នាព្រឹកថ្ងៃទី៦ ខែកញ្ញា ឆ្នាំ២០២២នេះ លោកជំទាវ ចាន់ សុម៉ាលី អនុរដ្ឋលេខាធិការក្រសួងបរិស្ថាន និង ឯកឧត្តម ហង្ស សុភសម្ភា អនុរដ្ឋលេខាធិការ ក្រសួង រៀបចំដែនដីនគរូបនីយកម្ម និងសំណង់ រួមនិងថ្នាក់ដឹកនាំមន្ទីរពាក់ព័ន្ធ និង អាជ្ញាធរជាតិអប្សរា បានធ្វើបទបង្ហាញស្តីពីការអភិវឌ្ឍន៍តំបន់ភូមិធម្មជាតិរុនតាឯក ដែលមានការយកចិត្តទុកដាក់ពីរាជរដ្ឋាភិបាល ជូនដល់ប្រជាពលរដ្ឋ១០១គ្រួសារដែលស្ម័ត្រចិត្តផ្លាស់ទីលំនៅពីក្នុងតំបន់រមណីយដ្ឋានអង្គរ និង បានចាប់ឆ្នោតយកដីលំនៅឋាន នៅក្នុងភូមិធម្មជាតិរុនតាឯក ស្ថិតនៅក្នុងឃុំរុនតាឯក ស្រុកបន្ទាយស្រី ខេត្តសៀមរាប។
ឯកឧត្តម ហង្ស សុភសម្ភា បង្ហាញថា ការរៀបចំតំបន់រុនតាឯក មានទំហំប្រមាណ ១ពាន់៨០ហិកតា ដែលតំបន់នេះ នឹងក្លាយជាភូមិគំរូមួយ ជាមួយនោះរាជរដ្ឋាភិបាលក៏រៀបចំឱ្យមានហេដ្ឋារចនាសម្ព័ន្ធគ្រប់គ្រាន់ និងច្បាស់លាស់ ជាមួយសិទ្ធិកាន់កាប់ដីធ្លីស្របច្បាប់ ដែលខុសពីការរស់នៅក្នុងតំបន់រមណីយដ្ឋានអង្គរ ដែលមានការកំណត់ច្បាប់ ហ្មត់ចត់ក្នុងការសាងសង់ផ្សេងៗ។
ទន្ទឹមនោះ លោកជំទាវ ចាន់ សុម៉ាលី ក៏បានលើកឡើងដែរថា ប្រជាពលរដ្ឋចំនួន១០១គ្រួសារនាពេលនេះ ទទួលបានអាទិភាពមុនគេ ក្រោមគម្រោងជួយគាំទ្រពីរាជរដ្ឋាភិបាល ក្នុងនោះក្រសួងបរិស្ថាន ក៏នឹងជួយឧបត្ថម្ភគាំទ្រដល់ប្រជាពលរដ្ឋ ទៅលើបច្ចេកទេសដាំដុះរុក្ខជាតិហូបផ្លែផងដែរ។ នៅថ្ងៃខាងមុខតំបន់រុនតាឯកនេះ នឹងក្លាយទៅជាភូមិធម្មជាតិ ប្រកបទៅដោយបរិស្ថាន អនាម័យល្អស្អាត និង មានការទាក់ទាញភ្ញៀវទេសចរ ចូលទៅទស្សនាកម្សាន្ត ដែលធ្វើឲ្យជីវភាពរបស់ បងប្អូនមានភាពប្រសើរឡើង ដោយទទួលបានកម្រៃពីភោគផលបងប្អូនផលិតក្នុងភូមិរបស់ខ្លួន។
គួរជម្រាបថា ការផ្ដល់ដីលំនៅឋានថ្មីស្ថិតនៅតំបន់ភូមិធម្មជាតិរុនតាឯក ដោយរាជរដ្ឋាភិបាល ធ្វើឡើងក្រោយពីមានការចុះធ្វើយុទ្ធនាការចុះវាស់វែង កំណត់និយាមក្បាលដី និងអត្តសញ្ញាណអ្នកកាន់កាប់ក្បាលដី និងសំណង់ខុសច្បាប់ទាំងឡាយ នៅក្នុងតំបន់រមណីយដ្ឋានអង្គរ និងតំបន់ដទៃទៀតនោះ កាលពីថ្ងៃទី១៧ ខែកក្កដា ឆ្នាំ២០២២ បន្ទាប់ពីរកឃើញនូវសកម្មភាពសាងសង់សំណង់ខុសច្បាប់នៅក្នុងតំបន់ការពារ មានការកើនឡើងគួរកត់សម្គាល់ គឺចាប់ពីឆ្នាំ២០០១ និងទទួលបានលិខិតព្រមាន និងស្នើសុំប្រទេសកម្ពុជា ធ្វើការបកស្រាយចំនួន២ដង ចាប់ពីឆ្នាំ២០១៧ ពីមជ្ឈមណ្ឌលបេតិកភណ្ឌពិភពលោក នៃអង្គការសហប្រជាជាតិ។
អត្ថបទ៖ លោក ម៉ី សុខារិទ្ធ
កែសម្រួល៖ លោក សេង ផល្លី
