នៅព្រឹកថ្ងៃទី១១ ខែកញ្ញា ឆ្នាំ២០២២នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប ឯកឧត្តម ទៀ សីហា អភិបាលខេត្តសៀមរាប បានអញ្ជើញកាន់បិណ្ឌវេនទី១ នៃពិធីបុណ្យភ្ជុំបិណ្ឌ នៅវត្តចំនួន២ គឺពុទ្ឋស្ថាននគររាជមេត្តា ស្ថិតក្នុងភូមិកសិកម្ម សង្កាត់ស្រង៉ែ និងវត្តព្រះព្រហ្មរ័ត្ន សង្កាត់ស្វាយដង្គំ ក្រុងសៀមរាប ខេត្តសៀមរាប និងមានការអញ្ជើញចូលរួមពីសមាជិក សមាជិកាក្រុមប្រឹក្សាខេត្ត លោក លោកស្រី អភិបាលរងខេត្ត ប្រធានមន្ទីរ និងអង្គភាពនានាជុំវិញខេត្តផងដែរ។
គួរជម្រាបថា ពិធីកាន់បិណ្ឌ ឬដាក់បិណ្ឌ និងបុណ្យភ្ជុំបិណ្ឌ ដែលរៀបចំតាមបែបព្រះពុទ្ធសាសនានេះ ជាពិធីបុណ្យមួយ ក្នុងចំណោមពិធីបុណ្យធំៗដទៃទៀត នៃព្រះរាជពិធីទា្វរទសមាស ដែលប្រជាជនខ្មែរប្រារព្ធធ្វើតាំងពីបុរាណរៀងមក (ពុំដឹងពីពេលណាច្បាស់លាស់) ពុំដែលអាក់ខានឡើយ គឺចាប់ពីថៃ្ង ១រោច ខែភទ្របទ រហូតដល់ថៃ្ងទី ១៥រោច មានរយៈពេល ១៥ថៃ្ង ដែលយើងហៅថាបិណ្ឌ១, បិណ្ឌ២ … និងថៃ្ងបញ្ចប់ គឺជា ថៃ្ង “ភ្ជុំបិណ្ឌ”។ បុណ្យភ្ជុំបិណ្ឌ ត្រូវបានធ្វើឡើងតាមបែបព្រះពុទ្ធសាសនា។
ពិធីនេះដែរ គឺដើម្បីទំនុកបម្រុងបច្ច័យ៤ ចំពោះព្រះសង្ឃ ដែលគង់ចាំវស្សា ដោយមានគោលបំណងធំៗ ៣យ៉ាងគឺ៖ ទី១-ដើម្បីតបសងគុណ ឧទ្ទិសកុសលទៅឱ្យបុព្វការីជន ដែលបានចែកឋានទៅកាន់លោកខាងមុខហើយ។ ទី២-ដើម្បីយើងបានធ្វើបុណ្យកុសល សន្សំសេចក្តីសុខ សេចក្តីចម្រើន សម្រាប់ខ្លួនយើងម្នាក់ៗ ហើយយើងបានបុណ្យទៅដល់អ្នក មានគុណរបស់យើង និងទី៣ ចូលមកអប់រំខ្លួនឯង ក្នុងនាមអ្នកកាន់ព្រះពុទ្ធសាសនា។
មានប្រសាសន៍ក្នុងពិធីនោះ ឯកឧត្តម ទៀ សីហា លើកឡើងថា៖ វិស័យព្រះពុទ្ឋសាសនានៅកម្ពុជា អាចរីកចម្រើនទៅបានគឺអាស្រ័យ ដោយប្រទេសជាតិមានសុខសន្តិភាពពេញលេញ ជាមួយនិងសុខសន្តិភាពនេះ ពុទ្ឋបរិស័ទនៅទូទាំងប្រទេស មានឱកាសប្រកបកិច្ចការ រករបរជួញដូរដោយមិនមានការភ័យខ្លាច ដែលញ៉ាំងឱ្យកម្រិតសេដ្ឋកិច្ច និងជីវភាពក្នុងគ្រួសារមានកើនឡើងជាលំដាប់។ ហេតុនេះសូមពុកម៉ែបងប្អូន ចូលរួមរក្សាសុខសន្តិភាពនេះឱ្យនៅស្ថិតស្ថេរគង់វង្ស សម្រាប់ជាគ្រឺះក្នុងកិច្ចការអភិវឌ្ឍជាតិមាតុភូមិយើងបន្តទៅទៀត និងទុកជាកេរដំណែលដល់កូនចៅជំនាន់ក្រោយរបស់យើង។
សម្រាប់ទេយ្យវត្ថុ ដែលបានប្រគេនដល់វត្តទាំងពីរក្នុងឱកាសនោះ ក្នុងមួយវត្តៗទទួលបាន ថវិកាចំនួន២លានរៀល អង្ករ២៥០គ.ក មី៥កេស ទឹកសុទ្ឋ១០កេស ទឹកក្រូច១០កេស ទឹកត្រី៤យួរ ទឹកស៊ីអ៊ីវ៤យួរ ត្រីខកំប៉ុង១កេស តែ៥កញ្ចប់ ទឹកដោះគោ១កេស ស្កសរ១០គ.ក សាដក៧កញ្ចប់ ព្រមទាំងប្រគេន និងជូនថវិកាមួយចំនួនដល់ព្រះគ្រូចៅអធិការ ដូនជី តាជីក្នុងវត្តនីមួយៗផងដែរ។
អត្ថបទ និងរូបភាព៖ លោក យូ វង្ស លោក ស៊ាន សុផាត និងលោក ទ្រា ពន្លឺ
កែសម្រួល៖ លោក សេង ផល្លី
