នៅក្នុងឱកាសបុណ្យកាន់បិណ្ឌប្រពៃណីខ្មែរវេនទី២ នៅថ្ងៃទី១២ ខែកញ្ញា ឆ្នាំ២០២២នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប ឯកឧត្តម ទៀ សីហា អភិបាលខេត្ត និងលោកជំទាវ រួមទាំងឯកឧត្តម លោកជំទាវសមាជិក ក្រុមប្រឹក្សាខេត្ត អភិបាលរងខេត្ត ព្រមទាំង ឯកឧត្តម លោកជំទាវ លោក លោកស្រីជាថ្នាក់ដឹកនាំស្ថាប័ន នាយក នាយករងរដ្ឋបាលសាលាខេត្ត មេបញ្ជាការកងកម្លាំងប្រដាប់អាវុធទាំងបី មន្ទីរ អង្គភាព និងមន្ត្រីរាជការជុំវិញខេត្ត ព្រមទាំងប្រជាពុទ្ធបរិស័ទ ជាច្រើនអង្គ/នាក់ បានអញ្ជើញទៅចូលរួមក្នុងពិធីកាន់បិណ្ឌវេនទី២ នៅវត្តរាជបូព៌ និងវត្តកេសរារាម ក្នុងក្រុងសៀមរាប នេះផងដែរ។
ឯកឧត្តម ទៀ សីហា មានប្រសាសន៍ថា ពិធីបុណ្យភ្ជុំបិណ្ឌជាបុណ្យប្រពៃណីខ្មែរដែលប្រជាពុទ្ធបរិស័ទខ្មែរគ្រប់រូបតែងតែប្រារព្ធជារៀងរាល់ឆ្នាំ តាមគន្លងប្រពៃណី ទំនៀមទម្លាប់ពីបុរាណដ៏យូរលង់មក ដើម្បីឧទ្ទិសកុសលផលបុណ្យជូនជីដូនជីតា ញាតិការទាំង៧សន្តាន ដែលបានចែកឋានទៅកាន់លោកខាងមុខហើយនោះ ព្រមទាំងឧទ្ទិសជូនដល់ដួងវិញ្ញាណក្ខន្ត កម្មាភិបាល យុទ្ធជន យុទ្ធនារី ដែលបានពលីក្នុងបុព្វហេតុរំដោះជាតិ កសាងការពារមាតុភូមិ ព្រមជាមួយបងប្អូនរងគ្រោះដែលបានស្លាប់ទៅដោយភាពអយុត្តិធម៌ និងជួយរំដោះឲ្យរួចចាកផុតពីទុក្ខទោសទាំងឡាយ ដែលជាឧបាយភូមិណាមួយ និងឲ្យបានទៅកាន់សុគតិភព ហើយងាកក្រោយមកជួយបីបាច់ថែរក្សាកូនចៅ ឲ្យមានសេចក្តីសុខសប្បាយក្នុងក្រុមគ្រួសារ សង្គមជាតិផងដែរ។
ឯកឧត្តមអភិបាលខេត្ត បានបញ្ជាក់ថា បុណ្យភ្ជុំបិណ្ឌនេះ ក៏ដូចជាបុណ្យផ្សេងៗ និងសាសនាផ្សេងៗទៀតដែរ ដោយបានប្រារព្ធឡើងវិញ ក្រោយថ្ងៃជ័យជំនះ ៧មករា ឆ្នាំ១៩៧៩ ក្រោមការបើកទូលាយរបស់រាជរដ្ឋាភិបាលកម្ពុជា មានសិទ្ធិពេញលេញគ្រប់បែបយ៉ាង ហើយបានធ្វើឲ្យប្រទេសជាតិមានការអភិវឌ្ឍន៍រីកចម្រើនលើគ្រប់វិស័យ តាមគោលនយោបាយឈ្នះៗ។ ក្នុងនោះក៏បានធ្វើឲ្យវិស័យព្រះពុទ្ធចក្រមានការរីកចម្រើនយ៉ាងទូលំទូលាយជាបន្តបន្ទាប់ ដូចពេលនេះយើងទាំងអស់គ្នា បានប្រារព្ធតាមជំនឿកាន់បិណ្ឌផងដែរ។ ជាមួយនោះប្រជាពលរដ្ឋខ្មែរនាំគ្នាគោរពប្រតិបត្តិយ៉ាងខ្ជាប់ខ្ជួន តាំងពីសម័យបុរាណរហូតមកដល់បច្ចុប្បន្ននេះ។ ដូច្នេះពិធីបុណ្យភ្ជំបិណ្ឌនេះ យើងធ្វើទៅដោយសេចក្តីគោរព ការលើកតម្កើង អភិរក្ស និងអភិវឌ្ឍន៍វិស័យព្រះពុទ្ធសាសនាឲ្យឋិតថេរគង់វង្ស ទុកឱ្យកូនចៅជំនាន់ៗទៀត និងសង្គមជាតិទាំងមូល។
ព័ត៌មានជាតិ ថ្មីៗ
សម្រាប់ទេយ្យវត្ថុ ដែលបានប្រគេនដល់វត្តទាំងពីរក្នុងឱកាសនោះ ក្នុងមួយវត្តៗទទួលបាន ថវិកាចំនួន ២លានរៀល អង្ករ ២៥០គីឡូក្រាម ,មី ៥កេស ,ទឹកសុទ្ឋ ១០កេស ,ទឹកក្រូច ១០កេស ,ទឹកត្រី ៤យួរ ,ទឹកស៊ីអ៊ីវ ៤យួរ ,ត្រីខកំប៉ុង ១កេស ,តែ ៥កញ្ចប់ ,ទឹកដោះគោ ១កេស ,ស្កសរ ១០គីឡូក្រាម ,សាដក ៧កញ្ចប់ រួមនឹងក្រណាត់ស និងបច្ច័យមួយចំនួនចែកជូនដល់ដូនជីតាជីក្នុងវត្តនីមួយៗផងដែរ៕ អត្ថបទ និងរូបភាព: លោកអ៊ុន ណារាជ្យ កែសម្រួលដោយ លីវ សុខុន!!! សូមឯកឧត្តមមេត្តាជ្រាប សូមអរគុណ។
