ក្រោយដល់ឱសានវាទរំសាយការជួបជុំមនុស្សក្នុងចម្ការលោក ខឹម វាសនា ប្រធានគណបក្សសម្ព័ន្ឋ ដើម្បីប្រជាធិបតេយ្យ មានករណីដាក់ពាក្យស្នើសុំស្វែងរកសាច់ញាតិចំនួន២០៧នាក់ ឬស្មើនឹង ១០១ករណី ដែលក្នុងនោះមានអនីតិជនរហូតដល់ ៨២នាក់។
ទោះបីការកាលបរិច្ឆេទ ត្រូវបានបញ្ចប់ក្ដី តែគិតត្រឹមព្រឹកថ្ងៃទី៦ ខែកញ្ញា ឆ្នាំ២០២២នេះ មនុស្សដែលបានបន្តចាកចេញពីក្នុងចម្ការរបស់លោក ខឹម វាសនា នៅតែបន្តមានជាច្រើនរយនាក់។ ទន្ទឹមនោះ អាជ្ញាធរខេត្ត រួមនិងសមត្ថកិច្ច បាននិងកំពុងធ្វើបច្ចុប្បន្នភាពចំនួនមនុស្ស ដែលកំពុងបន្តស្នាក់នៅក្នុងចម្ការរបស់ប្រមុខដឹកនាំគណបក្សសម្ព័ន្ឋ ដើម្បីប្រជាធិបតេយ្យរូបនេះ និងកំណត់អត្តសញ្ញាណឱ្យបានច្បាស់លាស់ ដើម្បីជួយឱ្យសាច់ញាតិចូលទៅស្វែងរកនាំយកត្រឡប់ទៅលំនៅឋានវិញ។
បើតាមការបញ្ជាក់របស់ ឯកឧត្តម ទៀ សីហា អភិបាលខេត្តសៀមរាប កាលពីម្សិលមិញនេះ បានសង្កត់ធ្ងន់ថា បន្ទាប់ពីម្ចាស់ដីបញ្ជាក់ចំនួនមនុស្សដែលត្រូវស្នាក់នៅក្នុងចម្ការនេះច្បាស់លាស់រួចរាល់ហើយ អ្នកដែលនៅសល់ត្រូវតែចាកចេញទាំងអស់។
ជាមួយនោះ លោកឧត្តមសេនីយ៍ត្រី តេង ច័ន្ទណាត ស្នងការនគរបាលខេត្តសៀមរាប ក៏បានបញ្ជាក់ផងដែរថា ៖ គិតត្រឹមថ្ងៃទី០៥ ខែកញ្ញា ឆ្នាំ២០២២ ចំនួនមនុស្សជួបជុំបានបន្តចាកចេញ និងវិលទៅលំនៅឋានវិញប្រមាណ ៧៥ភាគរយហើយ។ ក្នុងនោះដែររដ្ឋបាលខេត្តសៀមរាបនៅតែបន្តកាយវិការទន់ភ្លន់ និងព្យាយាមប្រឹងប្រែងសម្របសម្រួលដល់ប្រជាពលរដ្ឋឱ្យវិញត្រឡប់ទៅលំនៅឋានវិញ។
គួររំលឹកថា តាមរយៈការឃោសនាថាមានគ្រោះទឹកជំនន់លិចពិភពលោក របស់លោក ខឹម វាសនា ប្រមុខដឹកនាំគណបក្សសម្ព័ន្ឋ ដើម្បីប្រជាធិបតេយ្យ បានប្រមូលផ្តុំមនុស្សរហូតដល់ ១៥,០០០នាក់ ក្នុងនោះចំការម្រេចចំនួន ១២ហិតា ចំការសណ្តែកចំនួន ២៥ហិតា ទីវត្តអារាម និងបណ្តាផ្ទះអ្នកភូមិ ស្ថិតក្នុងឃុំចំនួន ០៣ នៃស្រុកបន្ទាយស្រី ខេត្តសៀមរាប។
អត្ថបទ៖ លោក ម៉ី សុខារិទ្ធ និងលោក បូ សាវី
កែសម្រួល៖ លោក សេង ផល្លី
