នៅរសៀលថ្ងៃទី០៩ខែកញ្ញា ឆ្នាំ២០២២នេះ លោក អ៊ឹង គឹមលាង អភិបាលរងខេត្តសៀមរាបនិងជាអនុប្រធានគណៈកម្មការវាយតម្លៃអង្គភាពផ្តល់សេវាសាធារណៈគំរូថ្នាក់ខេត្ត បានដឹកនាំកិច្ចប្រជុំស្តីពីការវាយតម្លៃជ្រើសរើសនិងទទួលស្គាល់អង្គភាពសេវាសាធារណៈគំរូក្នុងវិស័យអប់រំនិងសុខាភិបាល ។ កិច្ចប្រជុំនេះប្រព្រឹត្តទៅនៅរដ្ឋបាលខេត្តសៀមរាប ដោយមានការអញ្ជើញចូលរួម ពីសំណាក់ ឯកឧត្តម សមាជិកក្រុមប្រឹក្សាខេត្ត និង លោកប្រធាន អនុប្រធាន នៃ មន្ទីរមុខងារសាធារណៈ .មន្ទីរអប់រំយុវជននិងកីឡានិង មន្ទីរសុខាភិបាល ដែលជាសមាជិក គណៈកម្មការវាយតម្លៃអង្គភាពផ្តល់សេវាសាធារណៈគំរូថ្នាក់ខេត្តសៀមរាប។
លោក អ៊ឹង គឹមលាង បានមានប្រសាសន៍ថា កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យ និងឆ្លុះបញ្ចាំងការអនុវត្តការងាររបស់អនុគណៈកម្មការ វាយតម្លៃអង្គភាពផ្តល់សេវា សាធារណៈគំរូ ក្នុងវិស័យអប់រំនិងវិស័យសុខាភិបាលព្រមទាំងពិភាក្សាដោះស្រាយនូវបញ្ហាប្រឈមកន្លងមកនិងដើម្បីពិភាក្សា ស្វែងរកធាតុចូល និងទិសដៅការងារសម្រាប់ការវាយតម្លៃ និងទទួលស្គាល់អង្គភាពផ្តល់ សេវាសាធារណៈ គំរូ ថ្នាក់ខេត្ត ។ លោកអភិបាលរងខេត្តក៍បានមានប្រសាសន៍បញ្ជាក់បន្ថែមទៀតថា ដើម្បីជំរុញការកែលម្អគុណភាព សេវាសាធារណៈ ផ្នែកអប់រំ និងសុខាភិបាល នៅថ្នាក់មូលដ្ឋានសំដៅ បម្រើប្រជាជនឱ្យកាន់តែប្រសើរឡើងរាជរដ្ឋាភិបាលកម្ពុជា អណត្តិទី៦នៃរដ្ឋសភា បានដាក់ចេញនូវអនុក្រឹត្យស្តីពីការវាយតម្លៃ និងទទួលអង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល។
ជាមួយគ្នានោះផងដែររដ្ឋបាលខេត្តសៀមរាបក៍បានបង្កើតគណៈកម្មការវាយតម្លៃអង្គភាពផ្តល់សេវាសាធារណៈគំរូថ្នាក់ខេត្ត(គ.វ.រ)គឺក្នុងគោលបំណងជំរុញនិងលើកកម្ពស់ប្រសិទ្ធភាពគុណភាពនៃដំណើរការរបស់អង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាលឱ្យកាន់តែប្រសើរឡើង តាមរយៈការកំណត់ឱ្យមានការវាយតម្លៃនិងការទទួលស្គាល់អង្គភាពសេវាសាធារណៈគំរូក្នុងដែនសមត្ថកិច្ចរបស់ខេត្ត។ នៅក្នុងកិច្ចប្រជុំនោះដែរក៍មានការធ្វើសេចក្តីរាយការណ៍សង្ខេបស្តីពីការរៀបចំវាយតម្លៃអង្គភាពផ្តល់សេវាសាធារណៈគំរូក្នុងវិស័យអប់រំ និងសុខាភិបាល ព្រមទាំងមានសេចក្តីរាយការណ៍ ស្តីពីការស្នើសុំវាយតម្លៃអង្គភាពផ្តល់សេវាសាធារណៈគំរូក្នុងវិស័យ សុខាភិបាល និងវិស័យអប់រំ ផងដែរ ។
ព័ត៌មានជាតិ ថ្មីៗ
ក្នុងឱកាសនោះលោក អ៊ឹង គឹម លាង ក៍បាន មានប្រសាសន៍ថានែនាំដល់សមាជិកអង្គប្រជុំទាំងអស់គឺ ត្រូវជំរុញឱ្យមានចលនាប្រលងប្រណាំង កែលម្អគុណភាពសេវា សាធារណៈជូនប្រជាពលរដ្ឋឱ្យកាន់តែប្រសើរឡើង.ផ្តល់គោលគំនិតសំខាន់ៗជូនអង្គភាព ផ្តល់សេវាសាធារណៈកែលម្អ ការផ្តល់សេវាសាធារណៈរបស់ខ្លួនឱ្យឈាន ដល់កម្រិតស្តង់ដារខ្ពស់មួយ ដោយប្រើប្រាស់តារាងលក្ខណៈវិនិច្ឆ័យនៃការវាយតម្លៃ ដែលគ្របដណ្តប់គ្រប់ទិដ្ឋភាពនៃ ការគ្រប់គ្រងសាលារៀន និងមន្ទីរពេទ្យប្រកបដោយគុណភាព.ផ្តល់ការលើកទឹកចិត្តដល់សាលារៀន និងមន្ទីរពេទ្យនៅថ្នាក់មូលដ្ឋានដែលបានខិតខំ បម្រើសេវាអប់រំនិងសុខាភិបាលប្រកបដោយគុណភាពជូនប្រជាជន.ជំរុញចលនារៀនសូត្រពីគ្នាទៅវិញទៅមក ដើម្បីដកស្រង់បទពិសោធន៍សម្រាប់កែលម្អការផ្តល់សេវាសាធារណៈកាន់តែល្អប្រសើរ និងទទួលបានទំនុកចិត្ត កាន់តែខ្លាំងពីប្រជាពលរដ្ឋផងដែរ៕
អត្ថបទ និង វីដេអូ ៖ លោក ទ្រា ពន្លឺ
