ក្នុងរយៈពេល៣ថ្ងៃ ចាប់ពីថ្ងៃទី១៩ ដល់ថ្ងៃទី២១ ខែកក្កដា ឆ្នាំ២០២២នេះ សាខាកាកបាទក្រហមកម្ពុជាខេត្តសៀមរាប សហការជាមួយមន្ទីរអប់រំ យុវជន និងកីឡាខេត្ត ក្រោមកិច្ចសហការ និងគាំទ្រពីអង្គការ People’s Action for Inclusive Development (PAfID) បានបើកវគ្គផ្សព្វផ្សាយ ស្តីពីការទប់ស្កាត់ការកេងប្រវ័ញ្ចផ្លូវភេទ និងឥរិយាបថអវិជ្ជមានរបស់សង្គមលើកុមារមានពិការភាព ជូនដល់ប្អូនៗជាយុវជនកាកបាទក្រហមកម្ពុជា និងសិស្សានុសិស្ស ចំនួន២៦០នាក់ មកពីវិទ្យាល័យចំនួន៣ មាន៖ វិទ្យាល័យ ១០ មករា ១៩៧៩ ,វិទ្យាល័យ ហ៊ុន សែន វត្តស្វាយ និងវិទ្សាល័យ ហ៊ុន សែន សៀមរាប។
លោក ស៊ុ សំអន នាយកប្រតិបត្តិសាខាកាកបាទក្រហមខេត្ត បានមានប្រសាសន៍ថា គោលបំណងនៃការបើកវគ្គអប់រំផ្សព្វផ្សាយនេះ គឺដើម្បីឱ្យយុវជនកាកបាទក្រហមកម្ពុជា និងយុវសិស្សទាំងអស់ ទទួលបាននូវចំណេះដឹង ដើម្បីបង្ការការពារពីការកេងប្រវ័ញ្ចផ្លូវភេទកុមារតាមប្រព័ន្ធអនឡាញ ហើយយកចំណេះដឹងទាំងនេះទៅផ្សព្វផ្សាយបន្តដល់មិត្តភក្តិ បងប្អូន និងប្រជាពលរដ្ឋក្នុងសហគមន៍ ឱ្យចូលរួមការពារ និងទប់ស្កាត់ពីការកេងប្រវ័ញ្ចគ្រប់រូបភាព និងជាការបង្កើនឱកាសនៃការចូលរួមរបស់កុមារក្នុងសកម្មភាពអភវឌ្ឍសង្គមដោយគ្មានការរំលោភបំពាន និងការភ័យខ្លាច។ លោកនាយកប្រតិបត្តិសាខា ក៍បានលើកឡើងអំពីអត្ថប្រយោជន៍ និងផលប៉ះពាល់ពីការប្រើប្រាស់អ៊ិនធឺណែត និងបានលើកទឹកចិត្តឱ្យក្មួយៗ យុវជនចេះទាញយកបទពិសោធន៍ រឿងល្អៗ ទាក់ទងនឹងការសិក្សាស្រាវជ្រាវអំពីបច្ចេកវិទ្យាថ្មីៗ ដើម្បីអភិវឌ្ឍន៍នាពេលអនាគតផងដែរ។
លោក ស៊ិន កុសល ប្រធានការិយាល័យយុវជន នៃមន្ទីរអប់រំ យុវជន និងកីឡាខេត្ត បានមានប្រសាសន៍បន្ថែមថា ក្នុងរយៈពេលនៃការផ្ទុះជំងឺរាតត្បាតនៃជំងឺកូវីដ-១៩ នៅទូទាំងទាំងពិភពលោក អំពើកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ ត្រូវបានរកឃើញថា បានកើនឡើងជាលំដាប់ ហើយអំពើជួញដូររូបអាសអាភាសរបស់កុមារលើប្រព័ន្ធអ៊ីនធឺណិត ត្រូវបានកើតឡើងក្នុងបរិបទជាសកល ស្របពេលកម្ពុជាក៏មានសន្ទុះកើនឡើង នៃការប្រើប្រាស់ប្រព័ន្ធអនឡាញរបស់កុមារក្នុងពេលបច្ចុប្បន្នផងដែរ។ លោកបន្តថាដើម្បីបង្ការពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ ត្រូវប្រុងប្រយ័ត្នការពារខ្លួនដូចជា គួរយល់ដឹងអំពីកម្មវិធីសុវត្ថិភាពថ្មីៗតាមអនឡាញ និងហានិភ័យនៃការប្រើប្រាស់អ៊ីនធឺណិត។ ប្រសិនបើមានការទទួលធ្វើមិត្តមើលទៅគួរឱ្យសង្ស័យសូមកុំទទួលត្រូវកំណត់ឯកជនភាពរបស់អ្នកថា មានតែមនុស្សត្រឹមត្រូវដែលអាចឃើញអ្វីអ្នកបានបង្ហោះ ត្រូវចាត់ទុកថា ការធ្វើសកម្មភាពតាមអនឡាញប្រៀបបានដូចការធ្វើសកម្មភាពជាសាធារណៈ សូមជៀសវាងផ្ញើរូបភាព ឫវីដេអូរបស់អ្នកទៅកាន់ជនមិនស្គាល់ សូមមានការប្រុងប្រយ័ត្នពេលមានគេឲ្យកាដូតាមអនឡាញ ត្រូវមានការប្រុងប្រយ័ត្នជានិច្ច ប្រសិនអ្នកសំរេចចិត្តជួបនរណាដោយផ្ទាល់ ដាច់ខាតមិនត្រូវផ្ញើរូបអាក្រាតកាយទៅកាន់នរណាក៏ដោយ ទោះបីអ្នកនោះជាសាច់ញាតិ ឫជាមិត្តភក្តិជិតស្និត។
បើតាមលោកស្រី សំ សាវ៉ាង មន្រ្តីទទួលបន្ទុកការងារយុវជន នៃសាខាកាកបាទក្រហមខេត្ត បានមានប្រសាសន៍បញ្ជាក់ថា វគ្គផ្សព្វផ្សាយស្តីពីការទប់ស្កាត់ការកេងប្រវ័ញ្ចផ្លូវភេទ និងឥរិយាបថអវិជ្ជមានរបស់សង្គមលើកុមារមានពិការភាពនាពេលនេះ គឺមានប្រធានបទចំនួន៣ ដែលត្រូវយកមកធ្វើបទបង្ហាញជូនប្អូនយុវជនកាកបាទក្រហមកម្ពុជា និងយុវសិស្ស នាពេលនេះគឺមាន ១.ការទប់ស្កាត់ការកេងប្រវ័ញ្ចផ្លូវភេទកុមារតាមអនឡាញ ដោយមានខ្សែវីដេអូរអប់រំខ្លី ,២.ការលើកកម្ពស់កុមារមានពិការភាពក្នុងការចូលរួមការងារសង្គម និង៣.បញ្រ្ជាបពីតួនាទី និង គោលការណ៍គ្រឹះទាំង៧ កាកបាទក្រហមកម្ពុជា ការងារយុវជនកាកបាទក្រហមកម្ពុជា និងសុវត្ថិភាពចរណ៍ ការថែរក្សាសុខភាពរក្សានូវវិធានការ ៣ការពារ ៣កុំ និងសម្រាកក្នុងមុងការពារពីជំងឺគ្រុនឈាម ហើយព្រមទាំងមានការចែកខិតប័ណ្ណផងដែរ៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
