ក្នុងបរិបទឌីជីថលនាពេលបច្ចុប្បន្ន សារព័ត៌មានបានជះឥទ្ធិពលយ៉ាងខ្លាំងទៅការអភិវឌ្ឍសង្គម និងប្រយោជន៍សាធារណៈ ក្នុងនោះការសរសេរព័ត៌មានមិនពិត និងក្លែងក្លាយ បានរីករាលដាលយ៉ាងច្រើននៅក្នុងប្រព័ន្ធបណ្ដាញសង្គមនានា នេះបើតាមការលើកឡើងរបស់ លោក លី សំរិទ្ធ អភិបាលរងខេត្តសៀមរាប ក្នុងពិធីបើកវគ្គបណ្តុះបណ្តាលផ្នែកផលិតព័ត៌មាន “ការសសេរព័ត៌មានបឋម” ដល់មន្ត្រីមកពីតាមបណ្តាមន្ទីរ អង្គភាព និងរដ្ឋបាលក្រុង ស្រុកក្នុងខេត្ត នៅថ្ងៃទី២០ ខែកក្កដា ឆ្នាំ២០២២នេះ។
លោក លី សំរិទ្ធ បន្តថា សារព័ត៌មានគឺជាវិស័យដ៏មានសារសំខាន់មួយ ក្នុងចំណោមវិស័យផ្សេងៗទៀត ដែលបានផ្សារភ្ជាប់ទំនាក់ទំនងរវាងវិស័យឯកជន និងរាជរដ្ឋាភិបាល និងពីអាជ្ញាធរ ទៅកាន់ប្រជាពលរដ្ឋ។ លោកបន្ថែមថា នៅជុំវិញខ្លួនយើង អ្វីក៏ដោយគឺសុទ្ធតែជាព័ត៌មាន តែសូមផ្សព្វផ្សាយព័ត៌មានដែលជាប្រយោជន៍ដល់សាធារណជន និងចៀសវាងផ្សព្វផ្សាយព័ត៌មានមិនពិតបំពុលដល់សង្គម។ ជាមួយនោះ វគ្គបណ្តុះបណ្តាលផ្នែកផលិតព័ត៌មាន មានសារសំខាន់ណាស់ សម្រាប់មន្ត្រីនៅតាម មន្ទីរ អង្គភាព រដ្ឋបាលក្រុង ស្រុក ដែលជាការពង្រឹងសមត្ថភាពក្នុងការផលិតព័ត៌មាន និងផ្សព្វផ្សាយព័ត៌មានពិតរបស់អង្គភាពខ្លួន ក្នុងការទប់ស្កាត់ការផ្សព្វផ្សាយព័ត៌មានមិនពិត ដែលជាការបំពុលសង្គម និងបង្កឱ្យមានការភ័ន្តច្រឡំមកលើរាជរដ្ឋាភិបាល។
គួររំលឹកថា នៅក្នុងជំនួបជាមួយអ្នកសារព័ត៌មានទូទាំងប្រទេសលើកទី៤ កាលពីខែមករា ឆ្នាំ២០២០ ដែលមានសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីដ៏ខ្ពង់ខ្ពស់ បានផ្តល់អនុសាសន៍ ជំរុញដល់ស្ថាប័នវិស័យព័ត៌មានរដ្ឋ និងឯកជន ត្រូវយកចិត្តទុកដាក់បណ្តុះបណ្តាលសមត្ថភាពដល់អ្នកសារព័ត៌មាន ក្នុងការផលិតព័ត៌មាន ប្រកបដោយតម្លាភាព ប្រសិទ្ធភាព ក្រោមស្មារតីទទួលខុសត្រូវក្នុងវិជ្ជាជីវៈ និងគោរពឱ្យបានខ្ជាប់ខ្ចួនតាមច្បាប់ស្តីពី “របបសារព័ត៌មាន”។
ក្នុងឱកាសនោះដែរ លោកអភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប បានកោតសរសើរដល់មន្ទីរព័ត៌មានខេត្ត និងសិក្ខាកាម មកពីបណ្ដាមន្ទីរ អង្គភាព រដ្ឋបាលក្រុង ស្រុក ក្នុងខេត្ត ដែលបានបង្ហាញពីឆន្ទៈក្នុងការចូលរួមលើកកម្ពស់ការអភិវឌ្ឍរបស់រាជរដ្ឋាភិបាល ជាពិសេសក្នុងខេត្តសៀមរាប តាមរយៈការពង្រឹងសមត្ថភាពផលិតព័ត៌មាន ដែលជាប្រយោជន៍ដល់សង្គម និងប្រជាពលរដ្ឋ។
អត្ថបទ៖ លោក ជា ស្រស់
រូបភាព ៖ សហការី
កែសម្រួល៖ លោក សេង ផល្លី
