កាលពីថ្ងៃទី១២ ខែកញ្ញា ឆ្នាំ២០២២នេះ ឯកឧត្ដម ម៉ៅ ហាវណ្ណាល់ រដ្ឋមន្រ្ដីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានដឹកនាំក្រុមការងារ ធ្វើទស្សនកិច្ចនៅព្រលានយន្ដហោះអន្ដរជាតិថ្មី នៅខេត្ដសៀមរាប ដើម្បីពិនិត្យមើលវឌ្ឍនៈភាពនៃការសាងសង់ ដែលគិតមកដល់ពេលនេះ អ្នកជំនាញបានអះអាងថា ព្រលានយន្ដហោះអន្ដរជាតិមួយនេះ សម្រេចការសាងសង់បានចំនួន ៤២ភាគរយហើយ ក្នុងចំណោមសមិទ្ធិផលទាំងអស់។
បើតាមឯកឧត្ដម ជា អូន រដ្ឋលេខាធិការរដ្ឋានប្រចាំការអាកាសចរណ៍ស៊ីវិល បានឲ្យដឹងថា ការចុះត្រួតពិនិត្យនាឱកាសនេះ ក្រុមការងារបានធ្វើការពិនិត្យ ឃ្លាំងសាំងយន្ដហោះ ផ្លូវរត់យន្ដហោះ កន្លែងបំពាក់ឧបករណ៍នាំផ្លូវយន្ដហោះចុះចត កន្លែងបំពាក់ឧបករណ៍នាំផ្លូវហោះពីចំងាយ ពិនិត្យមើលកុងត្រូលផាវ័យ ដែលមានកំពស់ ១៧៦ម៉ែត្រ ស្មើរ ១៣ជាន់ ដើម្បីត្រូវបំពាក់ឧបរណ៍ឱ្យត្រូវស្ដង់ដារអាកាសចរណ៍កម្ពុជា និងអន្ដរជាតិ ព្រមទាំងពិនិត្យមើលកន្លែងបំពាក់រ៉ាដា សម្រាប់មើលយន្ដហោះឆ្លងកាត់ប្រទេសកម្ពុជា ពិនិត្យមើលការសាងសងស់សំណង់ និងនៅកន្លែងការដ្ឋានផ្សេងៗទៀត។
ឯកឧត្ដមបានបញ្ជាក់ថា គិតមកដល់ខែកញ្ញា ឆ្នាំ២០២២នេះ អាកាសយាន្ដដ្ឋានអន្ដរជាតិសៀមរាប-អង្គរ ដែលសាងសង់ថ្មីនៅស្រុកសូទ្រនិគម ខេត្ដសៀមរាប បានសាងសង់សម្រេចបាន ៤២ភាគរយហើយ ក្នុងចំណោមហេចនាសម្ព័ននៅក្នុងព្រលានយន្ដហោះសរុប។ ហើយនៅដំណាច់ឆ្នាំ២០២២នេះ ក្រុមហ៊ុននឹងសាងសង់សម្រេចឱ្យបានជាង ៧០ភាគរយបន្ថែមទៀត ដើម្បីឱ្យទាន់ហោះហើរសាកល្បងនៅពាក់កណ្ដាលឆ្នាំ២០២៣។ សមិទ្ធិផលដែលសម្រេចបានច្រើន រួមមាន សាងសង់ផ្លូវរត់យន្ដហោះជាបេតុង បានចំង៉ាយ ៣,៦០០ម៉ែត្រ ឃ្លាំងប្រេងសម្រាប់ផ្គត់ផ្គង់យន្ដហោះ ដែលមាន ៣៨ចំណត ហើយជាកន្លែងទំនើបជាងព្រលានយន្ដហោះបច្ចុប្បន្ន។
ឯកឧត្ដមក៏បានជម្រុញឱ្យក្រុមហ៊ុនសាងសង់ ត្រូវខិតខំយកចិត្ដទុកដាក់ធ្វើយ៉ាងណាឱ្យអភិវឌ្ឍន៍សម្រេតាមផែនការគ្រោងទុក។ ជាមួយគ្នានោះក្រុមការងារ ក៏កំពុងរៀបចំឯកសារបច្ចេកទេសមួយចំនួន ដូចជា អាយតាកូដ និងអាយខេអូកូដ ដើម្បីដាក់ពាក្យស្នើរសុំដើម្បីទទួលបានកូដពីអង្គការអាកាសចរណ៍ស៊ីវិល អន្ដរជាតិ ឯកសារនោះមានជាងមួយរយចំណុចដែលត្រូវបំពេញទាំងក្រុមហ៊ុននិងអាកាសចរណ៍ស៊ីវិល។
គួរឲ្យដឹងថា ការសាងសង់អាកាសយានដ្ឋានអន្តរជាតិថ្មីសៀមរាប-អង្គរ បានចាប់ពីផ្ដើមបើកការដ្ឋាននៅពាក់កណ្តាលខែមីនា ឆ្នាំ២០២០ ហើយគ្រោងនឹងបញ្ចប់ នៅឆ្នាំ២០២៣ គឺមានរយៈពេលសរុប ៣៦ខែ។ អាកាសយានដ្ឋានថ្មីនេះ ស្ថិតក្នុងលំដាប់៤E មានផ្លូវរត់ប្រវែង ៣,៦០០ម៉ែត្រ ទទឹង ៤៥ម៉ែត្រ មាន ៣៨ចំណតយន្តហោះ និងមានក្រឡាផ្ទៃស្ថានីយ អ្នកដំណើរជាង ៨ម៉ឺនម៉ែត្រក្រឡា ដែលអាចទទួលអ្នកដំណើរជាប្រចាំឆ្នាំប្រមាណជា ៧លាននាក់។ អាកាសយានដ្ឋានអន្តរជាតិខ្នាតដ៏ធំមួយនេះដែរ ត្រូវបានស្ថិតក្រោមកិច្ចព្រមព្រៀង គម្រោងវិនិយោគ BOT រយៈពេល ៥៥ឆ្នាំ ក្រោយពេលគម្រោងប្រតិបត្តិការនេះ ត្រូវបានបញ្ចប់ នឹងត្រូវប្រគល់ជូនរាជរដ្ឋាភិបាលកម្ពុជា៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
