ដើម្បីអបអរសាទរបុណ្យរុក្ខទិវា ៩ កក្កដា នៅខេត្តសៀមរាប នៅព្រឹកថ្ងៃទី០៥ ខែកក្កដា ឆ្នាំ២០២២ ខណ្ឌរដ្ឋបាលព្រៃឈើនៃមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប សហការជាមួយរដ្ឋបាលស្រុកបន្ទាយស្រី បានរៀបចំដាំកូនឈើទាល ចំនួន២.៣០០ដើម ត្រូវបាននាំយកទៅដាំនៅលើផ្ទៃដី ២ហិកតា ស្ថិតនៅក្នុងស្ថានីយស្តារ និងអភិវឌ្ឍព្រៃឈើ ក្នុងភូមិត្រពាំងថ្មឃុំឃុនរាម ស្រុកបន្ទាយស្រី ដែលជាទីតាំងព្រៃរិចរិល និងធ្លាប់រងការគម្រាមកំហែងជារៀងរាល់ឆ្នាំ បង្កឡើងដោយជនខិលខូចលួចដុតទន្ទ្រានយកដីព្រៃរបស់រដ្ឋ ធ្វើជាកម្មសិទ្ឋជាញឹកញាប់។
ពិធីដាំនេះដែរប្រព្រឹត្តិទៅក្រោមអធិបតីភាព ឯកឧត្តម អ៊ាន ឃុន ប្រធានក្រុមប្រឹក្សាខេត្ត ព្រមទាំងវត្តមានលោកជំទាវតំណាងរាស្ត្រមណ្ឌលសៀមរាប ឯកឧត្តម លោកជំទាវ សមាជិកក្រុមប្រឹក្សាខេត្ត អាជ្ញាធរខេត្ត ថ្នាក់ដឹកនាំអង្គភាពមន្ទីរ ស្ថាប័ន សមាគម កងកំលាំងប្រដាប់អាវុធ មន្ត្រីរាជការ អាជ្ញាធរមូលដ្ឋាន សហភាពសហព័ន្ឋយុវជនកម្ពុជាខេត្តនិងស្រុក ព្រមទាំងប្រជាពលរដ្ឋក្នុងមូលដ្ឋានសរុបប្រមាណជាង ៣០០នាក់។
ថ្លែងនៅក្នុងឱកាសនោះ ឯកឧត្តម អ៊ាន ឃុន មានប្រសាសន៍ថា ការដាំដើមឈើនៅពេលនេះ បង្ហាញនូវអត្ថន័យដ៍ជ្រាលជ្រៅសម្រាប់ជាចលនាបំផុសស្មារតី ប្រជាពលរដ្ឋមន្ត្រីរាជការ សិស្សានុសិស្ស កងកម្លាំងប្រដាប់អាវុធទាំងអស់ឱ្យចេះស្រឡាញ់ព្រៃឈើ ចូលរួមដាំដុះនិងការពារព្រៃឈើ ក៍ដូចជាជួយជម្រុញផលប្រយោជន៍ ដល់ប្រជារាស្រ្តក្នុងជីវភាពរស់នៅ បង្កបង្កើនផលកសិកម្មនិងបង្កើនសុខុមាលភាពគ្រួសារព្រមទាំងជួយលើកស្ទួយបរិស្ថានសង្គមផងដែរ។ ម្យ៉ាងវិញទៀត ពិធីដាំឈើអបអរសារទរបុណ្យរុក្ខទិវានេះ គឺជាកការដង្ហែរតាមព្រះរាជតំរិៈដ៍ខ្ពង់ខ្ពស់របស់ព្រះករុណា ព្របាទសម្តេច ព្រះនរោត្តមសីហនុ ព្រះបរមរតនកោដិ ជាទីគោរពសក្ការៈដ៍ខ្ពង់ខ្ពស់ដែលព្រះអង្គតែងតែយកព្រះទ័យទុកដាក់ដល់បញ្ហាព្រៃឈើ និងការដាំដើមឈើ ជាអាទិភាពចម្បង។
ឯកឧត្តមប្រធានក្រុមប្រឹក្សាខេត្ត ក៏បានអំពាវនាវដល់ប្រជាពលរដ្ឋគ្រប់រូបដែលបានកំពុងបន្តអាជីវកម្មកាប់បំផ្លាញព្រៃឈើ ចាប់យកដីព្រៃ ត្រូវធ្វើការបញ្ឈប់ជាបន្ទាន់ នូវទង្វើររបស់ខ្លួន និងការធ្វើអាជីវកម្មព្រៃឈើ ជំនួញដីព្រៃឈើខុសច្បាប់ ដែលជាបទល្មើសដ៏ធ្ងន់ធ្ងរ គឺជាគ្រោះមហន្តរាយដល់បរិស្ថានធម្មជាតិ ដែលបណ្តាលពីការកាប់បំផ្លាញព្រៃឈើនោះ នឹងកើតភ្លាមចំពោះសង្គមជាតិ។ យើងត្រូវរួមសាមគ្គីគ្នាបណ្តុះឡើងវិញ នូវគំនិតស្រឡាញ់ព្រៃឈើ ថែរក្សាការពារព្រៃឈើ និងបណ្តុះឡើងវិញ នូវទស្សនៈសន្សំសំចៃក្នុងការប្រើប្រាស់ផល និងអនុផលព្រៃឈើគ្រប់ប្រភេទ បណ្តុះស្មារតីគោរពច្បាប់ អនុវត្តច្បាប់ដើម្បីរួមចំណែកកសាង ព្រះរាជាណាចក្រកម្ពុជាឱ្យទៅជានិតិរដ្ឋ។ បន្ថែមពីនេះ ចំពោះកូនឈើដែលដាំហើយ សូមអាជ្ញាធរគ្រប់លំដាប់ថ្នាក់ និងប្រជារាស្ត្រនៅនឹងកន្លែង មេត្តាសកម្មចូលរួមថែរក្សាឱ្យបានហ្មត់ចត់ជាប្រចាំ ដើម្បីឱ្យកូនឈើទាំងនោះលូតលាស់ធំធាត់ឆាប់រហ័ស និងពុំបាត់បង់ទៅវិញ។
បើតាមលោក ទា គឹម សុទ្ឋ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានឲ្យដឹងថា បច្ចុប្បន្នខេត្តសៀមរាប មានសហគមន៍ព្រៃឈើចំនួន ៦២សហគមន៍ ដែលគ្រប់ដណ្តប់លើផ្ទៃដី ចំនួន ៣៤.៤០១ហិកតា ហើយសហគមន័ព្រៃឈើ បានចុះកិច្ចព្រមព្រៀងបាន ៥៥សហគមន៍ ដែលមានផ្ទៃដី ៣១.៩៩ហិកតា។ ពាក់ពន្ឋ័នឹងការងារបង្រ្កាបបទល្មើសព្រៃឈើ និងសត្វព្រៃ មន្ទីរបានចាត់តាំង និងពង្រឹងការងារយាមល្បាតជាប្រចាំ ជាមួយគ្នានេះតាមបណ្តា សង្កាត់ផ្នែករដ្ឋបាលព្រៃឈើក្រុងស្រុក ក៍បានចាត់ក្រុមការងារចល័ត និងក្រុមអន្តរាគមន៍ដាក់តាមគោលដៅក្នុងបណ្តាគោលដៅទាំង ១២ក្រុងស្រុក ជាក់ស្តែងក្នុងឆមាសទី១ ឆ្នាំ២០២២ កម្លាំងជំនាញបង្ក្រាបបទល្មើសព្រៃឈើបាន ១៦ករណី ដោយពិន័យអន្តរការណ៍ ៨ករណី បញ្ជូនទៅតុលាការ ៨ករណី និងរឹបអូសវត្ថុតាងរថយន្ត ៤គ្រឿង រណារយន្ត ១២គ្រឿង និងបញ្ជូនជនសង្ស័យ ៤នាក់ទៅតុលាការ។
លោកប្រធានមន្ទីរ បានឲ្យដឹងទៀតថា ទន្ទឹមនឹងការខិតខំប្រឹងប្រែងខាងលើនេះ ក៍នៅមានបញ្ហាមួយចំនួនក្នុងការគ្រប់គ្រង និងអភិវឌ្ឍវិស័យព្រៃឈើ បញ្ហានោះមានដូចជា ការទន្ទ្រានហ៊ុព័ទ្ឋដីព្រៃឈើក្រោមរូបភាពឈូសឆាយដីកសិកម្ម រូបភាពអាស្រ័យផល ការទិញលក់ និងការលួចកាប់ឈើពូជក្រញូងជាដើម។ ដើម្បីជម្នះនូវបញ្ហាទាំងនេះ តម្រូវឱ្យមានការចូលរួមយ៉ាងទូលំទូលាយពីសំណាក់អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋក្នុងមូលដ្ឋាន ដើម្បីសម្រេចគោលដៅនៃការគ្រប់គ្រងធនធានព្រៃឈើដោយចីរភាព៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
