នៅព្រឹកថ្ងៃទី ០៨ ខែ កញ្ញា ឆ្នាំ២០២២នេះ នៅសាលាខេត្តសៀមរាប មានរៀបចំកិច្ចប្រជុំសាមញ្ញលើកទី៤០ នៃអាណត្តិទី៣ របស់ក្រុមប្រឹក្សាខេត្តសៀមរាប តាមរយៈប្រព័ន្ធអនឡាញ ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប និងឯកឧត្តម ទៀ សីហា អភិបាលខេត្តសៀមរាប។
កិច្ចប្រជុំនេះមានរបៀបវារៈចំនួន៣៖ទី១ ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៣៩ របស់ក្រុមប្រឹក្សាខេត្ត អាណត្តិទី៣ កាលពីខែសីហា ឆ្នាំ២០២២ ទី២- ពិនិត្យ ពិភាក្សា និងអនុម័តលើសេចក្ដីព្រាងរបាយការណ៍ប្រចាំខែសីហា ឆ្នាំ២០២២ ស្តីពីការអនុវត្តការងាររបស់រដ្ឋបាលខេត្ត និងទី៣បញ្ហាផ្សេងៗ។
ក្នុងកិច្ចប្រជុំនេះដែរ អង្គប្រជុំក៏បានផ្ដោតទៅលើបញ្ហា ការផ្លាស់ប្ដូរអត្តសញ្ញាណបណ្ណហូសការកំណត់ ការធ្វើអត្តសញ្ញាណបណ្ណជូនប្រជាពលរដ្ឋទើបគ្រប់អាយុ និងស្នើសុំដល់មន្ទីរអប់រំ យុវជន និងកីឡាខេត្ត ជំរុញដល់សាលារៀនក្នុងខេត្ត ផ្សព្វផ្សាយដល់សិស្សានុសិស្សដែលគ្រប់អាយុ ឱ្យទៅធ្វើអត្តសញ្ញាណបណ្ណ ដើម្បីអាចឱ្យពួកគាត់មានសិទ្ធចុះឈ្មោះ និងចូលរួមការបោះឆ្នោតនៅឆ្នាំ២០២៣ខាងមុខ។ បន្ថែមពីនោះ អង្គប្រជុំបាន លើកស្នើដល់អាជ្ញាធរខេត្តជំរុញការអប់រំផ្សព្វផ្សាយដល់សិស្សពីច្បាប់ចរាចរណ៍ ការថែទាំសួនច្បារតាមដងផ្លូវ នៃគម្រោងផ្លូវ៣៨ខ្សែក្នុងក្រុង និង ស្នើដល់មន្ទីរជំនាញ និងពាក់ព័ន្ធធ្វើការពិនិត្យឡើងវិញលើផ្លូវ ថ្មើរជើងក្នុងក្រុង ដែលត្រូវគេបានរំលោភយកដាក់ជាកន្លែងលក់ដូរ ។
មានប្រសាសន៍ក្នុងឱកាសនោះ ឯកឧត្តម ទៀ សីហា បានឯកភាពទៅលើចំណុចដែលសមាជិក សមាជិកាបានលើក ឡើង ទន្ទឹមនោះអាជ្ញាធរខេត្ត នឹងជំរុញដល់មន្ទីរជំនាញពាក់ព័ន្ធ និងសាលាក្រុង ត្រូវធ្វើការត្រួតពិនិត្យនូវរាល់បញ្ហាពាក់ព័ន្ធទៅនឹងផ្លូវ ៣៨ខ្សែ ភ្លើងបំភ្លឺដងផ្លូវ ដែលជាសោភណ្ឌក្នុងក្រុង និងដើមី្បត្រៀមទទួលស្វាគមន៍ រដ្ឋមន្ត្រីសេដ្ឋកិច្ចអាស៊ាន ដែលនឹងមកដល់ខេត្តសៀមរាប នាថ្ងៃខាងមុខឆាប់ៗនេះ។
