នៅព្រឹកថ្ងៃទី១២ ខែកញ្ញា ឆ្នាំ២០២២នេះ គណៈកម្មាការរៀបចំការបោះឆ្នោតខេត្តសៀមរាប (គជប) បានបើកវគ្គបណ្តុះបណ្តាលស្ដីពី ការពិនិត្យបញ្ជីឈោ្មះ និងការចុះឈ្មោះបោះឆ្នោត ឆ្នាំ២០២២ ជូនដល់មន្ត្រីលេខាធិការដ្ឋានរៀបចំការបោះឆ្នោតខេត្តសៀមរាប (លខប) និងភាគីពាក់ព័ន្ធ ដែលវគ្គបណ្តុះបណ្តាលរយៈពេល ២ថ្ងៃ គឺចាប់ពីថ្ងៃទី១២-១៣ ខែកញ្ញា ឆ្នាំ២០២២ នៅសាលប្រជុំក្រុមប្រឹក្សាក្រុងសៀមរាប។ ពិធីនេះបានប្រព្រឹត្តិទៅដោយមានវត្តមានឯកឧត្តម កុយ សង សមាជិកក្រុមប្រឹក្សាខេត្ត និងលោក អ៊ាម ស៊ីណា អនុប្រធានលេខាធិការដ្ឋានរៀបចំការបោះឆ្នោតខេត្តសៀមរាប ដោយមានការចូលរួមពីសំណាក់គ្រូបង្ហាត់ គជប តំណាងអង្គភាព ស្ថាប័នពាក់ព័ន្ធ គណៈបក្សនានា ព្រមទាំងមន្ត្រីពាក់ព័ន្ធជាច្រើនរូប។
ឯកឧត្តម កុយ សង បានបង្ហាញថា វគ្គបណ្តុះបណ្តាលនាពេលនេះ ក្នុងគោលបំណងចង់ឲ្យមន្ត្រីពាក់ព័ន្ធនៃការងារបោះឆ្នោតបានយល់កាន់តែច្បាស់ ពីបញ្ហាការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២នេះ ដែលវាគឺជាការចុះឈ្មោះថ្មី ចំពោះប្រជាពលរដ្ឋដែលទើបគ្រប់អាយុ ១៨ឆ្នាំ អ្នកដែលមិនទាន់បានចុះឈ្មោះបោះឆ្នោត អ្នកទើបបានផ្លាស់លំនៅឋាន ឬទីសំណាក់ចូលថ្មីមកក្នុងឃុំ សង្កាត់ ការកែតម្រូវឈ្មោះ ឬទិន្នន័យ តាមសំណើសុំរបស់សាមីខ្លួន និងការលុបឈ្មោះចេញពីបញ្ជីបោះឆ្នោត ចំពោះអ្នកដែលបានទទួលមរណភាព អ្នកដែលត្រូវបានដកហូតជាបណ្ដោះអាសន្ននូវសិទ្ធិបោះឆ្នោត អ្នកដែលបានផ្លាស់លំនៅឋាន ឬទីសំណាក់ចេញទៅឃុំ-សង្កាត់ផ្សេង។ ការងារទាំងនេះ ត្រូវធ្វើតាមប្រព័ន្ធកុំព្យូទ័រ និងការបញ្ចូនទិន្នន័យតាមប្រព័ន្ធអ៊ីនធឺណិតមកនាយកដ្ឋាន គ្រប់គ្រងទិន្នន័យអ្នកបោះឆ្នោត និងបញ្ជីបោះឆ្នោតជាប្រចាំ ដើម្បីរៀបចំបញ្ជីបោះឆ្នោតដំបូង សម្រាប់បិទផ្សាយបម្រើឱ្យគោលដៅនៃការប្តឹងតវ៉ា ឬ/និងការប្តឹងជំទាស់ បន្ទាប់មកផ្តល់ សុពលភាពជាបញ្ជីបោះឆ្នោតផ្លូវការឆ្នាំ២០២២ សម្រាប់ប្រើប្រាស់តាមតម្រូវការនៃច្បាប់។
បើតាមលោក អ៊ាម ស៊ីណា បានឲ្យដឹងថា ប្រជាពលរដ្ឋខ្មែរដែលមិនទាន់បានចុះឈ្មោះបោះឆ្នោតពីមុនមក អ្នកដែលទើបគ្រប់ អាយុ១៨ឆ្នាំ គិតមកដល់ថ្ងៃបោះឆ្នោតជ្រើសតាំងតំណាងរាស្ត្រ ថ្ងៃទី២៣ ខែកក្កដា ឆ្នាំ២០២៣ (កើតមុន ឬត្រឹមថ្ងៃទី២៤ ខែកក្កដា ឆ្នាំ២០០៥)។ អ្នកដែលបានផ្លាស់លំនៅឋាន ឬទីសំណាក់ ចូលថ្មីក្នុងឃុំ សង្កាត់ អ្នកមានឈ្មោះក្នុងបញ្ជីបោះឆ្នោត ប៉ុន្តែឈ្មោះ ឬទិន្នន័យរបស់ខ្លួន មិនត្រឹមត្រូវ ត្រូវទៅជួបក្រុមចុះឈ្មោះបោះឆ្នោតនៅការិយាល័យចុះឈ្មោះបោះឆ្នោត ដែលមានទីតាំងនៅសាលាឃុំ សង្កាត់ ឬតាមភូមិមួយចំនួនក្នុងឃុំ សង្កាត់ ដើម្បីសុំចុះឈ្មោះបោះ ឆ្នោត និងសុំធ្វើការកែតម្រូវទិន្នន័យផងដែរ។ ចំពោះការវគ្គសិក្សារយ:ពេល២ថ្ងៃនេះ គឺជាជំនួយដ៏សំខាន់សម្រាប់គណបក្សនយោបាយ អង្គការមិនមែនរដ្ឋាភិបាល អ្នកសង្កេតការណ៍បោះឆ្នោត និងស្ថាប័នពាក់ព័ន្ធទាំងអស់ ដើម្បីសិក្សាស្វែងយល់ និងរួមសហការអនុវត្តតាមតួនាទីរបស់ខ្លួន ដើម្បីឱ្យការពិនិត្យបញ្ជីឈ្មោះ និងការចុះឈ្មោះ បោះឆ្នោតឆ្នាំ២០២៣ខាងមុខនេះ ប្រព្រឹត្តទៅដោយសេរី ត្រឹមត្រូវ យុត្តិធម៌ និងតម្លាភាព។
លោក អ៊ាម ស៊ីណា បានបញ្ជាក់ថា ការពិនិត្យបញ្ជីឈោ្មះ និងការចុះឈ្មោះបោះឆ្នោតឆ្នាំ២០២២កន្លងមក នៅតាមការិយាល័យចុះឈ្មោះបោះឆ្នោត និងរយៈពេលនៃការចុះឈ្មោះបោះឆ្នោតនោះ គឺជាគោលការណ៍ ការិយាល័យចុះឈ្មោះបោះឆ្នោតត្រូវមានទីតាំងនៅសាលា ឃុំ សង្កាត់ ហើយការិយាល័យចុះឈ្មោះបោះឆ្នោតនេះ នឹងត្រូវប្ដូរទីតាំងទៅតាមភូមិ ក្នុងឃុំ សង្កាត់ មួយចំនួន។ ការិយាល័យចុះឈ្មោះបោះឆ្នោត ត្រូវរៀបចំឱ្យមានលក្ខណៈងាយស្រួល ដល់ជនដែលមានពិការភាពក្នុងការសុំចុះឈ្មោះបោះឆ្នោត៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
