសមាហរណកម្មចូលទៅក្នុងសហគមន៍សេដ្ឋកិច្ចអាស៊ាន និងតម្រូវការរបស់អ្នកប្រើប្រាស់ដែលមានការផ្លាស់ប្តូរខ្លាំង។ ក្នុងនាមរដ្ឋបាលក៏សូមស្នើដល់បងប្អូន ជាម្ចាស់ផលិតករ សិប្បកម្ម អាជីវកម្ម ពាណិជ្ជករ កសិករ អ្នកផ្គត់ផ្គង់ និងដៃគូពាក់ព័ន្ធទាំងអស់ ប្រើប្រាស់ឱ្យអស់លទ្ធភាព និងសមត្ថភាពរបស់ខ្លួនក្នុងការផ្លាស់ប្តូរបទពិសោធន៍គ្នាក្នុងការផលិត ការផ្តល់ព័ត៌មានជូនដល់អ្នកទស្សនាទាំងអស់ និងស្វែងរកអតិថិជនសម្រាប់លក់ផលិតផលរបស់ខ្លួន។
ឯកឧត្តម កៅ កោសល អគ្គនាយកនៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្មមានប្រសាសន៍ថា ក្រោយពីរាជរដ្ឋាភិបាលកម្ពុជា ប្រកាសបិទបញ្ចប់ព្រឹត្តិការណ៍សហគមន៍ ២០ កុម្ភៈ ឆ្នាំ២០២១ និងបានសម្រេចដាក់ឱ្យប្រើប្រាស់នូវ “ក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ការរស់នៅក្នុងកាលៈទេសៈកូវីដ-១៩ តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣ ជាមួយនឹងទស្សនៈវិស័យនៃការចាកចេញពីវិបត្តិកូវីដ-១៩ ក្នុងភាពរឹងមាំ និងការវិលត្រឡប់ទៅរកមាគ៌ានៃកំណើននិងអភិវឌ្ឍន៍ប្រកបដោយចីរភាពឡើងវិញ។ រាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការបាននឹងកំពុងខិតខំធ្វើសមាហរណកម្មសេដ្ឋកិច្ចជាមួយ ប្រទេសនានានៅលើពិភពលោក តាមរយៈការចរចារ ដើម្បីដោះស្រាយបញ្ហារបាំងពន្ធគយ និងមិនមែនពន្ធគយ ធ្វើយ៉ាងណាអាចនាំទំនិញកម្ពុជាចេញទៅក្រៅប្រទេសបានដោយជោគជ័យ។
ឯកឧត្តមបន្ថថា ការធ្វើសមាហរណកម្មសេដ្ឋកិច្ច របស់កម្ពុជាតាមរយៈ៖ ១.ការបើកទីផ្សារនៅក្រៅប្រទេសក្នុងកម្រិតពហុភាគី និងតំបន់ ជាក់ស្តែងក្រសួងពាណិជ្ជកម្មបាន បង្កើតមជ្ឈមណ្ឌលពាណិជ្ជកម្មឯកជននៅក្រៅប្រទេសបាន ០៩ទីតាំងនៅប្រទេសចិនកំពុងដំណើការ និង០១ទីតាំងនៅប្រទេសជប៉ុនដែលនឹងគ្រោងសម្ពោធនៅខែមិថុនា ឆ្នាំ២០២២ ខាងមុខនេះ។ ២.ការពង្រឹងពាណិជ្ជកម្មទ្វេភាគី ដើម្បីនាំចេញផលិតផលសក្តានុពលកម្ពុជា។ ៣.ការពង្រឹងយន្តការគាំទ្រ, ៤.ការលុបបំបាត់សមត្ថកិច្ចក្នុងអង្គភាពពាក់ព័ន្ធមិនចាំបាច់នៅតាមច្រកទ្វារព្រំដែន។ ៥.