សិក្ខាសាលាវគ្គវិក្រឹតការពិសេសមគ្គុទេសក៍ទេសចរណ៍តំបន់សៀមរាប-អង្គរ ដែលរៀបចំឡើងដោយអាជ្ញាធរជាតិអប្សរា សហការជាមួយក្រសួងទេសចរណ៍ ជូនដល់មគ្គុទ្ទេសក៍ទេសចរណ៍ សរុបចំនួន ៤៩នាក់ ដែលរយៈពេល ១០ថ្ងៃ ចាប់ពីថ្ងៃទី០៧ ដល់ថ្ងៃទី១៦ ខែមិថុនា ឆ្នាំ២០២២ ត្រូវបានបិទបញ្ចប់ហើយ ជាមួយនឹងទទួលបានជោគជ័យគួរជាទីមោទនៈ។
មានប្រសាសន៍ក្នុងពិធីបិទបញ្ចប់សិក្ខាសាលានេះឯកឧត្ដម ប៉ាក់ សុខុម រដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ឯកឧត្ដម បណ្ឌិត ថោង ខុន បានថ្លែងអំណរគុណដល់អ្នកជំនាញអាជ្ញាធរជាតិអប្សរាទាំងអស់ដែលបានខិតខំបង្ហាញរបកកំហើញថ្មីៗ ជូនដល់សិក្ខាកាមគ្រប់រូបនារយៈពេល ១០ថ្ងៃកន្លងមកនេះ។ ជាមួយគ្នានោះដែរឯកឧត្តម ក៏បានណែនាំដល់មគ្គុទេសក៍ទេសចរណ៍ដែលបានសិក្សាវគ្គវិក្រឹតការពិសេសនេះ ត្រូវយកបទពិសោធន៍ និងចំណេះដឹងល្អៗ ដែលទទួលបានពីសិក្ខាសាលានេះ ទៅចែករំលែកឱ្យគ្នាទៅវិញទៅមកដល់អ្នកផ្សេងទៀត ដោយអ្នកចេះច្រើនបង្ហាញអ្នកតិច ដើម្បីជាការជួយលើកស្ទួយដល់វិស័យទេសចរណ៍កម្ពុជា ក៏ដូចជាខេត្តសៀមរាបយើងកាន់តែរីកចម្រើនឡើងថែមទៀត។
ក្នុងឱកាសនោះដែរ ឯកឧត្ដម ឡុង កុសល អគ្គនាយករងនៃអាជ្ញាធរជាតិអប្សរា មានប្រសាសន៍ថា មេរៀនដែលអ្នកជំនាញអាជ្ញាធរជាតិអប្សរា ក៏ដូចជាក្រសួងទេសចរណ៍ បានផ្តល់ជូនដល់សិក្ខាកាមទាំងអស់គ្នា វាជាចំណេះដឹងថ្មីៗ ជាពិសេលទ្ធផលនៃការស្រាវជ្រាវផ្នែកបុរាណវិទ្យា និងជំនឿអរូបបីនៅក្នុងតំបន់អង្គរ ដែលជាព័ត៌មានជាក់លាក់បែបវិទ្យាសាស្រ្ត ទុកជាទុនបន្ថែមសម្រាប់បង្ហាញដល់ភ្ញៀវទេសចរ។ ក្នុងនោះក៏សំណូមពរដល់សិក្ខាកាម និងភាគីពាក់ព័ន្ធ ត្រូវមានការសហការល្អជាមួយគ្នា យកគ្នាធ្វើជាដៃគូពិភាក្សា ទោះបីបំពេញការងារខុសគ្នា ក៏ប៉ុន្តែអ្វីដែលសំខាន់ គឺមានគោលដៅ និងការចូលរួមចំណែកក្នុងការអភិវឌ្ឍន៍វិស័យទេសចរណ៍ទាំងអស់គ្នា។
បើតាមសិក្ខាកាមដែលចូលរួមក្នុងវគ្គវិក្រឹតការពិសេសមគ្គុទេសក៍ទេសចរណ៍តំបន់សៀមរាប-អង្គរ នេះ ពួកគាត់បានបង្ហាញចំណាប់អារម្មណ៍ថា ក្រោយពេលចូលសិក្សាវគ្គវិក្រិតការរយៈពេល ១០ថ្ងៃមកនេះ ពួកគាត់ទទួលបានចំណេះច្រើន ពីអ្វីដែលមិនធ្លាប់ដឹងពីមុន ឥឡូវបានទទួលបានបទពិសោធន៍បន្ថែម យកមកបំពេញចន្លោះខ្វះខាតកន្លងមក និងយល់ដឹងពីទិន្នន័យការស្រាវជ្រាវថ្មីៗ ដែលអាជ្ញាធរជាតិអប្សរាបង្ហាញតាមការដ្ឋាននានាក្នុងតំបន់រមណីយដ្ឋានអង្គរ ពិសេសតួនាទីរបស់អាជ្ញាធរជាតិអប្សរា ដើម្បីយកចំណេះដឹងទាំងនេះទៅបង្ហាញជូនដល់ភ្ញៀវទេសចរដែលអ្នកស្រីដឹកនាំទស្សនាក្នុងតំបន់អង្គរផងដែរ។ ជាមួយគ្នានោះពួកគាត់ក៏បានសំណូមពរឱ្យអាជ្ញាធរជាតិអប្សរា និងក្រសួងទេសចរណ៍ រៀបចំកម្មវិធីដ៏មានសារសំខាន់នេះឡើងនាពេលអនាគតជាបន្តបន្ទាប់ទៀត សម្រាប់ឱ្យមគ្គុទ្ទេសក៍ទេសចរណ៍មានឱកាសចូលរួមសិក្សាក្នុងវគ្គវិក្រិតការពិសេសនេះ ទទួលបានចំណេះដឹងថ្មីៗ មានភាពច្បាស់លាស់ ដើម្បីផ្សព្វផ្សាយទៅកាន់ភ្ញៀវទេសចរកាន់តែទូលំទូលាយ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
