ក្រសួងទេសចរណ៍កម្ពុជា ដោយបានការគាំទ្រពីលេខាធិការដ្ឋានអាស៊ាន បានធ្វើជាម្ចាស់ផ្ទះរៀបចំវគ្គបណ្ដុះបណ្ដាលថ្នាក់តំបន់ជូនដល់ គ្រូបង្គោលស្តង់ដាសហគមន៍ទេសចរណ៍អាស៊ានលើកទី២ រយៈពេលពីរថ្ងៃគឺថ្ងៃទី២៧-២៨ ខែកក្កដា ឆ្នាំ២០២២ នៅសណ្ឋាគារសុខាល័យខេត្តសៀមរាប ក្រោមអធិបតី ឯកឧត្តម ហោ មុនីរ័ត្ន រដ្ឋលេខាធិការក្រសួងទេសចរណ៍ និងវត្តមានប្រតិភូក្រសួង ដោយមានសិក្ខាកាមមកពីប្រទេសក្នុងតំបន់សហគមន៍អាស៊ាន សរុបចំនួន ៥៤រូប។
សិក្ខាសាលានេះដែរ ធ្វើឡើងក្នុងគោលបំណងជួយឲ្យសិក្ខាកាមដែលចូលរួមទាំងអស់ ទទួលបាននូវចំណេះដឹង និងមេរៀនកាន់តែទូលំទូលាយ សម្រាប់ការអនុវត្តប្រកបដោយប្រសិទ្ធភាពនៃស្តង់ដារទេសចរណ៍សហគមន៍អាស៊ាន ឆ្ពោះទៅរកការស្នើសុំពានរង្វាន់នៅក្នុងវេទិកាទេសចរណ៍អាស៊ានឆ្នាំ២០២៣ ហើយកម្ពុជាក៍ត្រៀមខ្លួនជាស្រេចក្នុងការធ្វើជាម្ចាស់ផ្ទះនៃព្រឹត្តិការណ៍ទេសចរណ៍ផ្សេងៗទៀត។
ថ្លែងបើកអង្គសិក្ខាសាលា ឯកឧត្តម ហោ មុនីរ័ត្ន មានប្រសាសន៍ថា រយៈពេល ២ឆ្នាំកន្លងមក ពិភពលោកបានប្រឈមមុខនឹងវិបត្តិកូវីដ-១៩ បង្កើតបញ្ហាប្រឈមយ៉ាងច្រើន លើគ្រប់វិស័យទាំងសេដ្ឋកិច្ចសង្គម ក៍ដូចជាវិស័យទេសចរណ៍ ធ្វើឲ្យជីវិតមនុស្សរាប់លាននាក់ប្រឈមនឹងហានិភ័យ ការតភ្ជាប់ពិភពលោកត្រូវបានកាត់ផ្ដាច់ និងអនាគតមិនច្បាស់លាស់។ ដោយសារការចាក់វាក់សាំងជាយុទ្ធសាស្ត្រសំខាន់ក្នុងការបើកឡើងវិញ នូវគ្រប់វិស័យសេដ្ឋកិច្ចសង្គម ប្រទេសកម្ពុជាបានសម្រេច លើការបង្កើតឲ្យមានភាពស៊ាំក្នុងសហគមន៍ដែលនាំទៅ ធម្មតាថ្មីនឹងឈានដល់ការបើកប្រទេសឡើងវិញពេញលេញ ក្នុងបរិបទនៃការរស់នៅតាមបែបគន្លងថ្មីហើយ នៅឆ្នាំ២០១៩ រាជរដ្ឋាភិបាលកម្ពុជា បានដាក់ចេញនូវផែនទីបង្ហាញផ្លូវស្តីពីការលើកកម្ពស់ និងស្ការវិស័យទេសចរណ៍ក្នុងអំឡុងពេលនិងក្រោយជំងឺកូរីដ-១៩ គោលនយោបាយសម្រាប់យុទ្ធសាស្ត្រទេសចរណ៍ក្នុងស្រុក រួមជាមួយនឹងសកម្មភាពផ្សព្វផ្សាយ និងកិច្ចសហប្រតិបត្តិការអន្តរជាតិផ្សេងៗទៀត។
ឯកឧត្តម រដ្ឋលេខាធិការ បញ្ជាក់ថា ក្នុងផែនការយុទ្ធសាស្រ្តទេសចរណ៍អាស៊ាន២០១៦-២០២៥ អាស៊ានមានផែនការស្តារឡើងវិញ ក្រោយកូរីដ-១៩ ជាច្រើន ដូចជា៖ ផែនការការងារកិច្ចសហប្រតិបត្តិការទេសចរណ៍អាស៊ាន កម្មវិធីសិក្សាទូទៅអាស៊ានសម្រាប់ការបណ្ដុះបណ្ដាល និងអប់រំស្តង់ដារគុណភាពអាស៊ានមួយចំនួន រួមទាំងស្តង់ដារទេសចរណ៍សហគមន៍អាស៊ាន ហើយវគ្គបណ្តុះបណ្តាលថ្ងៃនេះជាការប្ដេជ្ញាចិត្តមួយទៀត របស់ថ្នាក់ដឹកនាំទេសចរណ៍អាស៊ាន ក្នុងការលើកកម្ពស់គុណភាពស្តង់ដារទេសចរណ៍សហគមន៍អាស៊ាន តាមរយៈការបណ្តុះបណ្តាលគ្រូបង្គោលពីរដ្ឋជាសមាជិក។
