លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា យុទ្ធនាការសម្អាតបរិស្ថានប្រមូលសំណល់ប្លាស្ទិកប្រចាំឆ្នាំនៅសង្កាត់ចុងឃ្នៀស នៃបឹងទន្លេសាបនាពេលនេះ នឹងជួយឱ្យសហគមន៍នៅទីនេះ មានសោភ័ណភាពស្អាត ព្រោះនៅក្នុងតំបន់ចុងឃ្នៀសនេះ គឺជាកន្លែងទេសចរណ៍ដ៏ទាក់ទាញមួយនៃខេត្តសៀមរាប ពិសេសជួយដល់ប្រព័ន្ធជីវៈចម្រុះក្នុងទឹកជាច្រើន ខណៈដែលទឹកនឹងចាប់ផ្តើមឡើងជាបណ្ដើរៗនាពេលឆាប់ៗខាងមុខនោះ ដូច្នេះ យើងទាំងអស់គ្នាត្រូវចូលរួមសម្អាតអនាម័យបរិស្ថាននៅតាមទីប្រជុំជន តាមភូមិ តាមសហគមន៍ដែលយើងរស់នៅឲ្យបានស្អាតរៀងៗខ្លួន ដោយមានស្មារតីស្រឡាញ់បរិស្ថាន ចេះគ្រប់គ្រងសំណល់ប្លាស្ទិក និងយល់ពីគុណវិបត្តិនានាដែលកើតពីការចោលសំរាមប្លាស្ទិកមិនបានត្រឹមត្រូវជាដើម ជាហេតុនាំឲ្យមានផលបះពាល់ដល់សុខុមាលភាពក្នុងការរស់នៅប្រចាំថ្ងៃរបស់បងប្អូនប្រជាពលរដ្ឋផងដែរ។
លោក នាក់ ណេរ៉ុន មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីក្នុងយុទ្ធនាការកម្ពុជាស្អាតកម្ពុជាបៃតង ក្រោមប្រធានបទ៖ ទន្លេសាបបៃតងស្អាត ដោយគ្មានប្លាស្ទិក ត្រូវបានរៀបចំធ្វើការសម្អាតបរិស្ថានប្រមូលសំរាមប្លាស្ទិកនៅតំបន់សហគមន៍ចុងឃ្នៀស នៅព្រឹកថ្ងៃទី២២ ខែមិថុនា ឆ្នាំ២០២២នេះ ។
លោក នាក់ ណេរ៉ុន បន្តថា អង្គការមូលនិធិទំពាំងស្នងឫស្សី ជាមួយដៃគូអង្គការអន្តរជាតិOcean Recovery Alliance បានផ្តួចផ្តើមបើកយុទ្ធនាការប្រមូលសំរាមប្លាស្ទិកបឹងទន្លេសាបប្រចាំរដូវទឹកឡើង និងរដូវទឹកសម្រក ចាប់ពីឆ្នាំ២០១៨ មកម្ល៉េះ ដោយមានចលនាមហាជនតាមរយៈសហគមន៍នានាជុំវិញបឹងទន្លេសាប ដូចជាសហគមន៍កំពង់ឃ្លាំង មេជ្រៃ ចុងឃ្នៀស បឹងពារាំង កំពង់ភ្លុក និងផ្នែកខាងក្រោមនៃស្ទឹងសៀមរាប ។
លោកអភិបាលរងខេត្តសៀមរាប បន្តថា តាមរយៈក្រុមយុវជនស្ម័គ្រចិត្តមេត្រីបរិស្ថានបឹងទន្លេសាប ឬហៅថា TONLE SAP WARRIORS បានចុះអប់រំតាមសហគមន៍ឱ្យចេះវេចខ្ចប់ និងញែកសំរាមឱ្យបានត្រឹមត្រូវ ហើយឈានដល់ការបង្កើតជង្រុកប្លាស្ទិកជាផ្លូវការនៅសហគមន៍មេជ្រៃនៅក្នុងឆ្នាំ២០២០ ក្នុងទិវាអនាម័យបរិស្ថានជាតិ២៣វិច្ឆិកា ដើម្បីគាំទ្រដល់គម្រោងប្លាស្ទិកប្ដូរយកអង្ករ ដោយមានការគាំទ្រដោយក្រសួងបរិស្ថាន ដែលគម្រោងនេះទទួលបានជោគជ័យដ៏ត្រចេះត្រចង់រួចមកហើយ។
គួររំលឹកថា យុទ្ធនាការសម្អាតបរិស្ថានប្រមូលសំណល់ប្លាស្ទិកក្នុងតំបន់បឹងទន្លេសាបនេះ ត្រូវបានរៀបចំនៅតំបន់ចំនួនពីរ គឺនៅថ្ងៃទី២២ ខែមិថុនា រៀបចំនៅតំបន់ចុងឃ្នៀស និងថ្ងៃទី២៣ រៀបចំនៅឃុំកំពង់ឃ្លាំង ដែលគ្រោងមានអ្នកចូលរួមប្រមាណជាង ១ពាន់នាក់ ក្នុងកម្មវិធីនីមួយៗ ដែលព្រឹត្តិការណ៍នេះធ្វើឡើង ក្រោយពីមានការចុះសិក្សាដោយផ្ទាល់ និងប្រមូលព័ត៌មានអំពីស្ថានភាពសំរាមនៅតាមតំបន់សហគមន៍ មានកំពង់ឃ្លាំង កំពង់ភ្លុក និងចុងឃ្នៀស ប្រតិភូក្រសួងទេសចរណ៍ អង្គការ River Ocean Cleanup និង everwave សង្កេតឃើញថា សហគមន៍ចំនួនពីរ មានកំពង់ឃ្លាំង និងចុងឃ្នៀស នៅតែមានបញ្ហាសំរាមកកស្ទះ ដោយត្រូវការសម្អាតជាចាំបាច់ ចំណែកសហគមន៍កំពង់ភ្លុក គឺការគ្រប់គ្រងសំរាមបានល្អប្រសើរហើយ ។
ក្រសួងទេសចរណ៍តាមរយៈគណៈកម្មាធិការជាតិវាយតម្លៃទីក្រុងស្អាត រដ្ឋមន្រ្តីក្រសួងទេសចរណ៍ ឯកឧត្តម ថោង ខុន បានកោតសរសើរជាខ្លាំងចំពោះគម្រោងប្លាស្ទិកដូរយកអង្ករនេះ ដែលក្រសួងបានយល់ឃើញថា គម្រោងនេះនឹងចូលរួមជំរុញភាពស្អាត និងបៃតងនៅតាមតំបន់បឹងទន្លេសាប និងតំបន់ផ្សេងៗទៀត ដែលជាកត្តាទាក់ទាញភ្ញៀវទេសចរជាតិ និងអន្តរជាតិឲ្យមកទស្សនាឱ្យកាន់តែច្រើនឡើងថែមទៀត៕
អត្ថបទ និងរូបភាព ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
