ប្រធានាធិបតី នៃសាធារណរដ្ឋកូរ៉េ ឯកឧត្តម មូន ជេអ៊ីន ( Moon Jae In)នឹងមកធ្វើទស្សនកិច្ចនៅប្រទេសកម្ពុជា រយៈពេល ៣ថ្ងៃ គឺចាប់ពីថ្ងៃទី១៤ ដល់ ១៦ ខែមីនា ឆ្នាំ២០១៩នេះ ដែលដំណើរទស្សនកិច្ចនេះ បានផ្ដោតសំខាន់ទៅលើការបង្កើន និងពង្រឹងទំនាក់ទំនងរវាងប្រទេសទាំងពីរ ក្នុងវិស័យសេដ្ឋកិច្ច បញ្ហាក្នុងតំបន់ និងអន្តរជាតិ រួមនិងវិស័យសំខាន់ៗដទៃទៀត។
បើយោងតាមសេចក្ដីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ ឯកឧត្តម មូន ជេអ៊ីន ( Moon Jae In) នឹងចូលគាល់ ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅព្រះបរមរាជវាំង ក្នុងរាជធានីភ្នំពេញ។
ក្នុងដំណើរទស្សនកិច្ចនេះដែរ ឯកឧត្តម មូន ជេអ៊ីន ( Moon Jae In) ក៏នឹងមានជំនួបជាមួយ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលថ្នាក់ដឹកនាំទាំងពីរ នឹងពិភាក្សាពីការជម្រុញទំនាក់ទំនងទ្វេរភាគីនិងការពង្រឹងកិច្ចសហប្រតិបត្តិការលើវិស័យនានាបន្ថែមទៀត ក៏ដូចជាផ្លាស់ប្ដូរយោបល់គ្នាលើបញ្ហាតំបន់ និងអន្តរជាតិដែលជាកង្វល់ និង ផលប្រយោជន៍រួម។ បន្ទាប់ពីបញ្ចប់ជំនួបនេះ ថ្នាក់ដឹកនាំទាំងពីរ នឹងធ្វើជាសាក្សី ក្នុងពិធីចុះហត្ថលេខា លើកិច្ចព្រមព្រៀងមួយចំនួន និងធ្វើសេចក្ដីប្រកាសព័ត៌មានរួមគ្នាផងដែរ។
លើសពីនោះ ក្នុងសេចក្ដីប្រកាសព័ត៌មានដដែលនេះ បានឲ្យដឹងទៀតថា សម្ដេចតេជោ នាយករដ្ឋមន្ត្រី នៃកម្ពុជា និងប្រធានាធិបតី នៃសាធារណរដ្ឋកូរ៉េ ក៏រំពឹងថានឹងមានការថ្លែងសុន្ទរកថា ក្នុងវេទិកាធុរកិច្ចកម្ពុជា-សាធារណរដ្ឋកូរ៉េ ផងដែរ ដើម្បីលើកទឹកចិត្តឲ្យមានការវិនិយោគការផ្លាស់ប្ដូរសេដ្ឋកិច្ច និងពាណិជ្ជកម្មរវាងប្រទេសទាំង ២។
ដោយឡែក ឯកឧត្តមនាយឧត្តមសេនីយ៍ ទូច ណារ៉ុថ អគ្គស្នងការរងនគរបាលជាតិ បានបញ្ជាក់ថា ថ្ងៃទី១៦ ខែមីនា ឆ្នាំ២០១៩ ឯកឧត្តម មូន ជេអ៊ីន ( Moon Jae In) ក៏នឹងមកទស្សនកិច្ចនៅខេត្តសៀមរាប ដើម្បីទស្សនាតំបន់រមណីយដ្ឋាន និង តំបន់ប្រាសាទបុរាណនានាក្នុងខេត្តផងដែរ។
សូមបញ្ជាក់ថា នេះជាដំណើរទស្សនកិច្ចជាលើកដំបូង របស់ឯកឧត្តម មូន ជេអ៊ីន ( Moon Jae In) មកកាន់កម្ពុជា។ក្រសួងការបរទេស និងសហប្រតិបត្តិការអន្តរជាតិ នៃកម្ពុជា បានចាត់ទុក ដើរទស្សនកិច្ចរបស់ឯកឧត្តម មូន ជេអ៊ីន នាពេលនេះ ជាព្រឹត្តិការណ៍ដ៏សំខាន់មួយ ក្នុងទំនាក់ទំនងកម្ពុជាសាធារណរដ្ឋកូរ៉េ ដែលនឹងពង្រឹងមិត្តភាពហើយនឹងធ្វើឲ្យកិច្ចសហប្រតិបត្តិការរវាងប្រទេសទាំង ២ ឲ្យកាន់តែមានភាពទូលាយនិងស៊ីជម្រៅថែមទៀត។
អត្ថបទ៖ លោក សេង ផល្លី និង លោក ថាច់ ពិសុទ្ធ
រូបភាព៖ អ៊ិនធើណិត និងថាច់ ពិសុទ្ធ
