នៅថ្ងៃទី១២ ខែមីនា ឆ្នាំ២០១៩នេះ មហាសេដ្ឋីចិន លោក ជេក ម៉ា Jackma ត្រូវបានគេប្រទះដោយចៃដន្យ នៅក្នុងតំបន់រមណីដ្ឋានអង្គរ ខេត្តសៀមរាប ដែលនេះគឺជាដំណើរកំសាន្តដ៏កម្រ មិនធ្លាប់មានក្នុងប្រទេសកម្ពុជា។
បើតាមការឲ្យដឹងពីមន្ត្រីទេសចរណ៍ខេត្តសៀមរាប បានបញ្ជាក់ថា លោក ជេក ម៉ា ស្នាក់នៅ សណ្ឋាគារ អាម៉ាន់ សារ៉ា ក្នុងក្រុងសៀមរាប នៅថ្ងៃស្អែក ពេលព្រឹក លោក នឹងទៅទស្សនាប្រាសាទបន្ទាយស្រី និងត្រលប់មកវិញសណ្ឋាគារពេលថ្ងៃត្រង់ បន្ទាប់មកលោកចាកចេញពីខេត្តសៀមរាប តាមជើងហោះហើរ នៅម៉ោង ០២រសៀល។
សូមជម្រាបថា លោក ជេក ម៉ា Jackma គឺជាសហស្ថាបនិក និងជាប្រធានប្រតិបត្តិនៃក្រុមហ៊ុន Alibaba Group ដែលជាក្រុមហ៊ុនបច្ចេកវិទ្យាពហុជាតិ។ គិតត្រឹមខែមករាឆ្នាំ ២០១៩ គាត់គឺជាបុរសម្នាក់ ដែលមានទ្រព្យសម្បត្តិសរុប ៣៦.២ ពាន់លានដុល្លារសហរដ្ឋអាមេរិច និងជាមនុស្សម្នាក់ក្នុងចំណោមអ្នកមានបំផុតនៅលើពិភពលោក។
ប្រភព៖ មន្ទីរទេសចរណ៍ខេត្តសៀមរាប
