បរិមាណសំណល់វេជ្ជសាស្ត្រ ដែលបង្កើតឡើងចេញពីមូលដ្ឋានថែទាំសុខភាពសាធារណៈ ក្នុងមួយឆ្នាំ អាចមានប្រមាណ ២,០០០តោន ដោយឡែកបរិមាណសំណល់បង្កើតពីមូលដ្ឋានថែទាំសុខភាពឯកជននៅទូទាំងប្រទេសមានប្រមាណ ៥,៦៧៦តោន ក្នុង១ឆ្នាំ នេះបើតាមការឱ្យដឹងពីឯកឧត្តម សាបូ អូហ្សាណូ រដ្ឋលេខាធិការក្រសួងបរិស្ថាន ក្នុងសិក្ខាសាលាផ្សព្វផ្សាយស្តីពី ការគ្រប់គ្រងសំណល់វជ្ជសាស្ត្រនៅកម្ពុជា នៅសាលាខេត្តសៀមរាប ថ្ងៃ០៣ ខែកក្កដា ឆ្នាំ២០២២។
សិក្ខាសាលាផ្សព្វផ្សាយនេះ មានការចូលរួមពី ឯកឧត្តម សុខ សុគន្ធ អនុរដ្ឋលេខាធិការក្រសួងសុខាភិបាល និងលោក ប្រាក់ សោភ័ណ្ឌ អភិបាលរងខេត្តសៀមរាប រួមនឹងឯកឧត្តម លោក-លោកស្រី មកពីស្ថាប័ន មន្ទីរ អង្គភាពពាក់ព័ន្ធ និងវិស័យឯកជនមួយចំនួនទៀតនៅក្នុងខេត្តសៀមរាប។
យោងតាមការសិក្សាកន្លងមក ឯកឧត្តម សាបូ អូហ្សាណូ លើកឡើងថា ការគ្រប់គ្រងសំណល់វេជ្ជសាស្ត្រនៅកម្ពុជា ស្ថិតនៅក្នុងស្ថានភាពមិនទាន់ល្អប្រសើរនៅឡើយទេ បើធៀបនឹងស្ដង់ដារនៃការគ្រប់គ្រងសំណល់វេជ្ជសាស្ត្ររបស់អង្គការសុខភាពពិភពលោក។ សំណល់វេជ្ជសាស្ត្រមួយចំនួន ត្រូវបានប្រមូលដាក់លាយឡំគ្នានឹងសំណល់តាមលំនៅឋាន និងទីប្រជុំជន។ ឯកឧត្តម បន្ថែមថាការៀបចំសិក្ខាសាលានេះ គឺដើម្បីជំរុញឱ្យមានការកាត់បន្ថយទង្វើ នៃការបោះចោលសំណល់វេជ្ជសាស្ត្រ ដែលអាចបង្ករគ្រោះថ្នាក់ធ្ងន់ធ្ងរ ដល់សុខភាពសាធារណៈ ជាពិសេសបុគ្កលិក និងប្រជាពលរដ្ឋ ដែលបាននឹងកំពុងប្រកបរបររើសសំរាមនៅទីលានចាក់សំរាម តាមរយៈការប៉ះពាល់ ឬមុតសំណល់មុតស្រួចដែលមានផ្ទុកមេរោគ។
ឯកឧត្តមរដ្ឋលេខាធិការ បញ្ជាក់ថា ដើម្បីឆ្លើយតបទៅនឹងបញ្ហាប្រឈមទាំងនេះរាជរដ្ឋាភិបាលកម្ពុជា ដែលមានស្ថាប័នជំនាញពាក់ព័ន្ធជាច្រើនទៀត បានកំពុងខិតខំយ៉ាងយកចិត្តទុកដាក់ និងប្រឹងប្រែងយ៉ាងខ្លាំងក្នុងការកាត់បន្ថយនូវការបំពុលបរិស្ថាន និងទប់ស្កាត់ផលប៉ះពាល់ ពីសំណល់វេជ្ជសាស្ត្រលើសុខភាពសាធារណៈ តាមរយៈយន្តការនៃការរៀបចំលិខិតបទដ្ឋានគតិយុត្តិពាក់ព័ន្ធជាច្រើន និងការពង្រឹងការអនុវត្តន៍ច្បាប់ ព្រមទាំងការរៀបចំកម្មវិធីផ្សព្វផ្សាយអប់រំដល់សាធារណជនតាមប្រព័ន្ធសង្គមនានា។ បន្ទាប់ពី ទទួលបានជោគជ័យ ពីការអនុវត្តន៍នូវសកម្មភាពគម្រោងក្នុងដំណាក់កាលដំបូង និងទទួលបាននូវផ្លែផ្កាល្អ ក្រុមហ៊ុន រួមនិងក្រសួង ស្ថាប័នពាក់ព័ន្ធ បាននិងកំពុងសហការពង្រីកវិសាលភាព ព្រមទាំងរៀបចំសាងសង់បន្ថែមនូវហេដ្ឋារចនាសម្ព័ន្ធទីតាំងឡដុតសំណល់វេជ្ជសាស្ត្រនេះបន្ថែមទៀត ឱ្យបានគ្រប់ខេត្តទាំង២៤ និងរាជធានីក្នុងព្រះរាជាណាចក្រកម្ពុជា។
អត្ថបទ និង រូបភាព៖ លោក អ៊ុន ណារាជ្យ និងលោក ស៊ាន សុផាត
កែសម្រួល៖ លោក សេង ផល្លី