បើតាម ឯកឧត្តម ទ្រី ឈីវ ទីប្រឹក្សា និងជាប្រធាននាយកដ្ឋានសហប្រតិបត្តិការអន្តរជាតិ និងអាស៊ាន បានឲ្យដឹងថា កម្ពុជាជាអ្នកផ្តួចផ្តើមគំនិត និងត្រូវបានអាស៊ានទទួលយកនៅអំឡុងឆ្នាំ២០១៥ ជាមួយនឹងការផ្តល់រង្វាន់នៅរៀងរាល់ ២ឆ្នាំម្តង នូវវិញ្ញាបនបត្រនិងស្លាកសញ្ញាស្តង់ដារសហគមន៍ទេសចរណ៍អាស៊ាន ទៅដល់ប្រទេសសមាជិកអាស៊ាន។ នៅឆ្នាំ២០១៩ កម្ពុជាក៍ទទួលបានការផ្តល់ទំនុកចិត្តជាថ្មី ដើម្បីធ្វើបច្ចុប្បន្នភាពស្តង់ដារសហគមន៍ទេសចរណ៍អាស៊ាន ទៅតាមបរិបទ និងសេចក្តីត្រូវការក្នុងវិស័យទេសចរណ៍ដូចជាវិធានសុវត្ថិភាព វិធានសុខាភិបាល ដើម្បីបញ្ចូលទៅក្នុងស្តង់ដារសហគមន៍ទេសចរណ៍អាស៊ាន សំដៅឆ្លើយតបបានទៅនឹងបញ្ហាប្រឈម និងសូចនាករនាពេលអនាគតក្នុងការអភិវឌ្ឍវិស័យទេសចរណ៍ប្រកបដោយចេរភាព ជាពិសេសទេសចរណ៍សហគមន៍។
សូមជំរាបថា សហគមន៍ទេសចរណ៍ គឺ “សំដៅដល់ទីតាំង ឬកន្លែងទាក់ទាញទេសចរណ៍ ដែលរៀបចំដោយសហគមន៍មូលដ្ឋានខ្លួនផ្ទាល់ ឬដោយមានកិច្ចសហប្រតិបត្តិការ ដើម្បីពង្រឹងកិច្ចអភិវឌ្ឍន៍មូលដ្ឋាន ក្នុងគោលបំណងកាត់បន្ថយភាពក្រីក្រ និងលើកស្ទួយជីវភាពរស់នៅរបស់សហគមន៍ និងបម្រើផលប្រយោជន៍ប្រជាពលរដ្ឋមូលដ្ឋាន តាមរយៈការអភិវឌ្ឍទេសចរណ៍ប្រកបដោយនិរន្តរភាព”។ ស្តង់ដារសហគមន៍ទេសចរណ៍អាស៊ានទាមទារឱ្យសហគមន៍បំពេញនូវលក្ខ័ណ ដើម្បីឆ្លងកាត់គណៈកម្មការវាយតម្លៃ នូវសូចនាករគោលចំនួន ១០ចំណុច ដូចជា៖ ១.កម្មសិទ្ធិសហគមន៍ និងការគ្រប់គ្រង ,២.ការរួមចំណែកដល់សុខុមាលភាពសង្គម ,៣.ការគ្រប់គ្រងបរិស្ថាន និងធនធានធម្មជាតិប្រកបដោយនិរន្តរភាព ,៤.ការជម្រុញលើកទឹកចិត្តនូវការទំនាក់ទំនងរវាងសហគមន៍និងទេសចរ ,៥.ទេសចរគុណភាពនិងសេវាកម្មមគ្គុទេសក៍ ,៦.គុណភាពម្ហូបអាហារនិងភសជ្ជៈ ,៧.គុណភាពកន្លែងស្នាក់នៅ ,៨.ការអនុវត្តនៃប្រតិបត្តិករទេសចរណ៍សហគមន៍ ,៩.សុវត្ថិភាពនិងអនាម័យ និង១០.ការលើកកម្ពស់ការច្នៃប្រឌិត និងការប្រើប្រាស់បច្ចេកវិទ្យានៅក្នុងសហគមន៍៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
