នៅខេត្តសៀមរាប នាព្រឹកថ្ងៃទី០៧ ខែកក្កដា ឆ្នាំ២០២២នេះ សមាជិកសមាជិការជាង ១ពាន់នាក់ នៃវេទិកាសន្ដិភាពកម្ពុជា មកពីបណ្ដាខេត្តនានា បានចូលរួមក្នុងពិធីបើកមហាសន្និបាតលើកទី១ របស់ខ្លួនក្រោមអធិបតីភាពឯកឧត្ដម សួន សេរីរដ្ឋា រដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមប្រឹក្សាភិបាល វេទិកាសន្ដិភាពកម្ពុជា ដែលវេទិកាមួយនេះធ្វើឡើងបន្ទាប់ពីត្រូវបានចុះបញ្ជីនៅក្រសួងមហាផ្ទៃជាផ្លូវការ និងបានធ្វើសកម្មភាពការងារសង្គមបានជាងមួយឆ្នាំកន្លងមក។
ឯកឧត្ដម សួន សេរីរដ្ឋា បានថ្លែងថា វេទិការសន្តិភាពកម្ពុជា បង្កើតឡើងក្នុងគោលបំណងរៀបចំឱ្យមានវេទិកាសាធារណៈ សម្រាប់ប្រជាពលរដ្ឋស្ថិតនៅក្នុងរាជធានីភ្នំពេញ នៅតាមបណ្តាខេត្ត ក្រុង ស្រុក ខណ្ឌ សង្កាត់ សម្រាប់សិស្សនៅតាមវិទ្យាល័យ និងសម្រាប់និស្សិតនៅមហាវិទ្យាល័យនានា ដើម្បីផ្សព្វផ្សាយពន្យល់ឱ្យប្រជាពលរដ្ឋ និងយុវជនខ្មែរ សិស្ស និស្សិត យល់ដឹងពីឬសគល់នៃដំណើរប្រវត្តិដ៏លំបាកអំពីការកសាងសន្តិភាព អំពីតម្លៃសន្តិភាព និងផលប្រយោជន៍នានាដែលទទួលបានពីសន្តិភាព ដោយក្តីគោរពដ៏ខ្ពង់ខ្ពស់បំផុតចំពោះមគ្គុទេសក៍សន្តិភាព និងភាពដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី។
ឯកឧត្ដម សួន សេរីរដ្ឋា បានបញ្ជាក់ថា ព្រឹត្តិការណ៍មហាសន្និបាតវេទិកាសន្ដិភាពកម្ពុជានេះ នឹងត្រូវធ្វើឡើងក្នុងរយៈពេល ៣ឆ្នាំម្ដង ក្រោយពីបញ្ចេញលក្ខណៈត្រឹមត្រូវ តាមផ្លូវច្បាប់នៅក្រសួងមហាផ្ទៃហើយ ដើម្បីជ្រើសតាំងថ្នាក់ដឹកនាំ និងប្រកាសសុពលភាពអាណត្ដិរបស់សមាជិកនៃវេទិកានេះ។ នៅក្នុងមហាសន្និបាតនៃវេទិកាសន្ដិភាពនេះ បានលើកឡើងនូវរបាយការណ៍ដែលធ្វើសកម្មភាពមនុស្សធម៌នៅតាមបណ្ដាខេត្ដមួយចំនួនក្នុងប្រទេសកម្ពុជា ក្នុងរយៈពេលមួយឆ្នាំកន្លះកន្លងមក។ វេទិកាសន្តិភាពកម្ពុជា ជាអង្គការមិនមែនរដ្ឋាភិបាល ដែលបានផ្តួចផ្តើមឡើងពីឆន្ទៈរបស់ក្រុមយុវជន និងប្រជាពលរដ្ឋខ្មែរ ជាអ្នកស្រឡាញ់សន្តិភាព ស្គាល់អំពីតម្លៃពិតប្រាកដ នៃសន្តិភាព និងប្តេជ្ញាការពារសន្តិភាពយ៉ាងមុតមាំដែលបានមកពីការលះបង់ពិកម្មតស៊ូដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលសម្ដេចបានខិតខំប្រឹងប្រែងស្វែងរកដោយលំបាកយកមកផ្តល់ជូនប្រជាពលរដ្ឋខ្មែរ។
ឯកឧត្ដម ក៏បានរំលឹកពីកិច្ចព្រមព្រៀងទីក្រុងប៉ារីសថ្ងៃទី២៣ ខែតុលា ឆ្នាំ១៩៩១ ដោយប្រទេសកម្ពុជាមិនទាន់មានសន្ដិភាពគ្រប់គ្រាន់នៅឡើយទេ បើទោះបីមានការទទួលស្គាល់ពីអន្ដរជាតិក៍ដោយ ដោយសារប្រជាជនកម្ពុជាកំពុងស្ថិតនៅក្នុងសង្គ្រាមនៅឡើយ ហើយកម្ពុជាមានសន្ដិភាពពេញលេញ គឺចាប់ពីថ្ងៃទី២៩ ខែធ្នូ ឆ្នាំ១៩៩៨។ ស្តែងតាមរយៈគោលនយោបាយឈ្នះឈ្នះ ប្រទេសកម្ពុជា បាននឹងកំពុងតែទទួលស្គាល់នូវការអភិវឌ្ឍ មានតែអប់រំបណ្តុះបណ្តាលឱ្យប្រជាពលរដ្ឋ បានចូលរួមចំណែកលើវិស័យផ្សេងៗ ដើម្បីធ្វើយ៉ាងណាឱ្យសេដ្ឋកិច្ចជាតិ និងជីវភាពរបស់ប្រជាពលរដ្ឋមានការរីកចម្រើន ដែលផ្ទុយស្រឡះពីអតីតកាលប្រទេសកម្ពុជា បានជួបប្រទះតែងតែប្រយុទ្ធគ្នាគ្មានពេលស្រាកស្រាន្តជាដើម។ ជាមួយគ្នានោះ សន្តិភាព គឺជាគ្រឹះតែមួយគត់ សម្រាប់ធានាឱ្យមានបរិយាកាសរៀបចំការបោះឆ្នោតដោយសេរី និងយុត្តិធម៌ ហើយសន្តិភាពក៏ជាផ្លូវតែមួយគត់ ដើម្បីឱ្យដំណើរនៃលទ្ធិប្រជាធិបតេយ្យកើតមានឡើងជាមួយនឹងការគោរពសិទ្ធិមនុស្ស៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
