នៅព្រឹកថ្ងៃទី៤ ខែកក្កដា ឆ្នាំ២០២២នេះ លោក អ៊ឹង គឹមលាង អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប បានបើកកិច្ចប្រជុំពិភាក្សាពាក់ព័ន្ឋ នឹងកិច្ចសហការលើការងារទប់ស្កាត់ និងបង្ក្រាបបទល្មើសធនធានធម្មជាតិ ដែលមានការចូលរួមពី អង្គការថែរក្សាការពារធនធានធម្មជាតិ និង អង្គការការពារបរិស្ថាននិងសិទ្ឋិពលរដ្ឋកម្ពុជា ដែលមានមូលដ្ឋានក្នុងក្រុងសៀមរាប ដើម្បីពិភាក្សាបង្កើតកិច្ចសហការល្អ ជាមួយអាជ្ញាធរមានសមត្ថកិច្ច ក្នុងការអនុវត្តឱ្យបានត្រឹមត្រូវតាមនីតិវីធី។
ក្នុងកិច្ចពិភាក្សានោះ អង្គប្រជុំបានលើកឡើងថា ចំពោះអង្គការ សមាគម និងអ្នកសារព័ត៌មានមួយចំនួន មានឯកសណ្ឋានបញ្ជាក់ពីអង្គភាពរបស់ខ្លួន ដែលពិបាកក្នុងការសម្គាល់ បន្ថែមពីនោះពួកគាត់ពុំមាននិតិសម្បទាជាមន្ត្រីនគរបាលយុត្តិធម៌ ដែលមិនមានសិទ្ធឃាត់ចាប់ ឬសួរនាំអ្នកប្រព្រឹត្តិបទល្មើសឡើយ។ ប៉ុន្តែពួកគេមានសិទ្ឋសរសេររបាយការណ៍ ឬព័ត៌មាន និងសុំការទំនាក់ទំនង សហការ និងរាយការណ៍ជូនទៅអាជ្ញាធរមូលដ្ឋាន ឬកម្លាំងមានសមត្ថកិច្ចនៅគោលដៅ ដែលកៀកបំផុត ដើម្បីបង្ក្រាបបទល្មើនោះ។
ការលើកឡើងនេះ អាជ្ញាធរក្រុង ស្រុក និងមន្ត្រីជំនាញពាក់ព័ន្ឋ បានស្នើឱ្យអង្គប្រជុំយកចិត្តទុកដាក់ ដើម្បីរួមគ្នាដោះស្រាយ និងមានវិធានការចំពោះបុគ្គល អង្គការក្រៅរដ្ឋាភិបាល អាជ្ញាធរមានសមត្ថកិច្ច និងស្ថាប័នពាក់ព័ន្ធណា ដែលប្រព្រឹត្តិផ្ទុយ ឬប្រាសចាកពីតួនាទី ភារកិច្ច និងវិជ្ជាជីវៈជំនាញរបស់ខ្លួន។
ពាក់ព័ន្ធនឹងអ្នកសារព័ត៌មាន ដែលបានមានមូលដ្ឋានក្នុងខេត្តសៀមរាប លោក លីវ សុខុន ប្រធានមន្ទីរព័ត៌មានខេត្ត លើកឡើងថា៖ ថ្វីត្បិតតែមន្ទីរព័ត៌មាន មិនមានសិទ្ឋិត្រួតពិនិត្យ គ្រប់គ្រង និងតាមដានសកម្មភាពរបស់អង្គភាពព័ត៌មានឯកជនក្តី តែមន្ទីរតែងតែសហការ និងណែនាំដល់គ្រប់អង្គភាពព័ត៌មាន ដែលមានអាជ្ញាបណ្ណមានសុពលភាពទាំងអស់ ត្រូវគោរពវិជ្ជាជីវៈ និងមានបណ្ណសម្គាល់អង្គភាពរបស់ខ្លួននៅពេលចុះបំពេញការងារ។ លើសពីនោះ ចំពោះអ្នកសារព័ត៌មាន ដែលបានចុះមកបំពេញភារកិច្ចក្នុងភូមិសាស្ត្រខេត្តសៀមរាប គួរមកចុះលិខិតបញ្ជាបេសកកម្មនៅមន្ទីរ ដើម្បីបង្ហាញពីកិច្ចសហការរវាងអង្គភាពរដ្ឋ និងឯកជន។
