ថ្លែងសំណេះសំណាលជាមួយប្រជាពលរដ្ឋ ស្ម័គ្រចិត្តរើសំណង់ចេញពីតំបន់រមណីយដ្ឋានអង្គរ មករស់នៅក្នុងភូមិធម្មជាតិរុនតាឯក ក្នុងឃុំរុនតាឯក ស្រុកបន្ទាយស្រី នៅព្រឹកថ្ងៃទី១៣ ខែកញ្ញា ឆ្នាំ២០២២ សម្ដេចតេជោ ហ៊ុន សែន នាយករដ្ឋមន្ត្រី បានសម្រេចផ្ដល់គោលនយោបាយគាំពារសង្គមរបស់រាជរដ្ឋាភិបាលរយៈពេល១០ឆ្នាំជូនប្រជាពលរដ្ឋសរុប ១១១៧គ្រួសារ។
គោលនយោបាយគាំពារសង្គម ដែលសម្ដេចតេជោបានផ្ដល់ប្រជាពលរដ្ឋទាំងនោះ នឹងត្រូវទទួលបានបណ្ណក្រីក្រ ដែលពួកគាត់អាចទទួល បានថវិកាឧបត្ថម្ភ ពីរាជរដ្ឋាភិបាលប្រចាំខែ ពិនិត្យព្យាបាលជំងឺដោយមិនអស់ប្រាក់ និងបណ្ណស្ត្រីមានផ្ទៃពោះ ដែលនឹងទទួលបានប្រាក់ឧបត្ថម្ភតាមដំណាក់កាលផងដែរ។ ក្នុងគោលនយោបាយនេះដែរ សម្ដេចតេជោ ក៏បានគិតគូរពីកំណើនសមាជិកគ្រួសារ របស់ប្រជាពលរដ្ឋដែលបានមកតាំងទីលំនៅក្នុងតំបន់នេះ ចំពោះការបំបែកគ្រួសាររបស់ពួកគេ ក៏នឹងត្រូវផ្ដល់គោលនយោបាយដូចគ្នា នៅតំបន់ផ្សេងមួយទៀតដែលរាជរដ្ឋាភិបាលបានត្រៀមទុកផងដែរ។
បន្ថែមពីលើគោលនយោបាយនេះ សម្ដេចតេជោ ក៏បានណែនាំដល់កងយោធភូមិភាគទី៤ និងកងពលធំទី២ ត្រូវដឹកជញ្ជូនសម្ភារៈរបស់ប្រជាពលរដ្ឋទាំង១,១១៧គ្រួសារ មកកាន់ទីតាំងសាងសង់លំនៅឋានថ្មី បន្ទាប់ពីដីនៅទីតាំងថ្មី បានធ្វើការឈូសឆាយរួចរាល់។ ទន្ទឹមនោះ សម្ដេចតេជោ ក៏បានឧបត្ថម្ភនូវអង្ករ ៥០គីឡូក្រាម មី១កេសធំ (៦កេសតូច) ត្រីខ១កេសធំ (១០០កំប៉ុង) ថវិកាចំនួន២០ម៉ឺនរៀល ក្នុងនោះដែរដើម្បីរួមចំណែកកសាងលំនៅឋាន សម្តេចបានឧបត្ថម្ភបន្ថែមក្នុង១គ្រួសារ ១លានរៀល, ថវិកាសាងសង់បង្គន់អនាម័យ ក្នុង១គ្រួសារ២០ម៉ឺនរៀល និងស័ង្កសីចំនួន៣០សន្លឹកផងដែរ។
ថ្លែងបញ្ជាក់ក្នុងឱកាសនោះ សម្ដេចតេជោ ហ៊ុន សែន ការផ្ដល់ជូនគោលនយោបាយ និងការឧបត្ថម្ភខាងលើ ផ្ដល់ជូនសម្រាប់តែប្រជាពលរដ្ឋស្ម័គ្រចិត្តចាកចេញពីតំបន់រមណីយដ្ឋានអង្គរ និងបានបំពេញគ្រប់លក្ខខណ្ឌតែប៉ុណ្ណោះ។
ក្នុងឱកាសនោះដែរ សម្តេចតេជោក៏បានថ្លែងអរគុណ ដល់អ្នកឧកញ៉ា ឡេង ណាវាត្រា អគ្គនាយកបុរី ឡេង ណាវាត្រា ដែលបានជួយឧបត្ថម្ភស័ង្កសីចំនួន ៦ម៉ឺនសន្លឹក និងផ្ទះគំរូចំនួន២០ខ្នង សម្រាប់ការចាប់ឆ្នោតផ្សងសំណាង។ សម្តេចក៏នឹងស្វាគមន៍ ដល់ក្រុមហ៊ុនផ្សេងទៀត ដែលបំណងចូលរួមឧបត្ថម្ភ ដល់ប្រជាពលរដ្ឋដែលនឹងមករស់នៅក្នុងតំបន់នេះក្នុងពេលខាងមុខផងដែរ។
គួរបញ្ជាក់ថា ក្រៅពីការផ្តល់ជូនដី ការឧបត្ថម្ភសម្ភារៈ ថវិកា ស្បៀងអាហារ គោលនយោបាយគាំពារសង្គមរយៈពេល១០ឆ្នាំនោះ សម្តេចតេជោ ហ៊ុន សែន ក៏បានបញ្ជាឱ្យអង្គភាព ក្រសួង ស្ថាប័នពាក់ព័ន្ធនានា កសាងហេដ្ឋារចនាសម្ព័ន្ធផ្លូវថ្នល់ ផ្សារ សាលារៀន មន្ទីរពេទ្យ តបណ្តាញទឹករដ្ឋ ភ្លើងរដ្ឋ បណ្តាញទូរស័ព្ទ អ៉ីនធើណិត ដាំដើមឈើហូបផ្លែ និងអំពាវនាវដល់បណ្តាគ្រឹះស្ថានធនាគារ និងមីក្រូហិរញ្ញវត្ថុ ផ្តល់ប្រាក់កម្ចីក្នុងអត្រាការប្រាក់ទាប ដល់បងប្អូនប្រជាពលរដ្ឋ ដែលស្ម័គ្រចិត្ត រើសំណង់ចេញពីតំបន់រមណីយដ្ឋានអង្គរ ដើម្បីលើកកម្ពស់ជីវភាពសម្រាប់ពេលបច្ចុប្បន្ន និងអនាគត៕
អត្ថបទ៖ សេង ផល្លី
