នៅថ្ងៃទី៣០ ខែសីហានេះ លោក ខឹម វាសនា ប្រធានគណបក្សសម្ព័ន្ធ ដើម្បីប្រជាធិបតេយ្យ ដែលប្រមូលផ្ដុំហ្វូងមនុស្សឱ្យជួបជុំនៅក្នុងដីចំការម្រេច នាភូមិថ្មជល់ និងភូមិសសី ឃុំត្បែង ស្រុកបន្ទាយស្រីនោះ នៅមិនទាន់មានគំរោងរំសាយនៅឡើយទេ ខណ:ដែលសមត្ថកិច្ចបានឱ្យដឹងថា មានអ្នកចាកចេញប្រមាណតែ ៥០០ទៅ៦០០នាក់ប៉ុណ្ណោះ ។
នៅក្នុងបរិវេណដីចំការទំហំប្រមាណ ១២ហិកតា ដែលពោរពេញទៅដោយក្រុមមនុស្សចម្រុះ មកពីច្រើនខេត្ត និងរាជធានី កំពុងជួបប្រជុំគ្នាឯជើងភ្នំគូលែននោះ គឺមានក្រុមអ្នកតាមការពារទីតាំងយ៉ាងតឹងតែង ដែលចាត់តាំងដោយគណបក្សសម្ព័ន្ធ ដើម្បីប្រជាធិបតេយ្យ ហើយបានដាក់់បំរាមត្រួតពិនិត្យអ្នកចេញចូលយ៉ាងតឹងតែងគឺមិនអនុញ្ញាត ឱ្យអ្នកផ្សេងក្រៅពីសមាជិកគណបក្សរបស់ពួកគេ អាចចូលទៅក្នុងកន្លែងជួបជុំសំខាន់នោះបានឡើយ សូម្បីតែក្រុមអ្នកសរព័ត៌មាន និងអាជ្ញាធរមូលដ្ឋាន ក៏ពួកគេហាមឃាត់មិនឱ្យចូលទៅបានដែរ។
អភិបាលស្រុកបន្ទាយស្រី លោក ឃឹម ហ្វីណង់ មានប្រសាសន៍ថា រហូតមកដល់រសៀលថ្ងៃទី៣០ ខែសីហានេះ លោកនៅមិនទាន់ឃើញក្រុមប្រជាពលរដ្ឋ ដែលមកជួបជុំគ្នានោះ បានរុះរើដើម្បីរំសាយ ឬក៏មានបំណងចាកចេញពីកន្លែងជួបប្រជុំនៅឡើយទេ។ អាជ្ញាធរស្រុកបន្ទាយស្រី បានដាក់បញ្ជាយ៉ាងតឹងតែងនៅរសៀលថ្ងៃនេះ ដោយមិនអនុញ្ញាតឱ្យក្រុមអ្នកលក់ដូរ ចំណីអាហារ ឬក៏របស់របរប្រើប្រាស់អាហារហូប ទាំងឡាយអាចចូលទៅលក់ ដែលជាហេតុអាចនាំឱ្យទ្រង់ទ្រាយនៃការជួបប្រជុំនោះ កាន់តែរីកធំនោះទេ។
ចាប់តាំងតែពីទៀបភ្លឺថ្ងៃទី៣០ ខែសីហា សមមត្ថកិច្ចចម្រុះ ដែលមានកម្លាំងនគរបាល កងរាជអាវុធហត្ថ និងទាហានផង បានរាយបណ្ដាក់នៅលើដងផ្លូវសំខាន់ៗចំនួន៥កន្លែង។ ការដាក់ពង្រាយកម្លាំងសមត្ថកិច្ចនោះ គឺគោលបំណងរារាំងអ្នកចំណូលថ្មីទាំងអស់ មិនឱ្យចូលទៅកាន់តំបន់ជួបប្រជុំបានទៀតទេ ប៉ុន្តែសម្រប់អ្នកដែលចង់ចាកចេញ គឺសមត្ថកិច្ចអនុញ្ញាត។