លោកប្រធានមន្ទីរព័ត៌មានខេត្ត បន្ថែមថា ក្រៅពីនោះ មន្ទីរក៏តែងតែសហការសម្របសម្រួល និងដោះស្រាយបញ្ហាភ័ន្តច្រឡំជាច្រើន រវាងអាជ្ញាធរមានសមត្ថកិច្ច ជាមួយអ្នកសារព័ត៌មាន និងបន្តពង្រឹងកិច្ចសហការគ្រប់ជ្រុងជ្រោយជាមួយអាជ្ញាធរក្រុងស្រុក ក៏ដូចជាមន្ត្រីមានសមត្ថកិច្ចគ្រប់លំដាប់ថ្នាក់ ដើម្បីទប់ស្កាត់ជនបន្លំជាអ្នកសារព័ត៌មាន ឬអ្នកព័ត៌មាន ដែលប្រើប្រាស់សិទ្ធ និងតួនាទីរបស់ខ្លួនលើសដែនកំណត់ផងដែរ។
ថ្លែងបូកសរុបអង្គប្រជុំ លោក អ៊ឹង គឹមលាង អភិបាលរងខេត្ត បានជំរុញ និងណែនាំដល់មន្ទីរព័ត៌មានខេត្តបន្តគ្រប់គ្រងនិងស្រង់ទិន្នន័យ និងចុះបញ្ជីអង្គភាពសារព័ត៌មាន ដែលមានសុពលភាពក្នុងខេត្តទាំងអស់ឱ្យបានត្រឹមត្រូវ ទន្ទឹមនោះអាជ្ញាធរខេត្ត នឹងរៀបចំពេលវេលាសមស្របណាមួយ ដើម្បីជួបប្រជុំជាមួយបណ្តាអង្គភាពសារព័ត៌មាន ដែលមានមូលដ្ឋានក្នុងខេត្ត។
ក្នុងការសហការលើការងារទប់ស្កាត់ និងបង្ក្រាបបទល្មើសធនធានធម្មជាតិនេះដែរ លោក អ៊ឹង គឹមលាង អភិបាលរងខេត្ត បានផ្ដល់ចំណុចគន្លឺះដល់ អង្គការ សមាគម និងអ្នកសារព័ត៌មានទាំងអស់ ត្រូវគោរពតាមលក្ខន្តិកៈរបស់ខ្លួននិងបានចុះបញ្ជីត្រឹមត្រូវតាមច្បាប់។ ក្នុងការសហការ អង្គការ សមាគម និងអ្នកសារព័ត៌មាន អាចមានភារកិច្ចផ្តល់ព័ត៌មាន អង្គេត និងតាមដាន ពុំមានសិទ្ធស្រាវជ្រាវលើករណីបទល្មើសណាមួយឡើយ លើកលែងតែមានការសុំដីកាពីព្រះរាជអាជ្ញា និងសុំគោលការណ៍ ព្រមទាំងចំណារឯកភាពពីអាជ្ញាធរខេត្ត ដែលកិច្ចការទាំងនេះស្របតាមបទដ្ឋានច្បាប់គតិយុត្តិនានា និងនិតិវិធីតាមជំនាញនិងវិជ្ជាជីវៈរបស់ខ្លួន។
អត្ថបទ និង រូបភាព៖ លោក យូ វង្ស
កែសម្រួល៖ លោក សេង ផល្លី
