មន្ដ្រីជាន់ខ្ពស់ក្រសួងអប់រំ យុវជន និងកីឡា បានជម្រុញមន្ដ្រីឱ្យដឹកនាំបំពេញការងារឱ្យបានល្អប្រសើរ និងកុំយកតួនាទីរបស់ខ្លួនគៀបសង្កត់ថ្នាក់ក្រោម ដែលនាំឱ្យបែកបាក់សាមគ្គី បន្ទាប់ពីទទួលបានតំណែងជាថ្នាក់ដឹកនាំនៅក្នុងស្ថាប័នណាមួយ។
ឯកឧត្ដម សេរី ជំនះ អនុរដ្ឋលេខាធិការក្រសួងអប់រំ យុវជន និងកីឡា បានថ្លែងបែបនេះ នៅក្នុងពិធីប្រកាសចូលកាន់តំណែងនាយកមជ្ឍមណ្ឌលជាតិយុវជនកម្ពុជា ស្ថិតនៅសង្កាត់ស្លក្រាម ខេត្ដសៀមរាប កាលពីល្ងាចថ្ងៃទី២១ ខែមិថុនា ឆ្នាំ២០២២នេះ។ ឯកឧត្ដម បានបន្ដថា ការទទួលបានការតែងតាំងមុខតំណែងថ្មីនេះ គឺជាបន្ទុក និងការទទួលខុសត្រូវរឹតតែទ្វេដង ពីអ្វីដែលធ្លាប់បានបំពេញការងារកន្លងមក សម្រាប់ថ្នាក់ដឹកនាំក្នុងអង្គភាពមួយ ត្រូវប្រកាន់ខ្ជាប់នូវព្រហ្មវិហារធម៌បួនប្រការគឺ មេត្ដា ករុណា មុទិតានិងឧបេក្ខា។ ឯកឧត្ដម បានបន្ដទៀតថា ជាក់ស្ដែងការចូលកាន់មុខតំណែងជានាយកមជ្ឍមណ្ឌលជាតិយុវជនកម្ពុជានេះ គឺត្រូវធ្វើឱ្យមជ្ឈមណ្ឌលនេះ ក្លាយជាមជ្ឈមណ្ឌលយុវជនជាតិកម្ពុជា គំរូនៅក្នុងប្រទេស។ ឯកឧត្ដម ក៏បានណែនាំឱ្យបង្កើតនូវមជ្ឈមណ្ឌលសុខដុមភាពសម្រាប់មហាគ្រួសាយុវជនកម្ពុជា ឱ្យមាននិរន្តរភាព និងសុខដុមភាព ដូចបុព្វបុរសខ្មែរ បានកសាងប្រាសាទសម្រាប់រាជផង និងប្រាសាទសម្រាប់ ជាការរំលឹកគុណដល់បុព្វបុរស និងបុព្វការីជន ហើយអ្នកជំនាន់ក្រោយមិនបំផ្លិចបំផ្លាញស្នាដៃរបស់ជំនាន់មុន។ ឯកឧត្ដមបានរំលឹកឡើងនូវសុភាសិតខ្មែរមួយឃ្លាពោលថា «កុំឈ្លោះគ្នាក្នុងគ្រួសារ ដូចស្រាតកាយាបង្ហាញញាតិ, កុំឈ្លោះគ្នាក្នុងសង្គមជាតិ ដូចលាតកំណប់បង្ហាញចោរ»។ ត្រូវខិតខំប្រឹងប្រែងអនុវត្តកម្មវិធី និងទំនើបកម្មកម្មវិធីនានារបស់មជ្ឈមណ្ឌល ធ្វើយ៉ាងណាឱ្យសមស្រប នឹងតម្រូវការរបស់យុវជនសតវត្សរ៍ ទី២១។
លោក ស៊ាន ផល្លា នាយកមជ្ឍមណ្ឌលជាតិយុវជនកម្ពុជា ដែលទើបតែងថ្មី មានប្រសាសន៍ថា ដើម្បីជាសាក្ខីភាពឆ្លើយតបនឹងទំនុកចិត្តរបស់ថ្នាក់ដឹកនាំគ្រប់លំដាប់ថ្នាក់ លោកនឹងខិតខំបំពេញភារកិច្ចដោយស្មារតីយកចិត្តទុកដាក់ និងការទទួលខុសត្រូវខ្ពស់ ព្រមទាំងលះបង់អស់ពីកម្លាំងកាយចិត្ត ប្រាជ្ញា និងស្មារតី ដើម្បីរួមចំណែកក្នុងអនុវិស័យអភិវឌ្ឍយុវជនកម្ពុជា ឱ្យកាន់តែប្រសើរឡើងថែមទៀត។ លោក ប្តេជ្ញាពង្រឹង និងពង្រីកស្មារតីសាមគ្គីភាព ឯកភាពផ្ទៃក្នុង និងស្ថាប័ន ដើម្បីធ្វើបច្ចុប្បន្នកម្មរចនាសម្ព័ន្ធដឹកនាំ ភារកិច្ច និងការទទួលខុសត្រូវប្រកបដោយឧត្តមគតិ។ បន្ថែមលើសពីនោះ លោកថាត្រូវអភិវឌ្ឍកម្មវិធីអប់រំឌីជីថល សម្រាប់ការអប់រំ បណ្តុះបណ្តាល និងអភិវឌ្ឍន៍មូលធនយុវជន ពង្រីកកាលានុវត្តភាពយុវជនឱ្យសមស្របតាមឧបនិស្ស័យ និងទេពកោសល្យ និងបង្កើនសហប្រតិបត្តិការជាតិ និងអន្តរជាតិ ព្រមទាំងអនុវត្តរាល់គោលនយោបាយ ផែនការយុទ្ធសាស្រ្តផែនការប្រតិបត្តិការ និងសេចក្តីសម្រេចនានារបស់រាជរដ្ឋាភិបាលកម្ពុជា និងក្រសួងអប់រំ យុវជន និងកីឡាផងដែរ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន
