នៅព្រឹកថ្ងៃទី០៦ ខែកក្កដា ឆ្នាំ២០២២នេះ លោក ស៊ុ សំអន នាយកប្រតិបត្តិសាខាកាកបាទក្រហមខេត្តសៀមរាប បាននាំយកអំណោយជាគ្រឿងឧបភោគបរិភោគ និងថវិកាមួយចំនួនទៅប្រគល់ជូនលោក ងឹន គឹមឡេង ជាប្រជាពលរដ្ឋរស់នៅក្នុងភូមិត្រពាំងសេះ សង្កាត់គោកចក ក្រុងខេត្តសៀមរាប នឹងជាភ្នាក់ងារទូរទស្សន៍បាយ័ន ប្រចាំខេត្តសៀមរាប ហើយបច្ចុប្បន្នកំពុងមានជំងឺសម្ពាធសរសៃឈាម ដែលធ្វើឲ្យស្លាប់មួយចំហៀងខ្លួន នឹងកំពុងសម្រាកព្យាបាលនៅនឹងផ្ទះ។ ដោយអំណោយដែលបានផ្ដល់ជូនមាន៖ អង្ករ ៣០គីឡូក្រាម, មី១កេស, ត្រីខ១យួរ, ទឹកស៊ីអ៊ី១យួរ, ទឹកបរិសុទ្ធ ២យួរ, មុង១, ភួយ១, សារុង១, ក្រមា១, និងថវិកា ៤សែនរៀល។
មានប្រសាសន៍នាឱកាសនោះ លោក ស៊ុ សំអន នាយកប្រតិបត្តិសាខា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ លោកក៏បានផ្ដាំផ្ញើ និងលើកទឹកចិត្តចំពោះ លោក ងឹន គឹមឡេង និងក្រុមគ្រួសារសូមបន្តថែរក្សាសុខភាព និងអនុវត្តន៍តាមការណែនាំរបស់គ្រូពេទ្យ ដើម្បីឆាប់បានធូរស្រាលឡើងវិញ។
លោកបានបន្តថា ថ្វីត្បិតតែអំណោយមនុស្សធម៌ដែលបាននាំយកមកជូននាពេលនេះ មានចំនួនតិចតួចក្ដី តែក៏អាចជួយសម្រាលទុក្ខលំបាករបបានមួយកម្រិត ហើយក៏ជាការបង្ហាញនូវការយកចិត្តទុកដាក់ពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល ” និង “ ទីណាមានទុក្ខលំបាក ទីនោះមានកាកបាទក្រហមកម្ពុជា” ។
ព័ត៌មានជាតិ ថ្មីៗ
សូមបញ្ជាក់ថា លោក ងឹន គឹមឡេង គឺជាអ្នកសារព័ត៌មានមួយរូបរបស់សា្ថនីយទូរទស្សន៍បាយ័ន ប្រចាំខេត្តសៀមរាប កន្លងមកលោកបានសហការល្អ និងសម្របសម្រួលផ្សព្វផ្សាយគ្រប់សកម្មភាពមនុស្សធម៌ របស់សាខាកាកបាទក្រហមកម្ពុជា ខេត្តសៀមរាប និងការងារសង្គម តាំងពីឆ្នាំ១៩៩២ មកម៉្លះ។ ក្នុងកំឡុងខែមេសា ឆ្នាំ២០២២ លោកមានជំងឺសម្ពាធសរសៃឈាម បណ្ដាឲ្យស្លាប់មួយចំហៀងខ្លួន ហើយស្ថានភាពជីវភាពគ្រួសារក៏ជួបលំបាកខ្លាំងទៀតផង៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
