នៅព្រឹកថ្ងៃទី២០ ខែមិថុនា ឆ្នាំ២០២២នេះ មន្ទីរអប់រំ យុវជន និងកីឡាខេត្តសៀមរាប បានបើកសន្និបាតបូកសរុបការងារឆ្នាំ២០២០-២០២១ និងទិសដៅការងារ ឆ្នាំសិក្សា២០២១-២០២២ នៅសាលាគរុកោសល្យ និងវិក្រិតការខេត្ត
ក្រោមអធិបតីភាពឯកឧត្តម ពិន ចំណាន រដ្ឋលេខាធិការប្រចាំការ ក្រសួងអប់រំ យុវជន និងកីឡា ឯកឧត្តម តោ គឹមស៊ាន សមាជិកក្រុមប្រឹក្សាខេត្ត តំណាងឯកឧត្ដមប្រធានក្រុមប្រឹក្សាខេត្ត និងលោក អ៊ឹង គឹមលាង អភិបាលរងខេត្តតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលនៃគណៈអភិបាលខេត្តសៀមរាប ដោយមានការអញ្ជើញចូលរួមពីសំណាក់លោក លោកស្រី ថ្នាក់ដឹកនាំមន្ទីរ អង្គភាពនានាក្នុងខេត្ត អភិបាលរងក្រុងស្រុកក្នុងខេត្ត ថ្នាក់ដឹកនាំការិយាល័យនៃមន្ទីរអប់រំខេត្ត ប្រធានការិយាល័យអប់រំ យុវជន និងកីឡាក្រុងស្រុក និងលោកគ្រូអ្នកគ្រូជាច្រើនរូបទៀត ។
បើតាមលោក លី ប៊ុនណា ប្រធានមន្ទីរអប់រំ យុវជន និងកីឡាខេត្តសៀមរាប បានឲ្យដឹងថា តាមរយៈការអនុវត្តគោលនយោបាយនៃផែនការយុទ្ធសាស្ត្រវិស័យអប់រំ ដែលធានាការអប់រំមាន គុណភាព ប្រកបដោយសមធម៌ និងបរិយាបន្ន និងលើកកម្ពស់ឱកាសិក្សាពេញមួយជីវិតសម្រាប់ទាំងអស់គ្នា ព្រមទាំងធានាភាពស័ក្តិសិទ្ធិ នៃភាពជាអ្នកដឹកនាំ និងគ្រប់គ្រងរបស់មន្ត្រីអប់រំគ្រប់លំដាប់ថ្នាក់ មន្ទីរអប់រំ យុវជន និងកីឡាខេត្តសៀមរាប បានរិះរកគ្រប់វិធីសាស្ត្រ គំនិតផ្តួចផ្តើមថ្មីៗ ដើម្បីកសាងនូវលក្ខខណ្ឌចាំបាច់នានា ជំរុញឱ្យវិស័យអប់រំ យុវជន និងកីឡា តម្រង់ឆ្ពោះទៅរកភាពរីកចម្រើន និងជោគជ័យ ព្រមទាំងឆ្លើយ តបទៅនឹងគោលដៅអភិវឌ្ឍន៍ប្រកបដោយចីរភាព ឆ្នាំ២០១៥-២០៣០។
លោក លី ប៊ុនណា បន្តថា គោលបំណងសំខាន់នៃអង្គសន្និបាតនេះ ដើម្បីធ្វើការពិភាក្សារកឲ្យឃើញនូវចំណុចខ្លាំងចំណុចខ្សោយ ដើម្បីរៀនសូត្រកែលម្អ សម្រាប់អភិវឌ្ឍបន្ត ពិសេសរកឲ្យឃើញនូវដំណោះស្រាយ បញ្ហាគន្លឹះសំខាន់ដែលមានឥទ្ធិពលដល់ការរីកចម្រើន និង អភិវឌ្ឍវិស័យអប់រំ រួមទាំងការកំណត់នូវនូវទិសដៅភារកិច្ច សម្រាប់អនុវត្តបន្ត ក្នុងឆ្នាំសិក្សា២០២១-២០២២ ស្របតាមបទពិសោធន៍ និង សក្ដានុពលជាក់ស្ដែងក្នុងមូលដ្ឋាននីមួយៗ ។
