ថ្លែងនៅពីធីបើកវគ្គបណ្ដុះបណ្ដាល ស្ដីពីការស្ម័គ្រចិត្ដដើម្បីសហគមន៍ខ្ញុំ និងប្រកាសដាក់ឱ្យប្រើប្រាស់គេហទំព័រជាផ្លូវការ ដែលរៀបចំដោយក្រសួងអប់រំយុវជន និងកីឡា នៅមជ្ឍមណ្ឌលជាតិយុវជនកម្ពុជា នាខេត្ដសៀមរាប កាលពីព្រឹកថ្ងៃទី២២ខែមិថុនាឆ្នាំ២០២២ នេះ ឯកឧត្ដម សេរី ជំនះ អនុរដ្ឋលេខាធិការក្រសួងអប់រំ យុវជននិងកីឡា បានជំរុញលើកទឹកចិត្តឱ្យមានការបង្កើតកម្មវិធីថ្មីៗ ដល់យុវជនទាំងក្នុងសាលា និងក្រៅសាលារៀន ដែលជាការផ្ដល់ឱកាសឱ្យពួកគេ ទទួលបានការអប់រំ ការបណ្ដុះបណ្ដាលជំនាញវិជ្ជាជីវៈ និងការលើកទឹកចិត្តឱ្យមានគំនិតច្នៃប្រឌិតលើជំនាញរបស់ខ្លួន ដើម្បីឆ្លើយតបទៅនឹងគោលនយោបាយជាតិ ស្ដីពីការអភិវឌ្ឍយុវជនកម្ពុជា និងទស្សនាទានរបស់រាជរដ្ឋាភិបាលកម្ពុជា យុវជនម្នាក់មានជំនាញមួយយ៉ាងតិចប្រចាំជីវិត។
ឯកឧត្ដម សេរី ជំនះ បន្តថា ដើម្បីឆ្លើយតបទៅនឹងនិរន្តរភាពនៃការអភិវឌ្ឍផែនការជាតិ ក៏ដូចជាការអនុវត្តតាមគោលនយោបាយ ចតុកោណតំណាក់កាលទី៤ នីតិកាលទី៦ នៃរដ្ឋសភា ក្រសួងអប់រំយុវជន និងកីឡា បានផ្ដល់អាទិភាពដល់អនុវិស័យយុវជន ដូចបានកំណត់នៅក្នុងគោលនយោបាយជាតិ ដើម្បីអភិវឌ្ឍយុវជនកម្ពុជា ដោយផ្តោតទៅលើការបង្កើតកម្មវិធីអភិវឌ្ឍយុវជន និងការជំរុញឱ្យមានការចូលរួមប្រកបដោយសមធម៌ និងបរិយាបន្ន ធ្វើឱ្យយុវជនទាំងអស់អាចទទួលបាននូវការបណ្តុះបណ្តាលជំនាញបច្ចេកទេស ជំនាញវិជ្ជាជីវៈផ្សេងៗ និងជំនាញទន់។
ឯកឧត្ដមបន្ដថា ការបណ្តុះបណ្តាលភាពជាអ្នកដឹកនាំ ការរៀបចំគម្រោង និងការចូលរួមក្នុងសកម្មភាពសហគមន៍ និងសង្គមជាតិ ដែលអាចជួយឱ្យយុវជនទទួលបាននូវបទពិសោធន៍ក្នុងការប្រកួតប្រជែងឈានទៅរកទីផ្សារការងារ ដែលមានកម្រៃខ្ពស់ ការអប់រំខាងសីលធម៌ ការប្រាស្រ័យទាក់ទង និងការប្រព្រឹត្តល្អរបស់យុវជន ហើយការបណ្តុះឆន្ទៈ និងតម្រង់ទិសការសិក្សា និងការបង្កើតភាពជាដៃគូក្នុងការទំនាក់ទំនងការងារសង្គមរបស់យុវជន។ ជាមួយគ្នានោះ ក៍ជាការបញ្ជ្រាប និងចលនាសកម្មភាពស្ម័គ្រចិត្តដល់យុវជន ដោយផ្សារភ្ជាប់បញ្ហាប្រឈមទៅនឹងតម្រូវការជាក់ស្ដែង និងការផ្សព្វផ្សាយពីតម្រូវការព័ត៌មានទីផ្សារការងារ។
ឯកឧត្តម បានបន្ដថា ដោយឡែកទាក់ទងនឹងការងារស្ម័គ្រចិត្ត ដែលជាយុទ្ធសាស្ត្រមួយក្នុងចំណោមយុទ្ធសាស្ត្រទាំង១២ ដែលបានកំណត់នៅក្នុងគោលនយោបាយជាតិ ស្តីពីការអភិវឌ្ឍយុវជនកម្ពុជា និងតាមរយៈវេទិកាជាតិស្ដីពីការស្ម័គ្រចិត្តនៅកម្ពុជា តែងតែបានប្រារព្ធជារៀងរាល់ឆ្នាំដោយក្រសួងអប់រំសហការជាមួយ អង្គការជាតិនិងអន្តរជាតិ និងដៃគូពាក់ព័ន្ធនានា ដែលកំពុងបំពេញបេសកកម្មស្ម័គ្រចិត្តនៅកម្ពុជា បាននឹងកំពុងជំរុញឱ្យមានការយកចិត្តទុកដាក់លើការងារស្ម័គ្រចិត្តនេះ ដោយធ្វើការផ្សព្វផ្សាយ ការបណ្តុះបណ្តាល និងកៀរគរលើកទឹកចិត្តដល់យុវជនមកពីគ្រប់មជ្ឈដ្ឋានក្នុងសង្គម ឱ្យចូលរួមបរិច្ចាកជាពេលវេលា ធនធាន សមត្ថភាព និងជំនាញរបស់ខ្លួន ដើម្បីបម្រើ និងកសាងសហគមន៍ឱ្យមានការរីកចម្រើនប្រកបដោយវិជ្ជមាន មោទនភាព និងជំនឿចិត្ត ដែលជាផ្នែកមួយនៃការចូលរួមចំណែកកាត់បន្ថយភាពក្រីក្រ ក្នុងចំណោមយុវជននៅតាមមូលដ្ឋាន និងតាមសហគមន៍។
ឯកឧត្ដមបន្ដថា ការងារស្ម័គ្រចិត្ត គឺជាកត្តាសំខាន់ដែលរួមចំណែកដល់ស្មារតីនៃសាមគ្គីភាព មនុស្សធម៌ និងគុណធម៌ក្នុង ចំណោមយុវជនក្នុងគ្រួសារ និងសហគមន៍របស់ពួកគេ។ ការអភិវឌ្ឍប្រទេសគឺផ្សារភ្ជាប់នឹងការងារស្ម័គ្រចិត្តរបស់យុវជន ហើយយុវជនទាំងអស់ត្រូវបានលើកទឹកចិត្តឱ្យចូលរួមក្នុងការកែលម្អសហគមន៍ និងសង្គមកម្ពុជាតាមរយៈការស្ម័គ្រចិត្ត៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
