ក្រោយការផ្អាកដំណើរការហោះហើរត្រង់ពីសាធារណរដ្ឋកូរ៉េមក មកកាន់ខេត្តសៀមរាប ដោយសារវិបត្តិជំងឹកូវីដ-១៩ នៅព្រឹកថ្ងៃទី៣ ខែសីហា ឆ្នាំ២០២២នេះ ឯកឧត្តម Park Sungjin អគ្គកុងស៊ុលនៃសាធារណរដ្ឋកូរ៉េ ប្រចាំខេត្តសៀមរាប បានបញ្ជាក់ថា ការហោះហើរត្រង់នេះ នឹងបើកដំណើរឡើងវិញនាពេលឆាប់ នេះបើតាមការប្រសាសន៍ ក្នុងជំនួបសម្ដែងការគួរសម និងជម្រាបលាឯកឧត្តម ទៀ សីហា អភិបាលខេត្តសៀមរាប មុនពេលបញ្ចប់អាណត្តិ នៅសាលាខេត្តសៀមរាប។
ក្នុងឱកាសនោះ ឯកឧត្តម Park Sungjin បានសម្ដែងការកោតសរសើរចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ក៏ដូចពីការយកចិត្តទុកដាក់ខ្ពស់របស់អាជ្ញាធរខេត្តសៀមរាប លើកិច្ចអភិវឌ្ឍន៍ហេដ្ឋារចនាសម្ព័ន្ធ ជាពិសេសការគ្រប់គ្រងបានយ៉ាងល្អប្រសើរនូវជំងឺកូវីដ-១៩។ ជាមួយនោះ ឯកឧត្តម បានថ្លែងអំណរគុណដល់រាជរដ្ឋាភិបាលកម្ពុជា ដែលបានចាក់វ៉ាក់សាំងប្រឆាំងជំងឺកូវិដ-១៩ ជូនប្រជាជនកូរ៉េ ក៏ដូចជាជនបរទេសដទៃទៀតនៅកម្ពុជាដោយឥតគិតថ្លៃ ដោយមិនបានប្រកាន់ពូជសាសន៍ និងពណ៌សំបុរ។ បន្ថែមពីនេះ អាជ្ញាធរខេត្តសៀមរាប ក៏បានយកចិត្តទុកដាក់លើសន្តិសុខ សុវត្ថិភាពជូនដល់ប្រជាជនកូរ៉េ ដែលកំពុងរស់នៅប្រកបអាជីកម្ម និងការងារនៅខេត្តសៀមរាបប្រមាណ ២ពាន់នាក់ផងដែរ។
ឯកឧត្តមអគ្គកុងស៊ុល ក៏បានបញ្ជាក់ផងដែរថា ទោះបីវិបត្តិជំងឺកូវិដ-១៩ បានធ្វើឱ្យទំនាក់ទំនងសហប្រតិបត្តការរវាងខេត្ត ក្រុងសម្ព័ន្ធមេត្រី នៃសាធារណរដ្ឋកូរ៉េ ជាមួយខេត្តសៀមរាប មានការរាំងស្ទះក្ដី ឯកឧត្តមនឹងជំរុញទំនាក់ទំនងសហប្រតិបត្តិការនេះឡើងវិញ និងឱ្យកាន់តែប្រសើរឡើងបន្ថែមទៀត។
ព័ត៌មានជាតិ ថ្មីៗ
ក្នុងជំនួបប្រកបដោយភាពស្និតស្នាលនោះ ឯកឧត្តម ទៀ សីហា លើកឡើងថា ក្នុងរយៈពេល៣ឆ្នាំ នៃការបំពេញបេសកកម្មឯកឧត្តម Park Sungjin ជាមួយរដ្ឋបាលខេត្តសៀមរាប បានទទួលលទ្ធផលជាផ្លែផ្កាគួឲ្យកត់សម្គាល់ រួមមាន ការចូលរួមលើកកម្ពស់វិស័យអប់រំ សុខាភិបាល កសិកម្ម ក្នុងខេត្ត ជាពិសេសការបង្កើតភូមិមិត្តភាពស៊ូវ៉ុន ភ្នំក្រោម ដើម្បីចូលរួមលើកកម្ពស់ជីវភាពប្រជាពលរដ្ឋ និងចំណេះដឹងសិស្សានុស្សចាប់ពីថ្នាក់បឋម ដល់ថ្នាក់វិទ្យាល័យ។
សម្រាប់ខែតុលាខាងមុខនេះ ឯកឧត្តមអភិបាលខេត្ត បញ្ជាក់ថា ប្រតិភូរដ្ឋបាលខេត្ត ដឹកនាំដោយឯកឧត្តមផ្ទាល់ នឹងធ្វើដំណើរទៅកាន់ខេត្ត ក្រុងសម្ព័ន្ធមេត្រី នៃសាធារណរដ្ឋកូរ៉េ ដើម្បីចុះហត្ថលេខាលើអនុស្សរណៈយោគយល់គ្នា និងរឹតចំណងមិត្តភាពនៃប្រទេស និងប្រជាជនទាំងពីរឱ្យកាន់តែរឹងមាំថែមទៀត។
ឯកឧត្តមអភិបាលខេត្ត ក៏បានថ្លែងអំណរគុណដល់រដ្ឋាភិបាលកូរ៉េ ដែលបានចូលរួមលើកកម្ពស់វិស័យទេសចរណ៍ ចូលមកកម្ពុជានៅថ្ងៃខាងមុខ ដែលនឹងធ្វើឱ្យវិស័យទេសចរណ៍នៅខេត្តសៀមរាប កាន់មានការរីកចម្រើនឡើងវិញ ក្រោយពីបញ្ចប់វិបត្តិជំងឺកូវិដ១៩៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
