លោកវរសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា បុរសម្នាក់ឈ្មោះ ឡា លា ភេទប្រុស អាយុ៤៧ឆ្នាំ មុខរបរធ្វើស្រែ មានស្រុកកំណើតនៅភូមិព្រៃធំ ឃុំគោកធ្លកលើ ស្រុកជីក្រែង បច្ចុប្បន្នរស់នៅភូមិស្រះ ឃុំរើល ស្រុកពួក ត្រូវបានសមត្ថកិច្ចនគរបាលស្រុកពួក សុំគោលការណ៍ឃាត់ខ្លួន ។
ដែលជន រូបនេះ ជាប់សង្ស័យបានប្រព្រឹត្តករណីបង្កឲ្យទ្រព្យសម្បត្តិអ្នកដទៃដោយចេតនា គឺដុតផ្ទះ ដែលកើតឡើងនៅវេលាម៉ោង ១២និង៣០នាទី ថ្ងៃទី១១ ខែមីនា ឆ្នាំ២០១៩ម្សិលមិញនេះ បណ្តាលឲ្យឆេះផ្ទះរបស់ប្រជាពលរដ្ឋចំនួន៤ខ្នង នៅភូមិចំនួន៣ ក្នុងមូលដ្ឋានឃុំរើល ស្រុកពួក ខេត្តសៀមរាប រួមមាន ៖
ផ្ទះទី១. របស់ជនរងគ្រោះឈ្មោះ ញ៉ាណ លឿ ភេទស្រី អាយុ៥៣ឆ្នាំ នៅភូមិស្រះ មានផ្ទះទំហំ៦ម៉ែត្រគុណនឹង៥ម៉ែត្រ កម្ពស់២ម៉ែត្រ ជញ្ជាំងក្ដារ ប្រក់ស៊ីប្រូ ឆេះអស់ទាំងស្រុង ។
ផ្ទះទី២, របស់ជនរងគ្រោះឈ្មោះ ព្រឿម គង់ ភេទស្រី អាយុ២៤ឆ្នាំ នៅភូមិត្រពាំងធំ មានផ្ទះទំហំ៥ម៉ែត្រគុណនឹង៤ម៉ែត្រ កម្ពស់១,៨០ម៉ែត្រ ប្រក់ស័ង្កសី ដែលខូចខាតឆេះស្រូវ១,៥០តោន , កង់១ , ទូរទស្សន៍១ , ផ្ទាំងសូឡា១គ្រឿង (ឆេះអស់ទាំងស្រុង) ,។
ផ្ទះទី៣. របស់ជនរងគ្រោះឈ្មោះ ភាវ ថា ភេទស្រី អាយុ៥៨ឆ្នាំ នៅភូមិក្បាលក្រពើ ខូចខាតឆេះគ្រឿងឈើទុកធ្វើផ្ទះ១ឈុត , ស្រូវ១តោនកន្លះ , ទូរទស្សន៍ ១ , ផ្ទាំងសូឡា១គ្រឿង , កង់៣គ្រឿង និងប្រាក់បាត45.000បាត ( ឆេះអស់ទាំងស្រុង) ។
ផ្ទះទី៤. របស់ជនរងគ្រោះឈ្មោះ មឿន មឿត ភេទប្រុស អាយុ៤០ឆ្នាំ នៅភូមិត្រពាំងធំ មានផ្ទះទំហំ៦គុណនឹង៥ម៉ែត្រ មានកម្ពស់២ម៉ែត្រ , ខូចខាតឆេះស្រូវ២តោន , ទូរទស្សន៍ ១ , ផ្ទាំងសូឡាមួយគ្រឿង (ឆេះអស់ទាំងស្រុង) ។
នៅពេលនេះកម្លាំងសមត្ថកិច្ចនគរបាលស្រុកពួក កំពុងឃាត់សួរនាំនៅប៉ុស្ដិ៍នគរបាលរដ្ឋបាលឃុំរើល អំពីមូលហេតុដើម្បីកសាងសុំណុំរឿងបញ្ជូនខ្លួនជនសង្ស័យទៅតាមនីតិវិធីបន្ត៕
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក លីវ សាន្ត
