វិទ្យាស្ថានជាតិពហុបច្ចេកទេសអង្គរ ខេត្ដសៀមរាប បានធ្វើពិព័រណ៌ការងារឆ្នាំ២០២២ជាច្រើនជំនាញ ដើម្បីបង្ហាញការងារឱ្យយុវជន សិស្ស និស្សិត ចែករំលែកចំណេះដឹង បទពិសោធន៍ និងឱកាសការងារថ្មីៗក្នុងស្រុក ស្វែងរកសាលាផ្សេងៗដែលបង្រៀនជំនាញបច្ចេកទេសវិជ្ជាជិវៈ ផ្ដល់នូវជំនាញការងារ មុខរបរ និងជំនាញនាពេលអនាគត។
លោក រ៉ាត រតនៈ នាយករងវិទ្យាស្ថានជាតិបហុបច្ចេកទេសអង្គរ មានប្រសាសន៍ថា វិទ្យាស្ថានជាតិមួយនេះ កំពុងដំណើរការសកម្មភាពបណ្ដុះបណ្ដាលបច្ចេកទេសលើវិស័យសំណង់ស៊ីវិល វិស័យអគ្គិសនី និងអេឡិចត្រូនិកៈ វិស័យមេកានិចរថយន្ត និងវិស័យព័ត៌មានវិទ្យា និងវិទ្យាសាស្ត្រ ពីកម្រិត១(វគ្គខ្លីវិញ្ញាបនបត្រ៤ទៅ៧ខែ) កម្រិត២,៣ និង៤ (ថ្នាក់សញ្ញាបត្របច្ចេកទសេស និងវិជ្ជាជីវៈ ដែលមួយកម្រិតមានរយៈពេល១ឆ្នាំ) កម្រិត៥(ថ្នាក់បរិញ្ញាបត្ររងបច្ចេកទេសរយៈពេល២ឆ្នាំ)និងកម្រិត៦(ថ្នាក់បរិញ្ញាបត្របច្ចេកវិទ្យា ឬវិស្វករ) ។លោកបានបន្ដថា ក្នុងឆ្នាំសិក្សា២០២១-២០២២នេះវិទ្យាស្ថានមានសិក្ខាកាម សិស្ស និស្សិតកំពុងសិក្សាចំនួន១០៧៤នាក់។
ក្នុងនោះ ថ្នាក់បរិញ្ញាបត្របច្ចេកវិទ្យាវិស្វករ មានចំនួន ១៣៩នាក់ ថ្នាក់សញ្ញាបត្រជាន់ខ្ពស់បច្ចេកទេស/បរិញ្ញាបត្ររង មានចំនួន ៦៥៧នាក់ ថ្នាក់សញ្ញាបត្របច្ចេកទេស និងវិជ្ជាជីវៈទី១ និង២ និង៣ មានចំនួន១០៧នាក់ ថ្នាក់វិញ្ញបនបត្រវិជ្ជាជីវៈ(វគ្គខ្លី) មានចំនួន ១៧១នាក់។លោកបន្ដថា វិទ្យាស្ថានបានសហការជាមួយក្រុមហ៊ុន សហគ្រាស និងវិស័យឯកជនក្នុងភាពជាដៃគូ ក្នុងការអភិវឌ្ឍកម្មវិធីសិក្សាស្របតាមតម្រូវការ និងផ្គត់ផ្គង់កម្លាំងពលកម្មជំនាញដល់ក្រុមហ៊ុន សហគ្រាស និងវិស័យឯកជនទាំងក្នុងខេត្ត និងទូទាំងប្រទេសទាំងប្រទេសផងដែរ។ រហូតមក ដល់ខែកញ្ញា ឆ្នាំ២០២២នេះវិទ្យាស្ថានមានដៃគូសរុបចំនួន ៩៧ក្រុមហ៊ុន សហគ្រាស និងវិស័យឯកជន។ជាមួយគ្នានោះ ក៍បានសហការជាមួយអង្គការអន្តរជាតិទេសន្តរប្រវេសន៍បណ្តុះបណ្តាលជំនាញរយៈពេល៣ខ ដល់ប្រជាពលរដ្ឋ និងយុវជនចំណាកស្រុកនិងកំពុងបន្តផ្សព្វផ្សាយជ្រើសរើសជាបន្តបន្ទាប់តាមផែនការ ២០០នាក់ផងដែរ។កំពុងដំណើរការសកម្មភាពបណ្ដុះបណ្ដាលរំលឹកឡើងវិញជំនាញជូនដល់និយោជិតបម្រើការងារ នៅតាមសណ្ឋាគារ បូទិក ភោជនីយដ្ឋានឱ្យគ្រប់ផែនការផែនការ៥០០នាក់។ បន្តអនុវត្តន៍សកម្មភាពបណ្តុះបណ្តាលជំនាញដល់សិក្ខាកាម សិស្ស និស្សិត ដែលកំពុងបណ្តុះ បណ្តាល និងបន្តជ្រើសរើសជាបន្តបន្ទាប់ដើម្បីសម្រេចឲ្យបានតាមផែនការដែលបានគ្រោងទុក។
ព័ត៌មានជាតិ ថ្មីៗ
លោក នាក់ ណេរ៉ុន អភិបាលរងខេត្ដសៀមរាប ពិធីពិព័រណ៍ការងារនេះ បានបង្ហាញឲ្យឃើញពីកិច្ចសហប្រតិបត្តិការក្នុងភាពជាដៃគូជិតស្និត និងមានភាពយូរអង្វែង ហើយគឺជាកិច្ចដំណើរការមួយដែលបាននឹងកំពុងឈានទៅសម្រេចបាននូវគោលនយោបាយបង្កើនភាពជា ដៃគូរវាងវិស័យឯកជន និងរដ្ឋ(PPP)។ហើយក៏ជាកាលានុវត្តភាពដ៏ប្រសើរថ្មីមួយទៀត ក្នុងការធ្វើឱ្យខេត្តសៀមរាបប្រែក្លាយជាខេត្តមួយ ដែលកំពុងតែទទួលបានការទាក់ទាញអ្នកវិនិយោគនានាឲ្យចូលមកធ្វើការវិនិយោគលើគ្រប់វិស័យក្រោយ នៅពេលបញ្ចប់ជំងឺកូវីដ-១៩។លោកមានជំនឿថា ធនធានមនុស្សសម្រាប់ផ្គត់ផ្គង់តម្រូវការក្នុងវិស័យការងារមានគ្រប់គ្រាន់ ហើយប្រកបដោយជំនាញ ចំណេះដឹង សមត្ថភាព ជំនាញ សីលធម៌វិជ្ជាជីវៈ និងផលិតភាពខ្ពស់ ព្រោះខេត្តមានគ្រឹះស្ថានឧត្តមសិក្សា គ្រឹះស្ថានអប់រំបណ្ដុះបណ្ដាលបច្ចេកទេស និង វិជ្ជាជីវៈសម្រាប់ផ្គត់ផ្គង់ធនធានដល់មនុស្សទូទៅ ដើម្បីរួមចំណែកក្នុងការបង្កើនប្រាក់ចំណូល ការបង្កើតការងារ និងការចូលរួមកាត់បន្ថយភាពក្រីក្រជូនដល់ប្រជាពលរដ្ឋ។
ការជួបជុំពិព័រណ៌ការងាររវាងអ្នកមានតម្រូវការកម្លាំងពលកម្ម(ក្រុមហ៊ុន សហគ្រាស . វិស័យឯកជន) និងអ្នកដែលកំពុងមានតម្រូវការការងារ(យុវជនទាំងមានជំនាញឬគ្មានជំនាញ) ដើម្បីផ្ដល់ និងទទួលបានឱកាសការងារមួយស្របច្បាប់៕
