ប្រធានក្រុមប្រឹក្សា សមាជិកក្រុមប្រឹក្សា និងចៅសង្កាត់ ចៅសង្កាត់រង ដែលទើបជាប់ឆ្នោតថ្មីៗ អាណត្តិទី៥ នៃសង្កាត់ជ្រាវ ក្រុងសៀមរាប ត្រូវបានប្រកាសចូលកាន់តំណែង នាព្រឹកថ្ងៃទី០៧ ខែកក្កដា ឆ្នាំ២០២២នេះ ក្រោមអធិបតីភាពលោក លេង ពលៈ អភិបាលរងក្រុងសៀមរាប ដោយមានការចូលរួមពីសំណាក់ស្នងការរងខេត្ត នាយករដ្ឋបាលក្រុង ចាស់ព្រឹទ្ធាចារ្យ លោកលោកស្រីអាជ្ញាធរមូលដ្ឋាន មន្ត្រីពាក់ព័ន្ធ និងបងប្អូនប្រជាពលរដ្ឋផងដែរ។
លោក ក្អោប រ៉ន ដែលទើបជាប់ឆ្នោតជាចៅសង្កាត់ជ្រាវ បានថ្លែងអំណគុណយ៉ាងជ្រាលជ្រៅជូនចំពោះបងប្អូនប្រជាពលរដ្ឋទូទាំងសង្កាត់ជ្រាវ ដែលបានផ្តល់ទំនុកចិត្ត បោះឆ្នោតគាំទ្រដល់រូបលោក រួមនឹងថ្នាក់ដឹកនាំសង្កាត់ទាំងអស់ ដើម្បីបន្តដឹកនាំអភិវឌ្ឍន៍មូលដ្ឋាននេះន្តទោទៀត។ ដើម្បីជាការឆ្លើយតបនូវការជឿទុកចិត្ត អាជ្ញាធរនៃសង្កាត់ជ្រាវទាំងអស់ ប្តេជ្ញាចិត្តថាគោរពរដ្ឋធម្មនុញ្ញនៃច្បាប់ ព្រះរាជក្រឹត្យ អនុក្រិត្យ សារាចរ ប្រកាស សេចក្តី សម្រេច បទបញ្ជា និងលិខិតបទដ្ឋានគតិយុទ្ធជាធរមានរបស់រដ្ឋាភិបាលកម្ពុជា និងក្រសួងស្ថាប័នពាក់ព័ន្ធឲ្យបានល្អប្រសើរថែមទៀត។ ជាមួយគ្នានោះអាជ្ញាធរនឹងបន្តខិតខំប្រឹងប្រែង កសាងហេដ្ឋារចនាសម្ព័ន្ធ និងជួយប្រជាពលរដ្ឋ ដើម្បីបង្កើនការផលិតកសិកម្ម ជាពិសេសេដំណាំស្រូវ ហើយព្រមទាំងយកចិត្តទុកដាក់សម្របសម្រួល គាំទ្រ និងដោះស្រាយបញ្ហាសេវា សង្គមចាំបាច់មួយចំនួនសំដៅលើកកម្ពស់ជីវភាពរស់នៅរបស់ប្រជាជនឱ្យកាន់តែប្រសើរឡើង។
មានប្រសាសន៍ក្នុងឱកាសនោះ លោក លេង ពលៈ អភិបាលរងក្រុងសៀមរាប ក៍បានណែនាំដល់សមាជិកក្រុមប្រឹក្សាដែលជាប់ឆ្នោតអាណត្តិថ្មីទាំងអស់ អោយរក្សា សាមគ្គីភាពផ្ទៃក្នុងអោយបានល្អ ហើយសហការគ្នា ដើម្បីជួយបម្រើប្រជាពលរដ្ឋនៅក្នុងមូលដ្ឋានឲ្យបានល្អប្រសើរ ឈានទៅមានជំនឿទុកចិត្តហើយ ប្រជាពលរដ្ឋគាំទ្រ បោះឆ្នោតជួននៅអាណត្តិក្រោយៗទៀត។ ជាពិសេសត្រូវបន្តនិរន្តរភាពនៃការដឹកនាំគ្រប់គ្រង និងអភិវឌ្ឍនៅមូលដ្ឋានក្នុងអាណត្តិ ៥ឆ្នាំទៅមុខបន្តទៀត ដោយបន្តគ្រប់គ្រង និងការអភិវឌ្ឍមូលដ្ឋាន ពីក្រុមប្រឹក្សាសង្កាត់អាណត្តិចាស់ សំដៅធានាឱ្យមាននិរន្តរភាពក្នុងកិច្ចការរដ្ឋបាល និងការផ្តល់សេវា ព្រមទាំងការអភិវឌ្ឍនៅមូលដ្ឋានជាបន្តទៀត។
