ការរប្រឡងជ្រើសរើសសិស្សពូកែផ្នែកអក្សរសិល្ប៍ គណិតវិទ្យា និងរូបវិទ្យា សម្រាប់ថ្នាក់ទី៩ និងថ្នាក់ទី១២ ទូទាំងប្រទេសលើកទី២៦ បានបិទបញ្ចប់ហើយនៅព្រឹកថ្ងៃទី១៩ ខែមិថុនា ឆ្នាំ២០២២នេះ នៅវិទ្យាល័យ ១០មករា ១៩៧៩ ក្រុងសៀមរាប ដោយខេត្តព្រៃវែង ជាខេត្តទទួលបានមេដាយច្រើនជាងគេឈរនៅលំដាប់លេខ១ និងខេត្តសៀមរាបជាម្ចាស់ផ្ទះនៅលំដាប់ថ្នាក់លេខ២។
អញ្ជើញជាអធិបតីក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានកត់សម្គាល់ថា សម្រាប់សិស្សថ្នាក់ទី៩ សិស្សស្រីទទួលបានជ័យលាភីរហូតដល់៦០ភាគរយ ដោយឡែកសម្រាប់សិស្សថ្នាក់ទី១២ សិស្សប្រុសទទួលបានជ័យលាភីរហូតដល់ ៧០ភាគរយ។
ឆ្លៀតក្នុងឱកាសនោះដែរ ឯកឧត្តមរដ្ឋមន្ត្រី បានផ្ដល់អនុសាសន៍ដល់សិស្សានុសិស្សទាំងអស់ថា ដើម្បីឱ្យអនាគតទទួលបានជោគជ័យ ទី១ ត្រូវមានវិន័យលើខ្លួនឯង ទី២ ត្រូវចេះគ្រប់គ្រងលើខ្លួនឯង បន្ថែមពីនោះ សិស្សានុសិស្សទាំងអស់ត្រូវចេះស្រាវជ្រាវចំណេះដឹង បច្ចេកវិទ្យាថ្មីៗ ជាមួយនោះភាសាបរទេស ក៏ជាយានដ៏សំខាន់ជួយរុញច្រានក្មួយៗ ទៅរកកំណប់ក្នុងអនាគតរបស់ខ្លួនផងដែរ។
ព័ត៌មានជាតិ ថ្មីៗ
ឯកឧត្តមរដ្ឋមន្ត្រី ក៏បានអំពាវនាវដល់មាតាបិតា និងអាណាព្យាបាលសិស្សទាំងអស់ សូមយកចិត្តទុកដាក់ទៅលើកូនៗរបស់ខ្លួន ជាពិសេសសិស្សប្រុស ដែលបច្ចុប្បន្នមានកត្តារួមផ្សំជាច្រើន ដែលមករំខានដល់ការសិក្សារបស់ពួកគេដូចជា ល្បែង និងការកម្សាន្តលើអ៊ិនធើណិត សម្ភារនិយម អំពើពាលាផ្សេងៗដទៃទៀតនៅជុំវិញ។ល។
ទន្ទឹមនោះក្រសួងអប់រំ យុវជន និងកីឡា ក៏បានថ្លែងអំណរគុណចំពោះ ឯកឧត្តម ទៀ សីហា អភិបាលខេត្តសៀមរាប ក្នុងការគាំទ្រ និងសហការយ៉ាងជិតស្និទ្ធក្នុងការរៀបចំសន្តិសុខ រថយន្តសង្គ្រោះ បុគ្គលិកសុខាភិបាលប្រចាំការ ក្នុងនោះ លោក អ៊ឹង គឹមលាង អភិបាលរងខេត្តសៀមរាប ដែលបានដឹកនាំដោយផ្ទាល់រហូតដល់ការបិទបញ្ចប់ការប្រឡងជោគជ័យជាស្ថាពរ។
យោងតាមសេចក្ដីប្រកាស នៃការទទួលស្គាល់សិស្សពូកែទូទាំងប្រទេស ផ្នែកអក្សរសិល្ប៍ គណិតវិទ្យា និងរូបវិទ្យា សម្រាប់ថ្នាក់ទី៩ និងថ្នាក់ទី១២ ឆ្នាំ២០២២ មានចំនួនអ្នកចូលរួមសរុប ៤៨០នាក់ ទទួលបានចំណាត់ថ្នាក់៦០នាក់ ក្នុងនោះទទួលបានមេដាយសរុប ១៨នាក់ រួមមាន សម្រាប់ថ្នាក់ទី៩ មុខវិជ្ជាអក្សរសិល្ប៍ខ្មែរ ខេត្តព្រៃវែងទទួលបានមេដាយមាស ខេត្តកំពង់ចាមទទួលបានមេដាយប្រាក់ និងរាជធានីភ្នំពេញទទួលបានមេដាយសំរឹទ្ធ។ មុខវិជ្ជាគណិតវិទ្យា រាជធានីភ្នំពេញទទួលបានមេដាយមាស ខេត្តសៀមរាបទទួលបានមេដាយប្រាក់ និងខេត្តព្រៃវែងទទួលបានមេដាយសំរឹទ្ធ។ មុខវិជ្ជារូបវិទ្យា ខេត្តព្រៃវែងទទួលបានមេដាយមាស ខេត្តសៀមរាបទទួលបានមេដាយប្រាក់ និងខេត្តកំពង់ចាមទទួលបានមេដាយសំរឹទ្ធ។ ដោយឡែក សម្រាប់ថ្នាក់ទី១២ មុខវិជ្ជាអក្សរសិល្ប៍ខ្មែរ ខេត្តព្រៃវែងទទួលបានមេដាយមាស និងប្រាក់ និងខេត្តកំពង់ចាមទទួលបានមេដាយសំរឹទ្ធ។ មុខវិជ្ជាគណិតវិទ្យា ខេត្តសៀមរាបទទួលបានមេដាយមាស ខេត្តកំពតទទួលបានមេដាយប្រាក់ និងខេត្តតាកែវទទួលបានមេដាយសំរឹទ្ធ។ និងចុងក្រោយ មុខវិជ្ជារូបវិទ្យា ខេត្តកណ្ដាលទទួលបានមេដាយមាស ខេត្តកំពង់ឆ្នាំងទទួលបានមេដាយប្រាក់ និងសំរឹទ្ធ។
អត្ថបទ និងរូបភាព : លោក សេង ផល្លី
