ប្រទេសជប៉ុន បានសន្យាថានឹងជួយសាងសង់អគារថ្មីមួយដែលមានកម្ពស់ ២ជាន់ ជូនសារមន្ទីរសន្តិភាពសកម្មភាពកំចាត់មីនកម្ពុជា នៅខេត្តសៀមរាប ដើម្បីតម្កល់គ្រាប់យុទ្ធភ័ណ្ឌសំណល់ពីសង្គ្រាមនៅកម្ពុជា ក៏ដូចជាឯកសារផ្សេងៗផងដែរ។
ថ្លែងក្រោយបញ្ចប់ដំណើរទស្សនកិច្ចនៅសារមន្ទីរសន្តិភាពសកម្មភាពកំចាត់មីន របស់ប្រតិភូមួយក្រុមដែលដឹកនាំដោយអតីតរាជទូតជប៉ុន ប្រចាំកម្ពុជា លោក Gorato Ogawa នៅព្រឹកថ្ងៃទី០៤ ខែកក្កដានេះ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានឲ្យដឹងថា នាពេលខ្លីខាងមុខនេះ អង្គភាពស៊ីម៉ាក់ នឹងទទួលបានសារមន្ទីរថ្មីមួយ ដែលគ្រោងនឹងសាងសង់លើផ្ទៃដីទំហំ ២ហិកតា នៃផ្ទៃដីសរុប ១២ហិកតា។
ឯកឧត្តម ហេង រតនា បានបញ្ជាក់ថា សារមន្ទីរដ៏ធំនេះ ជាជំនួយរបស់ប្រទេសជប៉ុន ហើយបើមិនមានការប្រែប្រួលទេ ការសាងសង់នឹងចាប់ផ្តើមនៅចុងឆ្នាំ២០២២ ឬដើមឆ្នាំ២០២៣ ហើយបញ្ចប់នៅចុងឆ្នាំ២០២៤ខាងមុខ ដែលសារមន្ទីរថ្មីនេះ នឹងដាក់តាំងបង្ហាញនូវរាល់គ្រាប់មីន គ្រាប់យុទ្ធភ័ណ្ឌកាកសំណល់សង្គ្រាម និងឯកសារផ្សេងៗ។ ចំពោះទំហំទឹកប្រាក់ដែលត្រូវចំណាយនៅក្នុងការសាងសង់នេះទេ ឯកឧត្តមមិនទាន់បញ្ជាក់បាននោះឡើយទេ ព្រោះត្រូវពីនិត្យ និងសិក្សាពីការចំណាយសិនទើបទម្លាយពីទំហំនៃការការចំណាយ។
សូមជម្រាបថា សារៈមន្ទីរសន្តិភាពសកម្មភាពកំចាត់មីន មានទីតាំងឋិតនៅលើផ្ទៃដីទំហំ ១២ហិកតា ក្នុងភូមិអន្លង់២ ឃុំត្រពាំងធំ ស្រុកប្រាសាទបាគង ខេត្តសៀមរាប ដែលសារមន្ទីរមួយនេះ បានបើដំណើរការកាលពីឆ្នាំ២០១៧៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