មានប្រសាសន៍ក្នុងឱកាសនោះឯកឧត្តម ពិន ចំណាន រដ្ឋលេខាធិការប្រចាំការ ក្រសួងអប់រំ យុវជន និងកីឡា បានបញ្ជាក់ថា ប្រទេសមួយមានការសិក្សាអប់រំ កាន់តែល្អប្រសើរ និងកាន់តែខ្ពស់ ប្រទេសជាតិនោះនឹងកាន់តែមានការអភិវឌ្ឍរីកចម្រើនយ៉ាងឆាប់រហ័ស ពោលគឺមានធនធានមនុស្ស វាជាគ្រឹះរឹងមាំនៃ ការអភិវឌ្ឍប្រទេសជាតិ ហើយសង្គមមួយមានការ អភិវឌ្ឍរីកចម្រើនខ្លាំងក្លា និងឆាប់រហ័ស វាអាស្រ័យលើប្រជាពលរដ្ឋនៃប្រទេសនោះ មានចំណេះដឹងខ្ពង់ខ្ពស់ និងសម្បូរអ្នកចេះដឹង ដូច្នេះវាទាមទារឱ្យមានការសិក្សាអប់រំកាន់តែខ្ពស់ផងដែរ ទើបអាចសម្រេចបាននូវភាពរីកចម្រើន និងការអភិវឌ្ឍនេះ។
ឯកឧត្តម ពិន ចំណាន មានប្រសាសន៍ទៀតថា ក្រសួងអប់រំបានដាក់ចេញ និងធ្វើកំណែទម្រង់ប្រព័ន្ធអប់រំ ដោយផ្តោតជាសំខាន់លើគុណភាពអប់រំ ដោយធ្វើយ៉ាងណាឱ្យធនធានមនុស្សនៅកម្ពុជា ក្លាយជាធនធានមនុស្សដែលពោរពេញទៅដោយសមត្ថភាព ចំណេះដឹងជ្រៅជ្រះ និងមានបទពិសោធន៍ខ្ពស់ នូវជំនាញពិតប្រាកដ ដូច្នេះដើម្បីសម្រេចបានការធ្វើកំណែទម្រង់ប្រព័ន្ធអប់រំ លុះត្រាបុគ្គលិកអប់រំទាំងអស់ ពិសេសលោកគ្រូ អ្នកគ្រូ និងនាយកសាលានានា ត្រូវពង្រឹងនូវការគ្រប់គ្រងសាលារៀនឱ្យមានវិន័យល្អពិសេសលើគ្រូបង្រៀនតែម្តង ហេតុនេះក្នុងនាមយើងជាគ្រូបង្រៀន និងជាអាណាព្យាបាលទី២ ដែលជាអ្នកអប់រំសិស្សានុសិស្សឱ្យក្លាយជាអ្នកចេះដឹង យើងត្រូវតែគោរព និងឱ្យតម្លៃទៅលើខ្លួនឯងជាមុនសិន ពិសេសគឺគោរពវិន័យឱ្យបានខ្ជាប់ខ្ជួន ព្រោះយើងជាគំរូសម្រាប់ឱ្យសិស្សគ្រប់គ្នាយកគំរូ និងរៀនសូត្រអនុវត្តន៍តាម ទើបធនធានមនុស្សរបស់យើងមានគុណធម៌ សីលធម៌ល្អ ហើយមិនតែប៉ុណ្ណោះចំណេះដឹងដែលពួកគាត់ទទួល បានមកនឹងចូលរួមធ្វើការអភិវឌ្ឍសង្គមជាតិរបស់យើង ឱ្យមានការរីកចម្រើនទៅថ្ងៃអនាគតផងដែរ ។
