បើតាមការចេញផ្សាយដោយសារព័ត៌មាន CGTN អាជ្ញាធរក្នុងប្រទេសចិន នៅថ្ងៃអង្គារនេះ បានឱ្យដឹងថាចំនួនអ្នកស្លាប់នៅក្នុងគ្រោះរញ្ជួយដីកម្រិត ៦.៨រ៉ិចទ័រ ដែលបានវាយប្រហារលើខេត្ត ស៊ីឈួន ភាគនិរតីនៃប្រទេស កាលពីថ្ងៃចន្ទដើមសប្ដាហ៍នេះបានកើនដល់ ៤៦នាក់ និង៥០នាក់រងរបួស ខណៈ ១៦នាក់ទៀតបន្តបាត់ខ្លួននៅឡើយ។
ស្ថានីយទូរទស្សន៍រដ្ឋចិន បានរាយការណ៍ថា ផ្លូវថ្នល់ និងលំនៅឋានដែលស្ថិតនៅក្បែរចំណុចរំញ័រនៃគ្រោះរញ្ជួយដីខាងលើ បានទទួលរងការខូចខាត ដោយសារបំណាក់ដី ស្របពេលបណ្តាញទំនាក់ទំនងត្រូវបានកាត់ផ្តាច់ នៅតំបន់យ៉ាងហោច ១កន្លែង។ រីឯទំនប់ និងស្ថានីយវារីអគ្គិសនី ដែលនៅចម្ងាយ ៥០គីឡូម៉ែត្រជុំវិញចំណុចរំញ័រ គឺមិនមានការរាយការណ៍ថា រងការខូចខាតអ្វីទេ ប៉ុន្តែបណ្តាញផ្គត់ផ្គង់អគ្គិសនីរបស់ខេត្តផ្ទាល់ បានទទួលរងការខូចខាត ដែលធ្វើឱ្យប៉ះពាល់ដល់អ្នកប្រើប្រាស់ខ្ទង់ ៤០,០០០នាក់។
យោងតាមមជ្ឈមណ្ឌលតាមដានគ្រោះរញ្ជួយដីចិន ចំណុចរំញ័ររបស់វា ស្ថិតនៅក្រុងលូទីង គឺម្តុំតំបន់ភ្នំចម្ងាយប្រហែលជា ២២៦គីឡូម៉ែត្រ ពីភាគនិរតីទីក្រុងចេងទូ ដែលជារដ្ឋធានីនៃខេត្តស៊ីឈួន។ បើតាមស្ថានីយទូរទស្សន៍រដ្ឋចិន មានមនុស្សសរុប៣៩,០០០នាក់ ដែលរស់នៅក្នុងបរិវេណ ២០គីឡូម៉ែត្រ ជុំវិញចំណុចរំញ័រ ហើយមាន ១.៥៥លាននាក់ ស្ថិតក្នុងបរិវេណ ១០០គីឡូម៉ែត្រជុំវិញទីនោះ។
គួរបញ្ជាក់ថា ក្រៅពីទីក្រុងចេងទូ គ្រោះរញ្ជួយដីខាងលើ ក៏បានជះឥទ្ធិពលដល់បណ្តាខេត្តក្បែរខាង រួមមានយូនណាន, សាអានស៊ី និងគួយចូវ ថែមទៀតផង។ សម្រាប់ហេតុការណ៍រញ្ជួយផែនដីដ៏ខ្លាំងបំផុតនៅខេត្តស៊ីឈួន គឺត្រូវបានកត់ត្រាកាលពីខែឧសភា ឆ្នាំ២០០៨ នៅពេលរញ្ជួយដីកម្រិត ៨.០រ៉ិចទ័រ បានវាយប្រហារស្រុកវិនឈួន ដែលបណ្តាលឱ្យមានមនុស្សស្លាប់ជិត ៧០,០០០នាក់ និងការបំផ្លិចបំផ្លាញយ៉ាងហិនហោច៕
