ថ្លែងក្នុងពិធីប្រកាសសុពលភាពសមាជិកក្រុមប្រឹក្សាសង្កាត់សាលាកំរើក អាណត្តិទី៥ នាព្រឹកថ្ងៃទី០៦ ខែកក្កដា ឆ្នាំ២០២២នេះ លោក បូ ម៉េងទ្រី អភិបាលរង ក្រុងសៀមរាប បាននែនាំដល់អស់លោកលោកស្រីជាសមាជិកក្រុមប្រឹក្សាសង្កាត់ អាណត្តិទី៥ និងលោកលោកស្រីដែលជាចៅសង្កាត់ ចៅសង្កាត់រងទាំងអស់ ដែលបានទទួលនូវការស្រឡាញ់ពេញចិត្ត និងការគាំទ្រពីសំណាក់ប្រជាពលរដ្ឋ តាមរយៈការបោះឆ្នោតកាលកន្លងមកនេះ ត្រូវបន្តអភិវឌ្ឍន៍មូលដ្ឋានរបស់ខ្លួន ឲ្យកាន់តែរីកចម្រើនលើគ្រប់វិស័យបន្ថែមទៀត។ ក្នុងនាមជាសមាជិកក្រុមប្រឹក្សាដែលបានជាប់ឆ្នោត ទោះបីជាលោកលោកស្រីមានសមាសភាព មកពីគណបក្សនយោបាយតែមួយ ឬគណបក្សនយោបាយផ្សេងៗ គ្នាក៏ពិតមែន ប៉ុន្តែតាមគោលការណ៍ច្បាប់ ក្រុមប្រឹក្សាគឺជាតំណាងឲ្យប្រជាពលរដ្ឋ ក្នុងមូលដ្ឋានទាំងមូល។
លោកអភិបាលរងក្រុងបន្តទៀតថា នៅក្នុងអាណត្តិការងារ ៥ឆ្នាំនេះ លោកលោកស្រីជាសមាជិកក្រុមប្រឹក្សាត្រូវខិតខំបំពេញតួនាទី ភារកិច្ចក្នុងការគ្រប់គ្រង ចាត់ចែងកិច្ចការមូលដ្ឋានរបស់ខ្លួន ដើម្បីឆ្លើយតបទៅនឹងតម្រូវការប្រជាពលរដ្ឋ និងបម្រើផលប្រយោជន៍ ព្រមទាំងសេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព យុត្តិធម៌ និងមិនត្រូវប្រកាន់និន្នាការនយោបាយនោះឡើយ។ ជាក់ស្ដែងក្រុមប្រឹក្សាសង្កាត់ អាណត្ដិទី៥នេះ គឺកើតចេញពីឆន្ទៈរបស់ប្រជាពលលរដ្ឋ តាមរយៈការបោះឆ្នោតដោយផ្ទាល់ពីសំណាក់ប្រជាពលរដ្ឋ គឺត្រូវបន្ដនិរន្ដរភាពនៃការដឹកនាំគ្រប់គ្រង និងអភិវឌ្ឍន៍នៅមូលដ្ឋានក្នុងអាណត្ដិ ៥ឆ្នាំបន្ដទៀត ហើយត្រូវបន្ដអនុវត្ដការងារគ្រប់គ្រង និងការអភិវឌ្ឍមូលដ្ឋាន សំដៅធានាឲ្យមាននិរន្ដរភាព ក្នុងកិច្ចការរដ្ឋបាល និងការផ្ដល់សេវា ព្រមទំាងការអភិវឌ្ឍនៅមូលដ្ឋាន ឲ្យកាន់តែមានប្រសិទ្ធភាពថែមទៀត ដើម្បីឆ្លើយតបតម្រូវការរបស់ប្រជាពលរដ្ឋផងដែរ។
លោកអភិបាលរងក្រុង បញ្ជាក់បន្ថែមថា ដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ កាលពីថ្ងៃទី០៥ ខែមិថុនា ឆ្នាំ២០២២កន្លងមក ក៏ត្រូវបានវាយតម្លៃថាមានលក្ខណៈសេរី ត្រឹមត្រូវ យុត្តិធម៌ និងគ្មានអំពើហិង្សា ហើយលទ្ធផលនៃការបោះឆ្នោតក៏ត្រូវបានទទួលស្គាល់ពីគណបក្សនយោបាយនានា ដែលបានចូលរួមក្នុងការបោះឆ្នោតនេះ។ យោងតាមការប្រកាសលទ្ធផល ផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ របស់ គ.ជ.ប ក្នុងចំណោមឃុំ សង្កាត់នៅទូទាំងប្រទេសចំនួន ១.៦៥២ ដែលមានអាសនៈសរុបចំនួន ១១.៦២២ មានតែគណបក្សនយោបាយចំនួន ៩តែប៉ុណ្ណោះ ដែលបានទទួលអាសនៈក្រុមប្រឹក្សាឃុំ សង្កាត់ក្នុងអាណត្តិទី៥នេះ។
បញ្ជាក់ថា យោងតាមសេចក្តីប្រកាសរបស់ក្រសួងមហាផ្ទៃស្តីពីការទទួលស្គាល់សមាសភាពប្រធានក្រុមប្រឹក្សាសង្កាត់ ចៅសង្កាត់ ចៅសង្កាត់រង និងសមាជិកក្រុមប្រឹក្សាសង្កាត់ នៃសង្កាត់សាលាកំរើកក្រុងសៀមរាបខេត្តសៀមរាប សមាសភាពជាសមាជិកក្រុមប្រឹក្សាសង្កាត់សាលាកំរើកអាណត្តិទី៥នេះ មានចំនួន ១១រូប ដោយក្នុងនោះមានលោក សាម ឡន ជាចៅសង្កាត់ លោកស្រី នួន គឹមសួរ ជាចៅសង្កាត់រងទី១ និងលោក នង ធារ៉ា ជាចៅសង្កាត់រងទី២ ៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