ជាមួយគ្នានេះដែរ ឯកឧត្តម ពិន ចំណាន បានធ្វើការវាយតម្លៃខ្ពស់ចំពោះវិស័យអប់រំនៅខេត្តសៀមរាប មានការរីកចម្រើន ដែលអាចវាយតម្លៃបានថា សមិទ្ធផលដ៏ថ្លៃថ្លាទាំងនេះ គឺពិតជាបានមកពីពលិកម្មដ៏ធំធេង ទាំងកម្លាំងកាយ ចិត្ត ប្រាជ្ញា ស្មារតី និង ធនធានសម្ភារៈ ថវិការបស់សង្គមទាំងមូល ពិសេសគំនិតផ្តួចផ្តើមគំរូដឹកនាំរបស់ថ្នាក់ដឹកនាំមន្ទីរ ការិយាល័យ នាយកសាលា លោកគ្រូ អ្នកគ្រូ សិស្សានុសិស្ស ព្រះសង្ឃ មាតាបិតា និងអាជ្ញាធរដែនដីគ្រប់ លំដាប់ថ្នាក់នៅគ្រប់មូលដ្ឋានទូទាំងខេត្ត តាមគោលនយោបាយយុទ្ធសាស្ត្រចតុកោណដំណាក់កាលទី៤របស់ រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដូច្នេះតាមរយៈនៃអង្គសន្និបាតនេះ លោកគ្រូអ្នកគ្រូទាំងអស់ នឹងធ្វើការពិភាក្សាគ្នាយ៉ាងយកចិត្តទុកដាក់លើចំណុចខ្លាំងចំណុចខ្សោយនាឆ្នាំសិក្សាកន្លងទៅ ដើម្បីធើ្វបទពិសោធន៍ និង ធ្វើជាគំរូសម្រាប់ការអនុវត្តឲ្យកាន់តែមានប្រសិទ្ធភាពថែមទៀតនាឆ្នាំសិក្សាខាងមុខនេះ ។
គួររំលឹកថា ក្នុងឆ្នាំសិក្សា២០២០-២០២១ នៅទូទាំងខេត្តសៀមរាប មានសាលាបឋមសិក្សាចំនួន៥២២សាលា មានសិស្សចំនួន១៦៤.៤៩០នាក់ ក្នុងនោះស្រីចំនួន៥.៨៣៥នាក់ , អនុវិទ្យាល័យ មានចំនួន៨០សាលា និង វិទ្យាល័យមានចំនួន៤៤សាលា មានសិស្សសរុបចំនួន៨០.៧៩៤នាក់ ក្នុងនោះស្រីចំនួន៤៥.០៦០នាក់ ហើយនៅក្នុងឆ្នាំសិក្សានេះដែរ ការងារដែលមន្ទីរអប់រំយុវជន និងកីឡាខេត្តសៀមរាប ចាត់ទុកជាចំនុចអធិភាពខ្ពស់នោះ គឺការអប់រំកុមារតូច ដែលត្រូវបានយកចិត្តទុកដាក់ខ្ពស់ជាងគេតាមគ្រប់រូបភាព និងកម្មវិធីសិក្សា ក្នុងនោះសម្រាប់មត្តេយ្យដាច់ដោយឡែក មាន ២១សាលា មានកុមារ ចំនួន២.៨៥៣នាក់ ក្នុងនោះស្រីចំនួន១.៤៩៨នាក់, មត្តេយ្យក្នុងសាលាបឋម មាន ៤០២កន្លែង មានកុមារសរុប ១៩.៥៥៧នាក់ ក្នុងនោះស្រីចំនួន ១១.៨៨៨នាក់, មត្តេយ្យសិក្សាឯកជន មាន ៣៨សាលា មានកុមារ ១.២០១នាក់ ក្នុងនោះស្រីចំនួន ៦៦៣នាក់, មត្តេយ្យសិក្សាសហគមន៍ មាន ១៨៩កន្លែង មានកុមារ ៤.១២៨នាក់ ក្នុងនោះស្រីចំនួន ២.១២០នាក់ និងកម្មវិធីអប់រំកុមារតូចតាមខ្នងផ្ទះ មាន ១៩៩ភូមិ មានកុមារសរុប ៤.៥៦៧នាក់ ក្នុងនោះស្រីចំនួន ២.៣៥៨នាក់ ៕
អត្ថបទ និងរូបភាព ៖ លោក អ៊ុន ណារាជ្យ
កែសម្រួលអត្ថបទ ៖ លោក លីវ សាន្ត