ការផ្ទេរភារកិច្ចចេញវិញ្ញាបនបត្របញ្ជាក់ប្រភពដើមទំនិញ C/O ទម្រង់ (D) ទៅមន្ទីរពាណិជ្ជកម្មជាប់ ព្រំដែនសម្រាប់ផលិតផលកសិកម្ម។ ៦.ការកែប្រែការចុះបញ្ជីក្រុមហ៊ុន ការចុះបញ្ជីម៉ាក ការស្នើសុំវិញ្ញាបនបត្រនាំចេញ ពីការធ្វើដោយផ្ទាល់ មកធ្វើតាមប្រព័ន្ធស្វ័យប្រវត្តិកម្ម (តាមប្រព័ន្ធអនឡាញ) ដើម្បីកាត់បន្ថយបែបបទនីតិវិធីស្មុគស្មាញ កាត់បន្ថយពេលវេលា និងកាត់បន្ថយការចំណាយផ្សេងៗ ដែលមិនមានចែងក្នុងច្បាប់។ ៧.ការជួយជ្រោមជ្រែងនិងបង្កើតកម្មវិធីជំរុញពាណិជ្ជកម្ម តាមរយៈពិព័រណ៍ពាណិជ្ជកម្ម យុទ្ធនាការទិញផលិតផលខ្មែរ វេទិកាធុរកិច្ច ជំនួបពាណិជ្ជកម្មទាំងក្នុងនិងក្រៅប្រទេស។ ៨.ក្រសួងពាណិជ្ជកម្ម បានសម្ពោធឱ្យប្រើប្រាស់ផ្សារអេឡិចត្រូនិក (Cambolia Trade-e-marketplace) កាលពីថ្ងៃទី៣១ ខែមីនា ឆ្នាំ២០២២ ក្រោមអធិបតីភាព ឯកឧត្តមរដ្ឋមន្ត្រីក្រសួងពាណិជ្ជកម្មដើម្បី ផ្តល់ឱកាសជូន លោក លោកស្រី ផលិតករ សិប្បករ អាជីវករ ពាណិជ្ជករ អាចដាក់លក់ផលិតផលខ្មែរ តាមប្រព័ន្ធអនឡាញរបស់ក្រសួងពាណិជ្ជកម្ម ដោយឥតគិតថ្លៃ។
ឯកឧត្តម កៅ កុសល បញ្ជាក់ទៀតថា ទន្ទឹមនឹងការខិតខំធ្វើកិច្ចសម្រួលពាណិជ្ជកម្ម ការចរចាបើកទីផ្សារទាំងក្នុង និងក្រៅប្រទេស ដើម្បីជំរុញការនាំចេញផលិតផលកម្ពុជា ក្រសួងពាណិជ្ជកម្មបាននឹងកំពុងយកចិត្តទុកដាក់លើកិច្ចការអភិវឌ្ឍផលិតផលក្នុងស្រុកឱ្យក្លាយជាផលិតផលមានទីផ្សារ និងមានតម្លៃប្រកួតប្រជែងជាមួយផលិតផលបរទេស។ បន្ថែមពីនេះទៀត ដើម្បីទាញយកអត្ថប្រយោជន៍ជាអតិបរមាពីកិច្ចព្រមព្រៀងសេរីកម្ពុជា-ចិន កម្ពុជា-កូរ៉េ ដែលបានប្រកាសអនុវត្ត ជាផ្លូវការកាលពីថ្ងៃទី១ ខែមករា ឆ្នាំ២០២២។ ក្រសួងពាណិជ្ជកម្ម បានកំណត់យកផលិតផលសក្តានុពល ១០ មុខ រួមមាន៖ ស្រូវ-អង្ករ, ដំឡូងមី, ចេក, មៀនប៉ៃលិន, ស្វាយ, ស្វាយចន្ទី, សាច់សត្វ, ជ័រកៅស៊ូ, ម្ចាស់ និងម្រេច ដែលត្រូវជំរុញផលិតកម្ម និងការនាំចេញឱ្យបានកាន់តែច្រើនតាមដែលអាចធ្វើបាន៕
អត្ថបទ និងរូបភាព៖ យូ វង្ស