លោកបានបញ្ជាក់ថា ក្នុងនាមជាសមាជិកក្រុមប្រឹក្សាដែលបានជាប់ឆ្នោត ទោះបីជាអស់លោក លោកស្រី មានសមាសភាព មកពីគណបក្សនយោបាយតែមួយ ឬគណបក្សនយោបាយផ្សេងៗគ្នាក៏ពិតមែន ប៉ុន្តែតាមគោលការណ៍ច្បាប់ក្រុមប្រឹក្សា គឺជាតំណាងឱ្យប្រជាពលរដ្ឋក្នុងមូលដ្ឋានទាំងមូល។ ដូចនេះស្នើដល់ សមាជិកក្រុមប្រឹក្សា នៅក្នុងអាណត្តិការងារ ៥ឆ្នាំនេះ ត្រូវខិតខំបំពេញតួនាទីភារកិច្ចក្នុងការគ្រប់គ្រង ចាត់ចែងកិច្ចការក្នុងមូលដ្ឋានរបស់ខ្លួន ហើយត្រូវចេះសម្របសម្រួល និងផ្តល់ឱកាសឱ្យគ្នាទៅវិញទៅមក ដើម្បីឱ្យបញ្ចេញមតិយោបល់ ដើម្បីយកមតិយោបល់នោះជាឧត្តមប្រយោជន៍រួមរបស់ប្រជាពលរដ្ឋ ដើម្បីឆ្លើយតបទៅនឹងតម្រូវការប្រជាពលរដ្ឋ និងបម្រើផលប្រយោជន៍ ព្រមទាំងសេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព ដោយយុត្តិធម៌ និងមិនត្រូវប្រកាន់និន្នាការនយោបាយនោះឡើយ ព្រោះពេលដែលមកកាន់តំណែង ជាក្រុមប្រឹក្សានេះ គឺត្រូវទទួលខុសត្រូវចំពោះប្រជាពលរដ្ឋទាំងអស់គ្នា។
សូមជម្រាបថាយោងតាមសេចក្តីប្រកាសរបស់ក្រសួងមហាផ្ទៃ ស្តីពីការទទួលស្គាល់សមាសភាពប្រធានក្រុមប្រឹក្សាសង្កាត់ ចៅសង្កាត់ ចៅសង្កាត់រង និងសមាជិកក្រុមប្រឹក្សាសង្កាត់នៃសង្កាត់ជ្រាវ ក្រុងសៀមរាប អាណត្តិទី៥ ថ្មីនេះ មានសមាសភាពជាសមាជិកក្រុមប្រឹក្សាសង្កាត់ ចំនួន ០៧រូប ដោយ បានសម្រេចប្រកាស៖ ១.ទទួលស្គាល់សមាភាពជាប្រធានក្រុមប្រឹក្សា សង្កាត់ និងជាសមាជិកក្រុមប្រឹក្សាសង្កាត់ជ្រាវមាន លោក ក្អោប រ៉ន ជាប្រធានក្រុមប្រឹក្សាសង្កាត់ និងមានសមាជិក ៦នាក់ទៀត ។ ២.ទទួលស្គាល់សមាសភាពជាចៅសង្កាត់ ចៅសង្កាត់រងទី១ និងចៅសង្កាត់រងទី២ នៃសង្កាត់ជ្រាវ ក្រុងសៀមរាប ដោយក្នុងនោះមាន៖ លោក ក្អោប រ៉ន ជាចៅសង្កាត់, លោក ទុំ ពៀត ជាចៅសង្កាត់រងទី១ និង លោក ក្តឹប សារ៉ាត់ ជាចៅសង្កាត់រងទី២៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