សូមបញ្ជាក់ថា ចាប់ពីថ្ងៃទី២៣ ខែសីហា លោក ខឹម វាសនា មេបក្សសម្ព័ន្ធដើម្បីប្រជាធិបតេយ្យ បានសរសេរនៅលើបណ្ដាញសង្គម ហ្វេសប៊ុករបស់ខ្លួនថា តាមការធ្វើវិបស្សនារបស់លោកឃើញថា ភពផែនដីនឹងត្រូវជន់លិចនៅពេលខាងមុខ ហើយលោកអំពាវនាវឲ្យអ្នកដែលគាំទ្រទៅជួបជុំគ្នានៅលើដីចំការរបស់លោក ឯជើងភ្នំគូលែននៃខេត្តសៀមរាប ទើបអាចរួចផុតពីគ្រោះមហន្តរាយនេះ។ បន្ទាប់ពីការសរសេរលើបណ្ដាញសង្គមរបស់មេបក្សរូបនោះមក ក៏មានពលរដ្ឋជិត ២ម៉ឺននាក់ បាននាំក្រុមគ្រួសារ ធ្វើដំណើរខ្លះ តាមរថយន្ត ខ្លះតាមម៉ូតូ ទៅកាន់តំបន់ជើងភ្នំគូលែន។ ចំណែកពលករខ្មែរខ្លះ ដែលកំពុងធ្វើការនៅក្រៅប្រទេសក៏ប្រញាប់ប្រញាល់វិលត្រឡប់មកកម្ពុជា ដោយបោះបង់ការងាររបស់ខ្លួនដែរ។
កាលពីថ្ងៃទី២៩ ខែសីហា អភិបាលខេត្តសៀមរាប ឯកឧត្តម ទៀ សីហា បានសរសេរលិខិតមួយផ្ញើជូន លោក ខឹម វាសនាប្រធានគណបក្សសម្ព័ន្ធដើម្បីប្រជាធិបតេយ្យ ដោយក្នុងលិខិតនោះបញ្ជាក់ថាការជួបជុំនេះពុំបានសុំកិច្ចសហការ និងមានការអនុញ្ញាតពីអាជ្ញាធរមានសមត្ថកិច្ចឡើយ និងបានធ្វើឱ្យប៉ះពាល់ដល់សន្តិសុខសណ្តាប់ធ្នាប់សាធារណ: បរិស្ថាន អនាម័យ និងវិធានការបង្ការ ទប់ស្កាត់ជំងឺកូវីដ-១៩។ ដូច្នេះ ដើម្បីកុំឱ្យការប្រមូលផ្តុំ ការជួបជុំ និងការបោះតង់ស្នាក់នៅខាងលើធ្វើឱ្យប៉ះពាល់ដល់អនាម័យ បរិស្ថាន ការរីករាលដាល នៃការឆ្លងជំងឺកូវីដ-១៩ និងសុខុមាលភាពរបស់ក្មេង ចាស់ជរា បងប្អូនប្រជាពលរដ្ឋ រដ្ឋបាលខេត្តសៀមរាប សុំឱ្យបញ្ឈប់ការប្រមូលផ្តុំ និងរំសាយការជួបជុំ ចាប់ពីថ្ងៃទី៣០ ខែសីហា ឆ្នាំ២០២២ វេលាម៉ោង ២៤៖០០នាទីយប់ និងរាល់សំណង់ដែលបានសាងសង់ត្រូវដាក់ពាក្យស្នើសុំអនុញ្ញាតពីអាជ្ញាធរ។ បើទោះបីជាមានលិខិតព្រមានពីអាជ្ញាធរខេត្តសៀមរាប ក៏ដោយក៏រហូតមកដល់ពេលនេះ គេមិនទាន់ឃើញមានការឆ្លើយតបពីលោកខឹម វាសនាប្រធានគណបក្ស យ៉ាងណានៅឡើយទេ។ តាមព័ត៌មានចុងក្រោយ ឱ្យដឹងថាគណបក្សសម្ព័ន្ធប្រជាធិបតេយ្យមិនមានគំរោងរំសាយការជួបប្រជុំនេះនៅឡើយទេ ដោយគេបានដាក់ពាក្យស្នើសុំទៅអាជ្ញាធរឃុំត្បែង របស់ស្រុកបន្ទាយស្រី ដើម្បីសុំបន្តការជួបប្រជុំគ្នារហូតដល់បំណាច់ខែកញ្ញាខាងមុខ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