ក្នុងនោះដែរ ឯកឧត្តម អភិបាលខេត្ត ក៏បានណែនាំដល់រដ្ឋបាលក្រុង ស្រុក រួមនិងមន្ទីរអប់រំយុវជន និងកីឡាខេត្ត ផ្សព្វផ្សាយដល់សិស្សានុសិស្សដែលគ្រប់អាយុនៅតាមសាលារៀន ទៅធ្វើអត្តសញ្ញាណបណ្ណ និងជំរុញដល់លោកស្នងការនគរបាលខេត្ត ត្រូវពន្លឿនការប្តូរអត្តសញ្ញាណបណ្ណហូសសុពលភាពជូនប្រជាពលរដ្ឋ ដើមី្បបានយកមកប្រើប្រាស់ សំខាន់ក្នុងពេលបោះឆ្នោតជ្រើសតាំងតំណាងរាស្ត្រនៅឆ្នាំ២០២៣ខាងមុខ។
បន្ថែមក្នុងកិច្ចពិភាក្សានេះ ឯកឧត្តម អភិបាលខេត្ត បានបញ្ជាក់ជូនអង្គប្រជុំផងដែរថា សកម្មភាពវាស់វែងដីនៅក្នុងតំបន់រមណីយដ្ឋានអង្គរ ក្រោមការដឹកនាំរបស់ឯកឧត្តមឧបនាយក រដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានក្រុមការងា គ្រួសារភាគច្រើន បានធ្វើការស្ម័ត្រចិត្តរុះរើ ទៅកាន់ទីតាំងថ្មី នៅតំបន់អភិវឌ្ឍន៍ភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី។ មួយវិញទៀត ព្រឹត្តិការណ៍ នៃការប្រមូលផ្តុំមនុស្សរបស់លោក ខឹម វាសនា បានធ្វើការរំសាយជាបណ្តើរៗ មិនទាន់អស់ទាំងស្រុងនៅឡើយទេ មកដល់ត្រឹមថ្ងៃទី៦ ខែកញ្ញា។
ឆ្លៀតក្នុងឱកាសនោះ ឯកឧត្តម អភិបាលខេត្ត ក៏បានណែនាំដល់អាជ្ញាធរមូលដ្ឋានក្រុង ស្រុក បន្តផ្សព្វផ្សាយដល់ ប្រជាពលរដ្ឋក្នុងមូលដ្ឋានខ្លួន ទៅចាក់វ៉ាក់សាំងទាំងដូសទី៤ និង ទី៥ ឱ្យបានគ្រប់ៗគ្នា ព្រមទាំងផ្សព្វផ្សាយដល់សិស្សានុសិស្សនៅគ្រប់សាលា យល់ដឹងពីគ្រោះថ្នាក់ចរាចរណ៍ និងបញ្ហានាំឱ្យកើតមានគ្រោះថ្នាក់ចរាចរណ៍។
ថ្លែងក្នុងកិច្ចប្រជុំ ឯកឧត្តម អ៊ាន ឃុន បញ្ជាក់ថា៖ ចំពោះការត្រៀមលក្ខណៈក្នុងការពិនិត្យបញ្ជីឈ្មោះនិងចុះឈ្មោះបោះឆ្នោតឆ្នាំ២០២២ គឺមានរយៈពេល៥០ថ្ងៃ ពីថ្ងៃទី២០ ខែតុលាដល់ថ្ងៃទី៨ ខែធ្នូ ឆ្នាំ២០២២ ហេតុនេះ សូមរដ្ឋបាលក្រុង ស្រុក ឃុំ សង្កាត់ ត្រូវយកចិត្តទុកដាក់ ធ្វើការផ្សព្វផ្សាយឱ្យបានទូលំទូលាយ និងទាន់ពេលវេលា។ ទន្ទឹមនោះ ឯកឧត្តម ក៏បានថ្លែងអំណរគុណចំពោះឯកឧត្តមអភិបាលខេត្ត និង ជាប្រធានគណៈបញ្ជាការឯកភាពរដ្ឋបាលខេត្ត និងកងកម្លាំងទាំងបី ព្រមទាំងមន្ត្រីពាក់ព័ន្ធ ដែលបានដឹកនាំ និងដោះស្រាយបញ្ហាសំខាន់ៗ ក្នុងខេត្តប្រកបដោយប្រសិទ្ធភាព។
អត្ថបទ និងរូបភាព៖ លោក ម៉ី សុខារិទ្ធ លោក បូ សាវី និងលោក យូ វង្ស
កែសម្រួល៖ លោក សេង ផល្លី
